អន្តរជាតិ
ក្រៅពីចិន និងវៀតណាម គីម ជុងអ៊ុន ត្រៀមរៀនសូត្រពីការអភិវឌ្ឍសេដ្ឋកិច្ច និងសង្គមរបស់សិង្ហបុរី
× មេដឹកនាំកំពូលកូរ៉េខាងជើងទស្សនកិច្ចទីក្រុងសិង្ហបុរីនៅកាលពីយប់ម្សិលមិញ ដែលវាជារឿងគួរឲ្យភ្ងាក់ផ្អើលមួយ។ ទីភ្នាក់ងារព័ត៌មានកូរ៉េខាងជើង KNCA ផ្សាយថា លោក គីម ជុងអ៊ុន រីករាយនឹងដំណើរកំសាន្តរាត្រីនេះ ហើយលោកបានរៀនសូត្រច្រើនពីការរីកចម្រើននៃសេដ្ឋកិច្ច និងសង្គមសិង្ហបុរីផងដែរ។
«ស្រស់ស្អាត និងមានអនាម័យ»។ នេះជាសម្តីកោតសរសើរប្រទេសសិង្ហបុរីរបស់លោក គីម ជុងអ៊ុន ដែលដកស្រង់ដោយទីភ្នាក់ងារព័ត៌មានរដ្ឋកូរ៉េខាងជើង KCNA នៅថ្ងៃ ១២ ខែមិថុនា។
លោក គីម ជុងអ៊ុន នៅយប់ម្សិលមិញបានធ្វើឲ្យគេគ្រប់គ្នាភ្ងាក់ផ្អើល ដោយលោកចេញដើរកំសាន្តនៅសិង្ហបុរីពេលរាត្រីដោយមានអមដំណើរដោយរដ្ឋមន្ត្រីការបរទេស សិង្ហបុរីលោក វីវៀន បាឡាសគ្រីស្នាន់ផងដែរ។ មនុស្សស្និទ្ធនឹងលោក គីម ស្ថិតក្នុងដំណើរកំសាន្តនោះមានប្អូនស្រីលោក គីម យ៉ូចុង, អនុប្រធានគណៈកម្មការមជ្ឈិមបក្សកម្មករកូរ៉េ គីម យ៉ុងឈុល និងរដ្ឋមន្ត្រីកងទ័ពប្រជាជន ណូ ក្វាងឈុលផងដែរ។
ប្រព័ន្ធផ្សព្វផ្សាយរដ្ឋកូរ៉េខាងជើងនេះបន្ថែមថា ក្រៅពីសរសើរសិង្ហបុរីស្រស់ស្អាត មេដឹកនាំកំពូលនៃរដ្ឋនុយក្លេអ៊ែរនេះក៏ចាប់អារម្មណ៍ខ្លាំងពីការអភិវឌ្ឍសេដ្ឋកិច្ច និងសង្គមរបស់បុរីរដ្ឋអាស៊ីអាគ្នេយ៍ដែរ។ លោកបានបង្ហើបថា លោកបានរៀនសូត្រច្រើនពីការអភិវឌ្ឍនេះតាមរយៈការដើរកំសាន្តរយៈពេលខ្លីនេះ ហើយលោកក៏រំពឹងនឹងរៀនបន្ថែមទៀតពីចំណេះដឹង និងបទពិសោធន៍ច្រើនទៀតពីសិង្ហបុរីនៅពេលអនាគតនោះ។
ដោយឡែក ទីភ្នាក់ងារព័ត៌មាន Reuters ចុះផ្សាយថា បច្ចុប្បន្ននេះ របបដឹកនាំព្យុងយ៉ាងកំពុងអភិវឌ្ឍទីក្រុងមាត់សមុទ្រ Wonsan ឲ្យទៅជា តំបន់ទេសចរណ៍ពិសេស។ មកដល់ពេលនេះ លោក គីម បានសាងសង់រមនីយដ្ឋាន និងសង់ព្រលានយន្តហោះថ្មីមួយផង ដែលវានឹងអាចក្លាយតំបន់ទាក់ទាញទេសចរណ៍ធំបំផុតមួយរបស់កូរ៉េខាងជើងដូចគ្នានាពេលអនាគត។ ចំណែកតំបន់ឧស្សាហកម្ម រួម Kaesong ប្រហែលជានឹងអាចចាប់ផ្តើមសកម្មភាពឡើងវិញផង បើសិនជាស្ថានភាពកាន់តែប្រសើរ ឡើងតាមរយៈការចរចា និងមានការបង្កើតកិច្ចព្រមព្រៀងសន្តិភាពពេញលេញនៅឧបទ្វីបកូរ៉េនោះ។
តាមពិតទៅ របបដឹកនាំកូរ៉េខាងជើងកំពុងទន្ទឹងរង់ចាំឱកាសដើម្បីអភិវឌ្ឍសេដ្ឋកិច្ចរបស់ខ្លួននៅពេលឆាប់ខាងមុខ។ ប្រទេសនេះចង់ឲ្យមានការដកទណ្ឌកម្មសហគមន៍អន្តរជាតិជាពិសេសអាមេរិកផងដែរដើម្បីអនុញ្ញាតឲ្យខ្លួនអាចបើកចំហរ និងអភិវឌ្ឍសេដ្ឋកិច្ចបានស្រួលនោះ។ បើសិនការចរចាជាមួយសហរដ្ឋអាមេរិកល្អប្រសើរ និងពិតជាមានការរំសាយអាវុធនុយក្លេអ៊ែរមែននោះ វាប្រាកដណាស់ថា ទណ្ឌកម្មទាំងអម្បារម៉ានអាចនឹងត្រូវដកចេញ។ ប៉ុន្តែគ្រប់យ៉ាងនៅមិនទាន់ច្បាស់លាស់ ហើយវានៅលើផ្លូវវែងឆ្ងាយទៀត។
-៤០ឆ្នាំមុន តេង ស៊ាវភីង ទស្សនកិច្ចសិង្ហបុរី និងបានរៀនពីបទពិសោធន៍កែទម្រង់សេដ្ឋកិច្ចដូចគ្នា
និយាយដល់ទស្សនកិច្ចរបស់មេដឹកនាំបរទេសនៅសិង្ហបុរី និងរៀនសូត្រពីការរីកចម្រើនរបស់បុរីរដ្ឋនេះ គេនឹកឃើញដល់លោក តេង ស៊ាវភីង ដែលជាបិតាកំណែទម្រង់របស់ចិន និងជាអ្នកដែលធ្វើឲ្យចិនស្គាល់ការរីកចម្រើនដូចសព្វថ្ងៃ។
លោក តេង ស៊ាវភីង ស្ថិតក្នុងតំណែងជាអនុប្រធានក្រុមប្រឹក្សារដ្ឋបានអញ្ជើញទៅទស្សនកិច្ចនៅសិង្ហបុរីកាលពី ៤០ ឆ្នាំមុន ពោលគឺ ឆ្នាំ ១៩៧៨។ មេដឹកនាំចិនរូបនេះបានជួបពិភាក្សាជាមួយមេដឹកនាំ លី ក្វាន់យូ ស្ថាបនិកសិង្ហបុរី និងជានាយករដ្ឋមន្ត្រីពេលនោះដែរ។ ក្នុងកិច្ចជំនួបទ្វេភាគីនេះ លោក លីបានពន្យល់ និងបង្ហាញលោក តេង ពីគោលនយោបាយសេដ្ឋកិច្ចរបស់សិង្ហបុរីក្នុងការជំរុញការអភិវឌ្ឍប្រទេស ជាពិសេសការបើកចំហរសេដ្ឋកិច្ច និងទាកទាញវិនិយោគបរទេសផង។ លោក តេង បានបង្ហាញការចាប់អារម្មណ៍ខ្លាំងចំពោះជោគជ័យរបស់សិង្ហបុរី ជាពិសេសការធានាអភិបាលកិច្ច ការក្សាសណ្តាប់ធ្នាប់សង្គម និងភាពស្រស់ស្អាតរបស់បុរីរដ្ឋនេះផងដែរ។
មកដល់ឆ្នាំ ១៩៨០ លោក តេង បានចាប់ផ្តើមបង្កើតតំបន់សេដ្ឋកិច្ចពិសេសចំនួនបួនផ្សេងគ្នាមាននៅ Shenzen, Zhuhai, Shantou និងនៅ Xiamen និងបន្តដាក់ចេញគោលនយោបាយបើកចំហរសេដ្ឋកិច្ចផ្សេងទៀតដើម្បីជំរុញឲ្យសេដ្ឋកិច្ចចិនអភិវឌ្ឍរហ័សថែមទៀតដែរ។ ម្តងជាពីរដង លោក តេង បានបញ្ជាក់ផងដែរថា ចិនបន្តរៀនសូត្រពីជោគជ័យ និងបញ្ហាប្រឈមរបស់ប្រទេសដទៃទៀត ដើម្បីធ្វើជាយុទ្ធសាស្ត្រអភិវឌ្ឍប្រទេស។ ក្រៅពីសិង្ហបុរី ចិនក៏រៀនសូត្រច្រើនពីកូរ៉េខាងត្បូងដូចគ្នា។
-ក្រៅពីសិង្ហបុរី កូរ៉េខាងជើងត្រៀមរៀនសូត្រពីចិន ឬវៀតណាម
ទស្សនកិច្ចនៅសិង្ហបុរី ជំរុញចិត្តលោក គីម ជុងអ៊ុនបន្ថែមទៀតឲ្យចាប់ផ្តើមគិតគូពីការអភិវឌ្ឍសេដ្ឋកិច្ច។ កន្លងមកគេឃើញមានការផ្សព្វផ្សាយជាច្រើនផ្តោតលើកូរ៉េខាងជើងដែលមានចេតនាដកស្រង់បទពិសោធន៍កែទម្រង់សេដ្ឋកិច្ច និងអភិវឌ្ឍប្រទេសរបស់មហាយក្សចិន និងវៀតណាមផងដែរ។
កូរ៉េខាងជើងមិនត្រូវការអាមេរិកជាគម្រូអភិវឌ្ឍសេដ្ឋកិច្ចឡើយ។ កូរ៉េខាងជើងត្រឹមត្រូវការអាមេរិកព្រោះខ្លួនចង់ឲ្យមានការដកការហ៊ុមព័ទ្ធសេដ្ឋកិច្ច, ផ្តល់ជំនួយក្នុងក្របខណ្ឌណាមួយ ការជំរុញអ្នកវិនយោគសេដ្ឋកិច្ច និងរក្សាសន្តិសុខចំពោះរបបដឹកនាំលោក គីម បច្ចុប្បន្នផងពេលខ្លួនបោះបង់អាវុធនុយក្លេអ៊ែរ។ ម្សិលមិញលោក ម៉ៃ ប៉ុមប៉េអូ រដ្ឋមន្ត្រីការបរទេសអាមេរិកបានប្រកាសជាថ្មីក្នុងសន្និសីទសារព័ត៌មាននៅសិង្ហបុរីថា អាមេរិកមានឆន្ទៈផ្តល់ការធានាសន្តិសុខមួយដ៏ពិសេសមួយសម្រាប់កូរ៉េខាងជើង បើសិនកូរ៉េខាងជើងរំសាយអាវុធពេញលេញមែននោះ។
តាមពិតទៅ ដោយធ្លាប់រៀនសូត្រនៅប្រទេសស្វីសផង លោក គីម ជុងអ៊ុន មិនដែលមានអារម្មណ៍ស្អប់ ប្រព័ន្ធសេដ្ឋកិច្ចមូលធននិយមឡើយ។ លោកប្រហែលជាចង់ឃើញអាគារខ្ពស់ៗ កំណើនអ្នកវិយោគ ការហូរចូលនៃផលិតផលលោកខាងលិចរួមទាំង ហាងបឺហ្គឺ McDonald’s នៅក្នុងប្រទេសខ្លួនផងដែរ។ ភាពជោគជ័យនៃការបើកចំហរសេដ្ឋកិច្ចរបស់មហាយក្សសេដ្ឋកិច្ចចិន និង ប្រទេសដែលមានសេដ្ឋកិច្ចរីកចម្រើនរហ័សវៀតណាម ជារឿងដែលធ្វើឲ្យលោក ចាប់អារម្មណ៍ខ្លាំង។
កាលពីខែឧសភា លោក គីម បានបញ្ជូនប្រតិភូជាន់ខ្ពស់មួយក្រុមទៅទស្សនកិច្ចនៅចិនផងដែរ ហើយលោក គីម ខ្លួនឯង បានអញ្ជើញទៅជួបលោក ស៊ី ជីនភីង ពីរដងរួចទៅហើយដែរ។ ក្រៅពីសុំយោបល់រឿងចរចាជាមួយអាមេរិក លោក គីម ក៏មានចេតនាសុំការគាំទ្រពីចិនចំពោះការឈានទៅបើកចំហរសេដ្ឋកិច្ចនៅពេលអនាគតដូចគ្នា។
បើតាមការចុះផ្សាយរបស់ទីភ្នាក់ងារព័ត៌មាន Xinhua ប្រតិភូកូរ៉េខាងជើងដែលបានបំពេញទស្សនកិច្ចនៅចិន ដើម្បីដកស្រង់បទពិសោធន៍ និងរៀនសូត្រពីភាពជោគជ័យក្នុងការអភិវឌ្ឍសេដ្ឋកិច្ចរបស់មហាយក្សចិនដែរ បានជួបជាមួយប្រមុខរដ្ឋចិនលោក ស៊ី ជិនភីង និងទៅទស្សនកិច្ចនៅមជ្ឈមណ្ឌលបច្ចេកវិទ្យា និងតំបន់សេដ្ឋកិច្ចសំខាន់ៗមួយចំនួនផង។
អ្វីដែលសំខាន់នោះ លោកស៊ី បានប្រកាសគាំទ្រពេញទំហឹងចំពោះការសម្រេចចិត្តរបស់ក្រុងព្យុងយ៉ាងដែលជ្រើសរើសយកការអភិវឌ្ឍសេដ្ឋកិច្ចជាតិនោះ។
ដូច្នេះហើយ គេអាចនិយាយបានថា ការដកស្រង់ពិសោធន៍របស់ចិន ហើយយកមកអនុវត្តក្នុងគោលនយោបាយកំណែទម្រង់សេដ្ឋកិច្ចក្នុងស្រុកប្រហែលជានឹងមានផលវិជ្ជមានច្រើនចំពោះកូរ៉េខាងជើង។ ម្យ៉ាងចិនដែលជាខ្នងបង្អែកនយោបាយ និងការទូតរួមទាំងជាដៃគូសេដ្ឋកិច្ចដ៏សំខាន់របស់កូរ៉េខាងជើងនេះក៏ប្រហែលជាពេញចិត្តខ្លាំងនឹងជួយគាំទ្រនិងប្រឹក្សាកូរ៉េខាងជើងឲ្យដើរលើផ្លូវដែលខ្លួនធ្លាប់ដើរដែរ។
ក្រៅពីគម្រូសេដ្ឋកិច្ចចិន មេដឹកនាំកូរ៉េខាងជើងក៏ជាប់ចិត្តនឹងការកែទម្រង់សេដ្ឋកិច្ចរបស់វៀតណាមកន្លងមក។ កូរ៉េខាងជើងរំពឹងថា ខ្លួនអាចនឹងប្រើប្រាស់គម្រូនោះដើម្បីអភិវឌ្ឍសេដ្ឋកិច្ចខ្លួនទៅថ្ងៃមុខផងដែរ។
បើតាមការចុះផ្សាយរបស់សារព័ត៌មានកូរ៉េខាងត្បូង Maeil Business ក្នុងជំនួបប្រវត្តិសាស្ត្រថ្ងៃ ២៧ ខែមេសាកន្លងជាមួយប្រធានាធិបតី មូន ចេអ៊ីន លោក គីម ជុងអ៊ុន បានបង្ហើបថា លោកចង់ជ្រើសរើសការកែទម្រង់តាមវៀតណាម។
វៀតណាមចាប់ផ្តើមអនុវត្តគោលនយោបាយកែទម្រង់សេដ្ឋកិច្ច ដូយមឺយ (Doi Moi) នៅឆ្នាំ ១៩៨៦ ហើយតាមរយៈការកែទម្រង់នេះ វាបានត្រួសត្រាយផ្លូវឲ្យវៀតណាមអភិវឌ្ឍសេដ្ឋកិច្ចបានរហ័ស និងក្លាយជាសមាជិកអង្គការពាណិជ្ជកម្មពិភពលោកឆ្នាំ ២០០៧ ផងដែរ។ ប៉ុន្តែកំណែទម្រង់នេះក៏ស្ថិតក្រោមឥទ្ធិពលនៃគោលនយោបាយកែទម្រង់សេដ្ឋកិច្ចរបស់ចិនដូចគ្នាដែរ៕
Tag:
កូរ៉េខាងជើង
សិង្ហបុរី
គីម ជុងអ៊ុន
វៀតណាម
ចិន
© រក្សាសិទ្ធិដោយ thmeythmey.com