សេដ្ឋកិច្ចអន្តរជាតិ
អន្តរជាតិ
រូបភាព RT
×![]()
ដោយ: ថ្មីៗ
សេដ្ឋកិច្ចរុស្ស៊ី បានកើនឡើងប្រមាណ ១,៨% នៅក្នុងត្រីមាសទី ២នេះ បើទោះបីជារងការដាក់ទណ្ឌកម្មយ៉ាងធ្ងន់ធ្ងរពីអាមេរិកក្ដី។ រុស្ស៊ីអាចសម្រេចបានកំណើនសេដ្ឋកិច្ចដ៏គួរឲ្យកត់សម្គាល់នេះ ក៏ព្រោះតែការកើនឡើងនៃតម្លៃប្រេង និងឧស្ម័ន នៅដើមឆ្នាំនេះ។
ទីភ្នាក់ងារព័ត៌មាន AFP ស្រង់សម្តីទីភ្នាក់ងារស្ថិតិរុស្ស៊ី Rosstat នៅថ្ងៃ១០ សីហា ឆ្នាំ២០១៨ថា កំណើនសេដ្ឋកិច្ចដ៏គួរឲ្យកត់សម្គាល់នេះកើតមានឡើង បន្ទាប់ពីរុស្ស៊ីរងគ្រោះព្រោះការដាំក្បាលចុះនៃសេដ្ឋកិច្ចរយៈពេលពី ឆ្នាំជាប់គ្នា ពោលគឺកាលពីឆ្នាំ២០១៥ និងឆ្នាំ២០១៦។
សេដ្ឋកិច្ចដាំក្បាល នេះគឺបណ្ដាលមកពីកត្តាចំនួនពីរ។ ទីមួយគឺ ការធ្លាក់ចុះនៃតម្លៃប្រេងកាលពីឆ្នាំ២០១៤ ហើយទីពីរគឺ ការដាក់ទណ្ឌកម្មរបស់បណ្ដាប្រទេសលោកខាងលិច ក្រោយរុស្ស៊ីត្របាក់យកគ្រីមៀពីអ៊ុយក្រែន។
យ៉ាងណាក៏ដោយ គេមើលឃើញថា តម្លៃប្រេង និងឧស្ម័ន បានហក់ឡើងគួរឲ្យកត់សម្គាល់ នៅដើមឆ្នាំ ២០១៨នេះ ដោយវាអំណោយផលចំពោះរុស្ស៊ីព្រោះដង្ហើមសេដ្ឋកិច្ចមហាអំណាចនេះនៅតែពឹងផ្អែកយ៉ាងខ្លាំងទៅលើការនាំចេញធនធានថាមពល យ៉ាងច្រើនសន្ធឹកសន្ធាប់។
ការងើបឡើងនៃកំណើនសេដ្ឋកិច្ចរុស្ស៊ី ចាប់តាំងពីឆ្នាំ ២០១៧មក គឺនៅតែបន្តរក្សាសន្ទុះរបស់ខ្លួនជាបន្តបន្ទាប់មកដល់ឆ្នាំ ២០១៨នេះទៀត បើទោះបីជាមកដល់ខែសីហានេះក្រុងវ៉ាស៊ីនតោនបានសម្រេចដាក់ទណ្ឌកម្មប្រឆាំងរុស្ស៊ីក្តី។ ទណ្ឌកម្មថ្មីនេះគឺពាក់ព័ន្ធនឹងរឿងក្ដីជ្រៀតជ្រែកការបោះឆ្នោតអាមេរិក កាលពីឆ្នាំ២០១៦ និងរឿងក្តីប៉ុនប៉ងសម្លាប់អតីតភ្នាក់ងារចារកម្មរុស្សីនៅអង់គ្លេស តាមរយៈការប្រើប្រាស់សារធាតុគីមី។
ថ្វីបើសេដ្ឋកិច្ចខ្លួនរួចផុតពីការការដាំក្បាលចុះក្រោមការដឹកនាំរបស់លោកប្រធានាធិបតីរុស្ស៊ី វ្ល៉ាឌីមៀ ពូទីនក៏ដោយក្ដី កំណើនសេដ្ឋកិច្ចបច្ចុប្បន្នមានត្រឹម ១,៨%ប៉ុណ្ណោះដែលវាខុសឆ្ងាយពីគោលដៅខ្លួនដែលចង់បានឲ្យដល់ ៤% ជារៀងរាល់ឆ្នាំ។ គោលនេះដែលត្រូវបានប្រកាសដោយរដ្ឋាភិបាលកាលពីខែមីនាកន្លងទៅ រួមជាមួយមហិច្ឆតាលុបបំបាត់ចំនួនប្រជាជនក្រីក្រប្រមាណពាក់កណ្ដាលផង។
តាមពិតទៅ មូលនិធិរូបិយវត្ថុអន្តរជាតិ (IMF) ធ្លាប់បានព្យាករថា កំណើននៃសេដ្ឋកិច្ចរុស្ស៊ីកើនដល់១,៧% សម្រាប់ឆ្នាំ ២០១៨។ លើសពីនេះ កាលពីខែមិថុនាកន្លងទៅទៀត ស្ថាប័ន IMF ធ្លាប់បង្ហាញក្ដីបារម្ភចំពោះការរួមចំណែកដ៏ស្ដួចស្ដើងនៃសេដ្ឋកិច្ចរុស្ស៊ីដល់ការលូតលាស់សេដ្ឋកិច្ចពិភពលោក ក៏ដូចជាការបរាជ័យរបស់រុស្ស៊ីក្នុងការប្រែខ្លួនជាប្រទេសដែលមានកម្រិតចំណូលខ្ពស់ជាងមុនដែរ។ ស្ថាប័នហិរញ្ញវត្ថុនេះ បានដាស់តឿនថា រដ្ឋាភិបាលរុស្ស៊ី ត្រូវតែធ្វើកំណែទម្រង់រចនាសម្ព័ន្ធសេដ្ឋកិច្ចខ្លួន ដើម្បីដោះស្រាយបញ្ហាប្រឈមដែលមានដូចជាកំណើនប្រជាជនវ័យចំណាស់ និងលើកស្ទួយវិស័យឯកជនជាដើម៕
Tag:
រុស្ស៊ី
សេដ្ឋកិច្ច
IMF
© រក្សាសិទ្ធិដោយ thmeythmey.com
