ដោយ៖
លោក ស៊ាង លាប អ្នកចិត្តសាស្ត្រនិងជាអ្នកជំនាញផ្តល់ប្រឹក្សាជំងឺញៀនថ្នាំ
ជាការកត់សំគាល់ បទល្មើសនៃការចរាចរថ្នាំញៀនត្រូវបានបង្ក្រាបពីអជ្ញាធរមានសមត្ថភាពកិច្ចជាហូរហែរ ជាសញ្ញាបង្ហាញឱ្យដឹងថា អ្នកប្រើប្រាស់គ្រឿងញៀនមានការកើនឡើង ដែលជាបញ្ហាគួរឱ្យព្រួយ បារម្ភជាខ្លាំង ពីព្រោះគ្រឿងញៀនប៉ះពាល់ខួរក្បាលរបស់អ្នកប្រើប្រាស់។
ខ្លួន១ទប់ទល់នឹងសត្រូវ៣
នៅពេលបុគ្គលធ្លាក់ខ្លួនកាន់តែជ្រៅទៅនឹងថ្នាំញៀន ផលប៉ះពាល់ធ្ងន់ធ្ងរបានកើតមានឡើងទាំងលើសុខភាពផ្លូវកាយនិងសុខភាពផ្លូវចិត្ត។ នៅពេលបុគ្គលបានប្រើប្រាស់ថ្នាំញៀនរហូតញៀនហើយ បុគ្គលដែលចង់ផ្តាច់ គឺត្រូវប្រឈមនឹងសត្រូវចំនួន៣គឺ:
ទី១ ការទប់ទល់នឹងការទាមទារសារធាតុញៀនពីខួរក្បាល
អ្វីគ្រប់យ៉ាងគឺជាប់ទាក់ទងនឹងទម្លាប់។ ដំបូងមនុស្សយើងបង្កើតទម្លាប់ឱ្យខួរក្បាល បន្ទាប់មកខួរក្បាលបង្កើតទម្លាប់ឱ្យយើងវិញ។ នៅពេលសារធាតុញៀនចាប់ផ្តើមចូលមកក្នុងខ្លួនមនុស្សយើង ខួរក្បាលចាប់ផ្តើមរៀនឬទទួលយកសារធាតុញៀនរហូតថ្នឹកក្លាយជាទម្លាប់។ បន្ទាប់ពីញៀន ខួរក្បាលបង្កើតទម្លាប់ឱ្យវិញដោយទាមទារឱ្យប្រើសារធាតុញៀន។ ពេលនៅមិនទទួលបានសារធាតុញៀន អាការធ្វើទុក្ខក៏កើតមាន(រោគសញ្ញានៅពេលផ្តាច់)។ ការទប់ទល់នឹងការទាមទារសារធាតុញៀនពីខួរក្បាល ជារឿងលំបាកបំផុតសម្រាប់អ្នកញៀនថ្នាំ ដោយសារឥទ្ធិពលរបស់វាកើតមានលើផ្លូវកាយផងនិងផ្លូវចិត្តផង។
ជាការកត់សំគាល់ ការបន្សាបឥទ្ធិពលសារធាតុញៀនលើផ្លូវកាយហាក់ងាយស្រួលជាងការបន្សាបមកលើផ្លូវចិត្ត។ នៅពេលមានការតានតឹងផ្លូវចិត្តឬក៏ធ្លាក់ទឹកចិត្ត អ្វីដែលផុសក្នុងចិត្តមុនគេគឺថ្នាំញៀន ពោលគឺខួរក្បាលរំញោចឱ្យទៅរកថ្នាំញៀន ពីព្រោះថ្នាំញៀនជួយផ្លូវចិត្តឱ្យល្អប្រសើរយ៉ាងឆាប់រហ័សនិងស័ក្តិសិទ្ធិបំផុត។ បញ្ហានេះហើយដែលជំរុញឱ្យបុគ្គលមានជំងឺញៀនងាកទៅប្រើប្រាស់ថ្នាំញៀនឡើងវិញ(លាប់)។ បែបនេះការជួយពីអ្នកជំនាញចិត្តសាស្ត្រគឺតម្រូវឱ្យមានចាំបាច់បំផុត ដើម្បីរៀនគ្រប់គ្រងអារម្មណ៍តានតឹងផ្លូវចិត្ត រៀនពីវិធីពង្រឹងកម្លាំងចិត្ត រៀនពីវិធីដោះស្រាយបញ្ហា ...។ លើសពីនេះ អ្នកជំងឺញៀនថ្នាំគឺប្រឈមនឹងជំងឺផ្លូវចិត្តធ្ងន់ធ្ងរដូចជាជំងឺវិកលចរិត ជំងឺថប់បារម្ភ ជំងឺធ្លាក់ទឹកចិត្ត ដែលទាមទារឱ្យមានការជួយពីគ្រូពេទ្យឯកទេសវិកលវិទ្យា(Psychiatrist) និងអ្នកចិត្តសាស្ត្រ (Psychologist)ចំពោះបញ្ហាទាំងនេះ។
ទី២ ការទប់ទល់នឹងការរើសអើង
ភាពអាម៉ាស់ ការមើលងាយ ក៏ជាកត្តាប្រឈមដ៏ធំសម្រាប់អ្នកញៀនថ្នាំ។ អារម្មណ៍ភ័យខ្លាច និងព្រួយបារម្ភតែងកើតមាន ដោយខិតខំលាក់បាំងពីទង្វើ(ប្រើប្រាស់ថ្នាំញៀន)ពីមនុស្សជុំវិញខ្លួន និងមនុស្សដែលខ្លួនស្គាល់។ អារម្មណ៍ភ័យខ្លាចចេះតែកើនឡើងជាលំដាប់ ដែលធ្វើឱ្យប្រឈមនឹងជំងឺថប់បារម្ភ។ អ្នកជំងឺញៀនថ្នាំខិតខំទប់ទល់នឹងសំពាធផ្លូវចិត្តពីគ្រប់ទិសទី ពីអ្នកដែលដឹងព័ត៌មានថាខ្លួនជាមានជំងឺញៀនថ្នាំ។ ការមិនឱ្យតម្លៃពីអ្នកដទៃជំរុញអ្នកជំងឺញៀនថ្នាំឯកោ និងដកថយពីគេឯង ដែលជាមូលហេតុប្រឈមនឹងជំងឺធ្លាក់ទឹកចិត្ត(Depression)។ បែបនេះការដោះស្រាយបញ្ហារើសអើងគឺជាកត្តាចាំបាច់ផងដែរ ទើបអាចរួមចំណែកជួយអ្នកជំងឺញៀនថ្នាំអាចផ្តាច់ថ្នាំញៀនដោយជោគជ័យ។ អ្នកសង្គមកិច្ច(Social worker) ដើរតួនាទីសំខាន់ក្នុងការដោះស្រាយបញ្ហារើសអើងទាំងនេះ។
ទី៣ ការទប់ទល់នឹងបញ្ហាផ្លូវចិត្តផ្ទាល់ខ្លួន
សេចក្តីស្រលាញ់ជាតម្រូវការផ្លូវចិត្តដ៏សំខាន់បំផុតមិនអាចខ្វះបាន ដើម្បីអភិវឌ្ឍផ្លូវចិត្តឱ្យរឹងមាំ។ មុននឹងបុគ្គលធ្លាក់ខ្លួនទៅប្រើប្រាស់គ្រឿងញៀន កត្តាចម្បងបំផុតមួយត្រូវបានរកឃើញ គឺជាប់ទាក់ទងនឹងកង្វះភាពកក់ក្តៅពីឪពុកម្តាយឬក្រុមគ្រួសារ ពោលគឺកង្វះក្តីស្រលាញ់តែម្តង ជាហេតុបណ្តាលឱ្យបុគ្គលប្រឈមនឹងបញ្ហាផ្លូវចិត្ត។ បញ្ហាប្រឈមជាច្រើនទៀតក្នុងជីវិតរស់នៅ ដូចជាបញ្ហារៀនសូត្រ បញ្ហាជីវភាពបញ្ហាទំនាក់ទំនងឬស្នេហា... ព្រមទាំងការអូសទាញ និងការសាកល្បង គឺជាហានិភ័យឆ្ពោះទៅរកការប្រើប្រាស់គ្រឿងញៀន។ ការប្រើប្រាស់គ្រឿងញៀនគឺជាវិធីដោះស្រាយបញ្ហាផ្លូវចិត្ត តែវាជាដំណោះស្រាយអវិជ្ជមាន។ អ្នកជំងឺញៀនថ្នាំត្រូវការការជួយពិសេស ពោលគឺត្រូវការការស្តារនីតិសម្បទា ពីព្រោះថ្នាំញៀនបំផ្លាញខួរក្បាលដែលប៉ះពាល់ដល់មុខងារនៃផ្លូវចិត្ត។ បែបនេះដើម្បីឱ្យការព្យាបាលអ្នកជំងឺញៀនថ្នាំមានប្រសិទ្ធភាព គឺទាមទារឱ្យមានវិធីសាស្ត្រព្យាបាលពហុជំនាញ(Holistic approaches)។ ការចូលរួមពីសមាជិកគ្រួសារទាំងអស់ក្នុងដំណើរការព្យាបាលក៏ជាកត្តាចាំបាច់ផងដែរ។
ការផ្គុំកម្លាំងទាំងបីឱ្យចូលគ្នាតែមួយ ទើបជាលទ្ធភាពជួយឱ្យបុគ្គលមានជំងឺញៀនថ្នាំអាចយកឈ្នះឬផ្តាច់ថ្នាំញៀនដោយជោគជ័យបាន។ ដូច្នេះ ដើម្បីព្យាបាលអ្នកជំងឺញៀនថ្នាំឱ្យមានប្រសិទ្ធភាព គឺត្រូវការ:
- ការផ្តល់ប្រឹក្សា(Counseling)ពីអ្នកចិត្តសាស្ត្រ(Psychologist) ជំនាញជំងឺញៀនថ្នាំ។
- ការព្យាបាលគ្រួសារ(Family therapy)ដោយអ្នកចិត្តសាស្ត្រជំនាញព្យាបាលគ្រួសារ។
- ការដោះស្រាយបញ្ហាប្រឈមសង្គម ដូចជា: ការរើសអើង ការបណ្តុះបណ្តាលជំនាញវិជ្ជាជីវ: ឬមុខរបរ ... ដោយអ្នកសង្គមកិច្ច(Social worker)។
- ការព្យាបាលជំងឺផ្លូវចិត្ត និងជំងឺញៀនថ្នាំ ដោយគ្រូពេទ្យឯកទេសវិកលវិទ្យា(Psychiatrist)។
- កម្មវិធីស្តារនីតិសម្បទាផ្លូវចិត្ត។
- ការចូលរួមគាំទ្រផ្លូវចិត្តពីសហគមន៍ និងពីអជ្ញាធរមូលដ្ឋាន៕