ជាតិ
សេដ្ឋកិច្ច
ហត្ថាកសិករ គ្រោងបោះផ្សាយមូលបត្របំណុល ជិត២០លានដុល្លារ ជាលើកដំបូងនៅកម្ពុជា
× ភ្នំពេញ៖ គ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីត គ្រោងនឹងបោះផ្សាយមូលបត្របំណុលជាសាធារណៈ ដំបូងគេនៅកម្ពុជា ដើម្បីប្រមូលទឹកប្រាក់ជិត ២០លានដុល្លារបម្រើឲ្យការវិនិយោគបន្ថែមរបស់ខ្លួន។ នេះបើតាមសេចក្ដីប្រកាសព័ត៌មានរបស់គ្រឹះស្ថានមួយនេះ។
ហត្ថាកសិករ ទទួលបានការយល់ព្រមពីធនាគារជាតិរួចហើយ និងបានដាក់ពាក្យស្នើសុំបោះផ្សាយសញ្ញាបណ្ណសាជីវកម្មពីគណៈកម្មការមូលបត្រកម្ពុជា និងបានដាក់ពាក្យស្នើសុំចុះបញ្ជីនៅផ្សារមូលបត្រកម្ពុជា។
គ្រឹះស្ថានមួយនេះ គ្រោងធ្វើសំណើលក់សញ្ញាបណ្ណក្នុងចំនួនទឹកប្រាក់ដើមសរុប ៨០ពាន់លានរៀល (ប្រហែល ១៩,៧លានដុល្លារ)។ មូលបត្របំណុលនេះមានរយៈពេល៣ឆ្នាំ និងអត្រាការប្រាក់ប្រចាំឆ្នាំ ៧,៥ភាគរយ ទៅ ៨,៥ភាគរយ។
ប្រភេទមូលបត្របំណុល ដែលហត្ថាកសិករ គ្រោងនឹងបោះលក់នេះ គឺហៅថា សញ្ញាបណ្ណសាជីវកម្ម។ សញ្ញាបណ្ណ គឺជាឧបករណ៍ហិរញ្ញវត្ថុដែលតំណាងឲ្យកិច្ចសន្យាខ្ចីប្រាក់រវាងក្រុមហ៊ុនបោះផ្សាយ និងវិនិយោគិនសាធារណៈ។ តាមរយៈឧបករណ៍នេះ បុគ្គលបោះផ្សាយមូលបត្របំណុលមានកាតព្វកិច្ចបង់ប្រាក់ជាក់លាក់មួយជាទៀតទាត់ ឲ្យទៅវិនិយោគិន ដែលហៅថា គូប៉ុង ឬ ការប្រាក់ ព្រមទាំងបង់ប្រាក់ដើមនៅពេលដែលសញ្ញាបណ្ណនោះដល់កាលកំណត់សង ដែលហៅថា ឥណប្រតិទាន។
លោក ហួត អៀងតុង ឲ្យដឹងដូច្នេះថា៖«ហត្ថាកសិករ មានបំណងប្រើប្រាស់សាច់ប្រាក់សុទ្ធ ក្នុងការធ្វើហិញ្ញប្បទានកំណើននៃអាជីវកម្មឥណទាន រួមទាំងជាទុនបង្វិល និងសម្រាប់គោលបំណងទូទៅផ្សេងទៀតរបស់ក្រុមហ៊ុន។ សាច់ប្រាក់ទាំងនេះក៏នឹងជួយគាំទ្រសហគ្រាសខ្នាតតូចបំផុត ខ្នាតតូច និងខ្នាតមធ្យម នៅតាមជនបទ និងទីប្រជុំជនផងដែរ»។
ហត្ថាកសិករ លីមីតធីត គឺជាគ្រឹះស្ថានមីក្រូហិរញ្ញវត្ថុទទួលប្រាក់បញ្ញើធំលំដាប់ទី៣នៅកម្ពុជា។ គិតត្រឹមពាក់កណ្ដាលឆ្នាំ២០១៨នេះ គ្រឹះស្ថានមួយនេះមានសមតុល្យប្រាក់បញ្ញើសន្សំចំនួន ៤០៩លានដុល្លារ និងមានសំពៀតឥណទាន ៦៦០លានដុល្លារ ព្រមទាំងមានទ្រព្យសកម្មសរុប ៨០៤លានដុល្លារ៕
© រក្សាសិទ្ធិដោយ thmeythmey.com