អន្តរជាតិ
ជប៉ុន៖ បុរសចំណាស់ម្នាក់ ត្រូវចាប់ខ្លួន បន្ទាប់ពីហៅទូរសព្ទទៅក្រុមហ៊ុនសេវាទូរសព្ទជាងពីរម៉ឺនដង រូបភាព៖ Unsplash
× លោក Akitoshi Okamoto ជនជាតិជប៉ុនម្នាក់ វ័យ ៧១ឆ្នាំ ត្រូវបានប៉ូលិសចាប់ខ្លួន បន្ទាប់ពីទូរសព្ទទៅត្អូញត្អែរដាក់ក្រុមហ៊ុនសេវាកម្មទូរសព្ទចំនួន ២៤,០០០ដង។ ការទូរសព្ទដ៏ច្រើនដងបែបនេះ ត្រូវបានលោក Akitoshi Okamoto អះអាងថា ដោយសារក្រុមហ៊ុនសេវាទូរសព្ទបំពានមកលើលេខទូរសព្ទរបស់គាត់។ នេះបើតាមចុះផ្សាយរបស់ទីភ្នាក់ងារព័ត៌មាន AFP នៅថ្ងៃទី៣ ខែធ្នូ។
បើតាមប៉ូលិសទីក្រុងតូក្យូ បុរសវ័យ ៧១ឆ្នាំ Akitoshi Okamoto ត្រូវបានឃុំខ្លួនបណ្តោះអាសន្ន តាំងពីសប្តាហ៍មុន បន្ទាប់ពីបុរសរូបនេះ បានហៅទូរសព្ទទៅផ្នែកបំរើអតិថិជន នៃក្រុមហ៊ុនបំរើសេវាទូរសព្ទដ៏ធំរបស់ជប៉ុន KDDI។ ក្នុងករណីនេះ លោក Akitoshi Okamoto បានប្រើរយៈពេល ៨ថ្ងៃ និងហៅទូរសព្ទ ២៤,០០០ដង។
បើផ្អែកទៅតាមរបាយការណ៍ប្រព័ន្ធផ្សព្វផ្សាយរបស់ជប៉ុន បុរសវ័យ៧១ ឆ្នាំរូបនេះ បានប្រើប្រាស់ទូរសព្ទសាធារណៈ ដើម្បីផ្ញើសារជាសំឡេងមិនពេញចិត្តរបស់ខ្លួនទៅក្រុមហ៊ុន និងនិយាយពាក្យមិនសមរម្យជាមួយបុគ្គលបំរើសេវាអតិថិជន។ តាមការចុះផ្សាយរបស់ទីភ្នាក់ងារព័ត៌មាន AFP មន្ត្រីប៉ូលិសជប៉ុនបានអះអាងយ៉ាងដូច្នេះថា លោក Okamoto បានទាមទារឲ្យបុគ្គលិកក្រុមហ៊ុន KDDI សុំទោសរូបលោក ទាក់ទិនទៅនឹងការរំលោភបំពានលេខទូរសព្ទរបស់ខ្លួន។ បើតាមមន្ត្រីប៉ូលិល បុរស Okamoto បានធ្វើបែបនេះដដែលៗរហូតដល់ ២៤,០០០ដង។
បន្ទាប់ពីមានការហៅទូរសព្ទដ៏ច្រើនសន្ធឹកបែបនេះ ប៉ូលិសជប៉ុនបានចាប់ខ្លួនរូបលោកពីបទសង្ស័យ «ការរារាំង លើមុខជំនួញ»។
សូមបញ្ជាក់ថា ជប៉ុន មានអត្រាកើនឡើងនៃបញ្ហាសង្គមយ៉ាងច្រើន ដែលបង្កដោយការកើនឡើងនៃអត្រាប្រជាជនលើសអាយុ។ កន្លងទៅ អ្នកបើកបរជប៉ុនវ័យចំណាស់ម្នាក់ បានបង្កឲ្យមានគ្រោះថ្នាក់ចរាចរណ៍យ៉ាងធ្ងន់ធ្ងរ៕
© រក្សាសិទ្ធិដោយ thmeythmey.com