អន្តរជាតិ
ជប៉ុនថា សកម្មភាពរបស់ចិននៅដែនសមុទ្រជម្លោះសមុទ្រចិនខាងកើតកំពុងគំរាមកំហែងដល់សន្តិសុខខ្លួន ![](https://image.thmeythmey.com/pictures/2018/09/03/japan.jpg)
×![]()
ថ្ងៃចន្ទទី ៣ ខែកញ្ញានេះមន្ត្រីជាន់ខ្ពស់ជប៉ុនបានព្រមានពីការកើនឡើននៃបរិយាកាសសន្តិសុខដ៏តឹងតែង ខណៈដែលចិនបន្តបង្កើនសកម្មភាពយោធារបស់ខ្លួនជាលក្ខណៈឯកតោភាគី នៅក្នុងដែនជម្លោះសមុទ្រចិនខាងកើត។
រដ្ឋមន្ត្រីការពារជាតិជប៉ុន លោក Itsunori Onodera បានអះអាងថា សន្តិសុខរបស់ខ្លួនប្រឈមនឹងគ្រោះថ្នាក់ព្រោះតែចិនបានបង្កើនសកម្មភាពយោធា និងកម្លាំងយោធារបស់ខ្លួនដោយឯកតោភាគីយ៉ាងឆាប់រហ័ស នៅក្នុងដែនសមុទ្រជម្លោះ នាប៉ុន្មានឆ្នាំចុងក្រោយនេះ។
យោងតាមការចុះផ្សាយរបស់ទីភ្នាក់ងារសារព័ត៌មាន AFP ប្រមុខការពាតិជប៉ុនរូបនេះបន្ថែមថា សកម្មភាពរបស់ចិននោះ រួមមានដូចជា ការបើកប្រតិបត្តិការលោតឆត្រយោងថ្មីៗជាច្រើន នៅជាប់ព្រំដែនជប៉ុន និងការចល័តនាវាមុជទឹកប្រើប្រាស់ថាមពលនុយក្លេអ៊ែរ នៅក្បែរដែនជម្លោះសមុទ្រចិនខាងកើតថែមទៀត។
លោក Onodera បានអះអាងបន្ថែមថា ហេតុការណ៍ទាំងនេះ បានក្លាយជាការព្រួយបារម្ភដ៏គួរឲ្យកត់សម្គាល់មួយ ទៅដល់សន្តិសុខជប៉ុន។
ការលើកឡើងរបស់ប្រមុខការពាតជាតិជប៉ុនពីបញ្ហាសន្តិសុខនេះ ធ្វើឡើងស្របពេលដែលរដ្ឋាភិបាលក្រុងតូក្យូ កំពុងព្យាយាមសម្របសម្រួលទំនាក់ទំនងការទូតដ៏តានតឹងរវាងប្រទេសទាំងពីរ ដោយលោកនាយករដ្ឋមន្ត្រីជប៉ុន ស៊ីនហ្សូ អាបេ គ្រោងនឹងបំពេញទស្សនកិច្ចទៅកាន់ប្រទេសចិន នាខែតុលាខាងមុខនេះ។
គួរបញ្ជាក់ដែរថា ចាប់តាំងពីឡើងកាន់អំណាចមក លោក អាបេ នៅតែរក្សាជំហរយ៉ាងរឹងមាំក្នុងការការពារកោះ Diaoyu ឬជប៉ុន ហៅថា កោះ Senkaku ដែលស្ថិតក្នុងដែនជម្លោះសមុទ្រចិនខាងកើត។ ក្រៅពីបញ្ហាប្រវត្តិសាស្ត្រ ការទាមទារតំបន់ត្រួតស៊ីគ្នារវាងចិន និងជប៉ុននេះហើយ បានបង្កភាពតានតឹងយ៉ាងខ្លាំងរវាងរដ្ឋាភិបាលនៃប្រទេសទាំងពីររហូតមក។
យ៉ាងណាមិញ លោកនាយករដ្ឋមន្ត្រីជប៉ុនវ័យ ៦៣ឆ្នាំរូបនេះ បានព្យាយាមបន្ធូរបន្ថយវោហារសាស្ត្រនយោបាយរបស់លោក ជាថ្នូរនឹងការទាមទារឲ្យចិនដាក់សម្ពាធលើកូរ៉េខាងជើង ដើម្បីឲ្យប្រទេសនេះ ព្រមបោះបង់ចោលកម្មវិធីមីស៊ីល និងនុយក្លេអ៊ែររបស់ខ្លួន៕
Tag:
ជប៉ុន
ចិន
Itsunori Onodera
© រក្សាសិទ្ធិដោយ thmeythmey.com