អន្តរជាតិ
លោក ស៊ី ជិនភីង ជូនមេដាយមិត្តភាពកម្រិតខ្ពស់បំផុតរបស់ចិនដល់លោក វ្ល៉ាឌីមៀ ពូទីន
× ប្រមុខដឹកនាំកំពូលចិន លោក ស៊ី ជិនពីង នៅថ្ងៃ៨ ខែមិថុនា បានបំពាក់មេដាយមិត្តភាពខ្ពស់បំផុតរបស់ចិនដល់ប្រមុខរដ្ឋរុស្ស៊ី លោក វ្ល៉ាឌីមៀ ពូទីន ដែលបំពេញទស្សនកិច្ចនៅទីនោះ។ ការបំពាក់មេដាយនេះ ជាការផ្តល់កិត្តិយសខ្ពស់បំផុតមួយចំពោះចំណងមិត្តភាពទ្វេភាគីរវាងប្រទេសទាំងពីរ ជាពិសេសនោះរវាងមេដឹកនាំផ្ទាល់។
ឆ្លៀតឱកាសនៃការបំពេញទស្សនកិច្ចមួយសប្តាហ៍ដើម្បីចូលរួមកិច្ចប្រជុំអង្គការកិច្ចសហប្រតិបត្តិការសៀងហៃ (SOC) របស់ប្រធានាធិបតីរុស្សី លោកប្រធានាធិបតីចិន ស៊ី ជិនភីង ជួបពិភាក្សាសមភាគីរុស្ស៊ីលោក ពូទីន ដើម្បីពង្រឹងកិច្ចសហប្រតិបត្តិទ្វេភាគីឲ្យកាន់តែស៊ីជម្រៅ។
បន្ថែមពីជំនួបនេះ លោកប្រធានាធិបតី ស៊ី ក៏បានរៀបចំពិធីផ្លូវការស្វាគមន៍យ៉ាងអធិកអធម និងបានបំពាក់មេដាយមិត្តភាពខ្ពស់បំផុតមួយដល់លោក ពូទីន ផង។ វាបង្ហាញពីការផ្តល់កិត្តិយស និងការគោរពដ៏ខ្ពង់ខ្ពស់បំផុតពីសំណាក់មេដឹកនាំចិន និងប្រជាជនចិនទៅកាន់មេដឹកនាំរុស្ស៊ី និងប្រជាជនរុស្ស៊ី។
ទីភ្នាក់ងារព័ត៌មានចិន Xinhua ផ្សាយថា ក្នុងកម្មវិធីនោះ លោក ស៊ី បានអះអាងថា លោក ពូទីន មិនមែនត្រឹមតែមេដឹកនាំកំពូលនៃប្រទេសមហាអំណាចប៉ុណ្ណោះទេ តែលោកក៏ជាមិត្តចាស់ម្នាក់ និងជាមិត្តដ៏ល្អម្នាក់របស់ប្រជាជនចិនដែរ។ លោក ស៊ី ថែមទាំងអរគុណលោកពូទីនដែលបានប្រឹងប្រែងធ្វើឲ្យទំនាក់ទំនងទ្វេភាគីកាន់តែស្អិតល្មួតក្នុងក្របខណ្ឌប្រទេសជាមួយប្រទេស និងប្រជាជនជាមួយប្រជាជនដែរ។
នៅចំពោះមុខមេដឹកនាំរុស្ស៊ី រួមជាមួយប្រតិភូជាន់ខ្ពស់នៃប្រទេសទាំងពីរប្រហែល ៧០០នាក់ លោក ស៊ី ក៏បានសង្កត់ធ្ងន់ដែរថា លោកនឹងធ្វើការរួមគ្នាជាមួយលោក ពូទីន ដើម្បីធ្វើឲ្យទំនាក់ទំនងប្រទេសទាំងពីរនាពេលអនាគតកាន់តែរីកចម្រើនត្រចេះត្រចង់ថែមទៀត ។
ឆ្លើយតបនឹងការផ្តល់កិត្តិយសខ្ពស់ខ្ពស់នេះ លោក ពូទីន បានថ្លែងអំណរគុណដល់លោកមេដឹកនាំចិន និងថែមទាំងពណ៌នាថា ការផ្តល់មេដាយនេះ មិនត្រឹមជាផ្តល់កិត្តិយសខ្ពស់បំផុតសម្រាប់រូបលោកប៉ុណ្ណោះនោះទេ តែក៏ឆ្លុះបញ្ចាំងពីភាពជាដៃគូយុទ្ធសាស្ត្រគ្រប់ជ្រុងជ្រោយក្នុងកម្រិតខ្ពស់បំផុតនៃប្រទេសទាំងពីរ ក៏ដូចជាប្រជាជននៃប្រទេសទាំងពីរផងដែរ។
សូមបញ្ជាក់ផងដែរថា មេដាយមាសមិត្តភាពរបស់ចិន គឺជាគ្រឿងឥស្សរិយសខ្ពស់បំផុតរបស់ប្រទេសសម្រាប់ផ្តល់ឲ្យមិត្តភក្តិបរទេសដែលបានចូលរួមចំណែកលើកស្ទួយការរីកចម្រើនរបស់ប្រទេសចិន លើកកម្ពស់ការផ្លាស់ប្តូរ និងកិច្ចសហប្រតិបត្តិការរបស់ចិនជាមួយពិភពលោកទាំងមូល រួមទាំងចូលរួមថែរក្សាសន្តិភាពពិភពលោកផងដែរ៕
© រក្សាសិទ្ធិដោយ thmeythmey.com