កូរ៉េខាងត្បូងចង់ឲ្យមហាអំណាចរុស្ស៊ីបង្កើនតួនាទីស្វែងរកសន្តិភាពនៅឧបទ្វីបកូរ៉េ

អន្តរជាតិ

កូរ៉េខាងត្បូងចង់ឲ្យមហាអំណាចរុស្ស៊ីបង្កើនតួនាទីស្វែងរកសន្តិភាពនៅឧបទ្វីបកូរ៉េ

01, Jun 2018 , 10:19 pm

រូបភាព

ដោយ: ថ្មីៗ

មន្ត្រីជាន់ខ្ពស់ក្រុងសេអ៊ូលបានកោតសរសើររដ្ឋាភិបាលក្រុងម៉ូស្គូដែលបន្តគាំទ្រការដោះស្រាយវិបត្តិនុយក្លេអ៊ែរកូរ៉េ តែបានឆ្លៀតអំពាវនាវឲ្យរដ្ឋាភិបាលលោក វ្ល៉ាឌីមៀ ពូទីន បង្កើនតួនាទីឲ្យកាន់តែធំ និងជិតស្និទ្ធជាងមុនផងដែរ។ ការអំពាវនាវនេះក៏កើតឡើងចំពេលដែលប្រមុខការទូតរុស្ស៊ីបំពេញទស្សនកិច្ចនៅកូរ៉េខាងជើងដែរ។

ក្នុងជំនួបជាមួយអនុរដ្ឋមន្ត្រីការបរទេសរុស្ស៊ីលោក Vladimir Titov នៅក្រុងសេអ៊ូល អនុរដ្ឋមន្ត្រីការបរទេសកូរ៉េខាងត្បូងលោក Lim Sung-nam បានថ្លែងអំណរគុណរុស្ស៊ីដែលបន្តតួនាទីសំខាន់របសខ្លួនជាអ្នកជិតខាង និងជាមហាអំណាចមួយក្នុងការគាំទ្រដំណើរស្វែងរកសន្តិភាពនៅឧបទ្វីបកូរ៉េ។

បើតាមការចុះផ្សាយរបស់ទីភ្នាក់ងារព័ត៌មាន Yonhap មន្ត្រីការទូតជាន់ខ្ពស់កូរ៉េខាងត្បូងរូបនេះក៏បានឆ្លៀតឱកាសទទូចឲ្យសមភាគីរុស្ស៊ីពិចារណាបង្កើនតួនាទីដ៏សំខាន់របស់ខ្លួនឲ្យកាន់តែធំ និងជិតស្និទ្ធថែមទៀតក្នុងទំនាក់ទំនងយុទ្ធសាស្ត្រជាមួយកូរ៉េទាំងពីរ។

តាមពិតទៅវត្តមានអនុរដ្ឋមន្ត្រីការបរទេសរុស្ស៊ីនៅកូរ៉េខាងត្បូង ក៏កើតឡើងជួនគ្នានឹងដំណើរទស្សនកិច្ចរបស់រដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ នៅក្រុងព្យុងយ៉ាងដែរ។ លោក ឡាវរ៉ូបានជួបពិភាក្សាជាមួយរដ្ឋមន្ត្រីការបរទេសកូរ៉េខាងជើង Ri Yong Ho និងមេដឹកនាំកំពូលលោក គីម ជុងអ៊ុន។

ទៅដល់កូរ៉េខាងជើងភ្លាម ប្រមុខការទូតរុស្ស៊ីបានអំពាវនាវឲ្យសហគមន៍អន្តរជាតិបន្ធូរបន្ថយទណ្ឌកម្មប្រឆាំងកូរ៉េខាងជើង ខណៈដែលកូរ៉េខាងជើងបន្តប្តេជ្ញាចិត្តលះបង់អាវុធនុយក្លេអ៊ែររបស់ខ្លួននោះ។ រដ្ឋមន្ត្រីរូបនេះក៏បានអញ្ជើញលោក គីម ជុងអ៊ុន ទៅទស្សនកិច្ចនៅរុស្ស៊ី ហើយលោកក៏បានប្រកាសជួយគាំទ្រការអនុវត្តរាល់ចំណុចដែលកូរ៉េទាំងពីរបានព្រមព្រៀងគ្នាក្នុងកិច្ចប្រជុំអន្តរកូរ៉េកាលពីចុងខែមេសាដែរ។

តាមពិតទៅ លោក ឡាវរ៉ូវ អញ្ជើញទៅទស្សនកិច្ចនៅកូរ៉េខាងជើងតបការអញ្ជើញរបស់សមភាគីកូរ៉េខាងជើង លោក Ri Yong Ho។ ដំណើរទស្សនកិច្ចនេះកើតឡើងនៅពេលដែលប្រទេសទាំងពីររៀបចំខួបលើកទី ៧០ នៃការបង្កើតចំណងការទូតរួមគ្នានៅឆ្នាំនេះ ហើយក៏ចំពេលដែលកូរ៉េមន្ត្រីអាមេរិក និងកូរ៉េខាងជើងបន្តការងារសស្រាក់សស្រាំដើម្បីរៀបចំជំនួបកំពូលរវាងលោក គីម ជុងអ៊ុន ជាមួយលោក ដូណាល់ ត្រាំ នៅសិង្ហបុរីដែរ៕