អន្តរជាតិ
រដ្ឋមន្ត្រីពាណិជ្ជកម្មសិង្ហបុរី៖ វិស័យហិរញ្ញវត្ថុ, ថាមពល និងដឹកជញ្ជូនរបស់កម្ពុជាកំពុងទាក់ទាញក្រុមហ៊ុនសិង្ហបុរី
រដ្ឋមន្ត្រីពាណិជ្ជកម្ម និងឧស្សាហកម្មសិង្ហបុរីលោក Chan Chun Sing ពេលជួបជាមួយអ្នកសារព័ត៌មានអាស៊ាន
×![]()
សិង្ហបុរី៖ រដ្ឋមន្ត្រីពាណិជ្ជកម្ម និងឧស្សាហកម្មសិង្ហបុរីមើលឃើញថា ក្រុមហ៊ុនសិង្ហបុរីបច្ចុប្បន្នកំពុងចាប់អារម្មណ៍ និងចង់វិនិយោគលើវិស័យដែលមានសក្តានុពលដូចហិរញ្ញវត្ថុ ដឹកជញ្ជូន និងថាមពលពល។ លោកយល់ថា បើកម្ពុជាបើកទ្វារសម្រាប់កិច្ចសហប្រតិបត្តិការ សិង្ហបុរីអាចរួមចំណែកវិនិយោគបាន។
ការលើកឡើងរបស់លោក Chan Chun Sing រដ្ឋមន្ត្រីពាណិជ្ជកម្ម និងឧស្សាហកម្មសិង្ហបុរីពីចំណាប់អារម្មណ៍របស់ក្រុមហ៊ុនសិង្ហបុរីលើវិស័យដែលសក្តានុពលនេះធ្វើឡើងក្នុងពេលជួបសន្ទនាជាមួយអ្នកសារព័ត៌មានអាស៊ានថ្ងៃ ៧ ខែសីហា។
លោក Chan បានថ្លែងដូច្នេះ៖«ខ្ញុំគិតថា ក្រុមហ៊ុនសិង្ហបុរីចាប់អារម្មណ៍លើវិស័យមួយចំនួននៅកម្ពុជា។ ទីមួយគឺផ្នែកសេវាដូចជា ការផ្គត់ផ្គង់ថាមពល, ទឹក និងការគ្រប់គ្រងសំណល់ ហើយវាជារឿងដែលប្រទេសកំពុងអភិវឌ្ឍទាំងអស់ត្រូវការ»។
លោកបានបន្តថា៖«ចំណែកផ្នែកអាកាសចរណ៍ និងកំពង់ផែក៏មានសក្តានុពលដូចគ្នា។ មួយទៀតគឺ ហិរញ្ញវត្ថុ និងធនាគារ។ បើសិនជា កម្ពុជាបើកទ្វារសម្រាប់កិច្ចសហប្រតិបត្តិការ ខ្ញុំយល់ថា សិង្ហបុរីអាចរួមចំណែកវិនិយោគបានផងដែរ»។
ឧទាហរណ៍ជាក់ស្តែង កន្លងមក ក្រុមហ៊ុនកសិកម្ម និងអចលនទ្រព្យ HLH បានវិនិយោគលើគម្រោងផ្ទះមានតម្លៃសមរម្យនៅខេត្តព្រះសីហនុ ក៏ដូចជាក្រុមហ៊ុន Sunseap ដែលវិនិយោគលើគម្រោងសួនថាមពលពន្លឺព្រះអាទិត្យ (Solar Farm) ដំបូងគេដែលត្រូវបានសាងសង់ឡើងនៅខេត្តស្វាយរៀង។
ជុំវិញទំនាក់ទំនងរវាកម្ពុជា និងសិង្ហបុរីនេះដែរ បើតាមឯកអគ្គរដ្ឋទូតសិង្ហបុរីប្រចាំកម្ពុជា លោក Michael Tan រយៈពេល៥៣ឆ្នាំមកនេះ ទំនាក់ទំនងទ្វេភាគីនេះផ្លាស់ប្ដូររហ័សទាំងផ្នែកនយោបាយ ពាណិជ្ជកម្ម និងការផ្លាស់ប្ដូរផ្នែកសង្គមរវាងប្រជាជន និងប្រជាជនផងដែរ។
ថ្លែងក្នុងពិធីខួបលើកទី ៥៣ នៃការប្រកាសឯករាជ្យសិង្ហបុរីថ្ងៃ ៩ ខែសីហា ឯកអគ្គរដ្ឋទូតរូបនេះបានបញ្ជាក់ថា ចំណងសេដ្ឋកិច្ចរវាងសិង្ហបុរី និងកម្ពុជា គឺកាន់តែមាំមួន និងកើនឡើង ហើយសិង្ហបុរី គឺប្រទេសមួយក្នុងចំណោមដៃគូពាណិជ្ជកម្មធំទាំង៥របស់កម្ពុជា ដោយក្នុងឆ្នាំ២០១៧ ទំហំពាណិជ្ជកម្មសរុបមានដល់ទៅបីពាន់លានដុល្លារ។
ក្រុមហ៊ុនសិង្ហបុរីកាន់តែមានវត្តមានច្រើននៅកម្ពុជា ស្របពេលដែលសិង្ហបុរីក្លាយជាប្រភពវិនិយោគបរទេសធំជាងគេទីពីររបស់កម្ពុជាដោយមានទ្រព្យវិនិយោគចំនួនជាង២៥០លានដុល្លារក្នុងឆ្នាំ២០១៧។ បើគិតដល់ចុងឆ្នាំដដែល ទ្រព្យវិនិយោគរបស់សិង្ហបុរីមានសរុប១.២ពាន់លានដុល្លារឯណោះ។
តាមពិតទៅ កម្ពុជា និងសិង្ហបុរីបានបង្កើតទំនាក់ទំនងការទូតកាលពីឆ្នាំ ១៩៦៥ បន្ទាប់ពីសិង្ហបុរីប្រកាសខ្លួនជារដ្ឋឯករាជ្យ។ ទំនាក់ទំនងនេះកាន់តែប្រសើរឡើងជាបន្តបន្ទាប់កន្លងមកនេះ ហើយទស្សនកិច្ចរបស់អតីតប្រធានាធិបតីសិង្ហបុរីលោក តូនី តាន់ កាលពីខែមករាឆ្នាំ២០១៧នោះ ក៏រួមចំណែកពង្រឹងកិច្ចសហប្រតិបត្តិការទ្វេភាគីរវាងប្រទេសអាស៊ានទាំងពីរឲ្យកាន់តែល្អប្រសើរទៀត៕
Tag:
សិង្ហបុរី
កម្ពុជា
ពាណិជ្ជកម្ម
© រក្សាសិទ្ធិដោយ thmeythmey.com
