ការកើតចាស់ ឈឺ ស្លាប់ គឺជារឿងធម្មជាតិរបស់បុគ្គលគ្រប់ៗរូប ហើយគ្មានបុគ្គលណាម្នាក់អាចគេចផុតពីសេចក្តីស្លាប់បានដែរ។ ក្នុងឆ្នាំ២០១៩នេះ ពីអ្នកនយោបាយ ដល់អ្នកសិល្បករ រហូតដល់កីឡាករ និងអ្នកថតរូបជាច្រើន បានបាត់បង់ជីវិត។
ខាងក្រោមនេះ គឺជាបុគ្គលល្បីៗ ដែលបានទទួលមរណភាព៖
លោក Emiliano Sala
Emiliano Sala គឺជាកីឡាករបាល់ទាត់មួយរូប ដែលបានបាត់បង់ជីវិត ដោយសារតែការធ្លាក់យន្តហោះ នាថ្ងៃទី២១ ខែមករា។ កីឡាកររូបនេះ បានបាត់បង់ជីវិតនៅអាយុទើបតែ ២៨ឆ្នាំតែប៉ុណ្ណោះ។
លោក Virachai Plasai
លោក Virachai Plasai គឺជាមន្ត្រីការទូតជើងចាស់របស់ថៃ ដែលដើរតួនាទីសំខាន់ក្នុងសំណុំរឿងទាមទារប្រាសាទព្រះវិហារ បានទទួលបានមរណភាពនៅអាមេរិក។ អ្នកការទូតជើងចាស់រូបនេះ បានទទួលមរណភាព នៅអាយុ ៥៨ឆ្នាំ នាថ្ងៃទី១៦ ខែមីនា។
លោក Le Duc Anh
ឧត្តមសេនីយ៍ Le Duc Anh គឺជាអតីតប្រធានាធិបតីវៀតណាម ដឹកនាំដឹកនាំទ័ពវៀតណាមជួយប្រជាជនកម្ពុជាផ្តួលរំលំនៃរបបខ្មែរក្រហមនោះ បាត់បង់ជីវិតក្នុងអាយុ ៩៩ឆ្នាំ។ ឧត្តមសេនីយ៍រូបនេះ បានទទួលមរណភាពនៅថ្ងៃទី២៣ ខែមេសា។
លោក Hussain Muhammad Ershad
លោក Hussain Muhammad Ershad គឺជា អតីតប្រធានាធិបតី និងជាមេបញ្ជាការយោធាផ្តាច់ការបង់ក្លាដែស បានទទួលមរណភាពនៅថ្ងៃទី១៤ ខែកក្កដា ក្នុងអាយុ៨៩ឆ្នាំ ពោលគឺរយៈពេល១សប្តាហ៍ក្រោយ បញ្ជូនទៅព្យាបាលនៅមន្ទីរមួយនៅក្រុងដាក្កា។
លោក Li Peng
លោក Li Peng គឺជាអតីតនាយករដ្ឋមន្ត្រីចិន បានទទួលមរណភាព នៅអាយុ៩០ ឆ្នាំ នាថ្ងៃទី២៣ ខែកក្កដា។ លោក លី ផឹង ជាអតីតនាយករដ្ឋមន្ត្រីទី៤ចិន ចន្លោះពីឆ្នាំ១៩៨៧ ដល់ឆ្នាំ១៩៩៨។ ប៉ុន្តែគេមិនបានបញ្ជាក់ពីស្ថានភាពជំងឺរបស់អតីតនាយករដ្ឋមន្ត្រីចិនរូបនេះឡើយ ប៉ុន្តែកន្លងមក លោកធ្លាប់មានជំងឺមហារីកប្លោកនោម។
លោក Beji Caid Essebsi
លោក Beji Caid Essebsi គឺជាប្រធានាធិបតីទុយនីស៊ី បានស្លាប់ក្នុងអាយុ៩២ឆ្នាំ នៅថ្ងៃទី២៥ ខែកក្កដា ដោយសារស្ថានភាពជំងឺដ៏ធ្ងន់ធ្ងរ។ លោក Beji បានឡើងកាន់តំណែងជាប្រធានាធិបតី ក្រោយការបោះឆ្នោតនៅឆ្នាំ ២០១៤ រយៈពេលបីឆ្នាំ បន្ទាប់ពីអតីតមេដឹកនាំផ្តាច់ការ Zine El Abidine Ben Ali ត្រូវបានទម្លាក់ពីតំណែងក្នុងចលនាបដិវត្តន៍អារ៉ាប់ក្នុងឆ្នាំ ២០១១។
លោកស្រី Sushma Swaraj
លោកស្រី Sushma Swaraj គឺជាអតីតប្រមុខការទូតដ៏ចំណានរបស់ឥណ្ឌា និងជាសមាជិកជាន់ខ្ពស់របស់គណបក្សកាន់អំណាច Bharatiya Janata(BJP) បានទទួលមរណភាពនៅអាយុ៦៧ នាថ្ងៃទី ៦ខែសីហា។ លោកស្រី Swaraj បានទទួលមរណភាពដោយសាររោគគាំងបេះដូង បន្ទាប់ពីលោកស្រី ត្រូវបានគេបញ្ជូនចូលបន្ទប់សង្គ្រោះបន្ទាន់ នៅមន្ទីរពេទ្យទីក្រុងញូវដេលី។
លោក Charlie Cole
លោក Charlie Cole គឺជាអ្នកថតរូបដ៏ល្បីម្នាក់ ដែលបានថតយករូបបុរសម្នាក់ឈរនៅពីមុខរថក្រោះ ឬ«Tank Man» មុខ Tiananmen ប្រទេសចិន កាលពីឆ្នាំ ១៩៨៩។ លោក Charlie បានស្លាប់នៅអាយុ ៦៤ឆ្នាំ នៅថ្ងៃទី៥ ខែកញ្ញា។
លោក Robert Mugabe
លោក Robert Mugabe គឺជា អតីតប្រធានាធិបតីផ្តាច់ការស៊ីមបាវ៉េ បានទទួលមរណភាពក្នុងអាយុ៩៥ឆ្នាំនៅមន្ទីរពេទ្យប្រទេសសិង្ហបុរី។ លោក Mugabe បានទទួលមរណភាពនៅថ្ងៃទី ០៦ ខែកញ្ញា។
លោក Bacharuddin Jusuf Habibie
លោក Bacharuddin Jusuf Habibie គឺជាអតីតប្រធានាធិបតីឥណ្ឌូណេស៊ី បានទទួលមរណភាពនៅថ្ងៃទី ១១ ខែកញ្ញា។ អតីតប្រធានាធិបតីរូបនេះ បានទទួលមរណភាពនៅអាយុ៨៣ឆ្នាំ ក្រោយសំរាកព្យាបាលនៅពេទ្យយោធា ក្នុងរដ្ឋធានីហ្សាការតាអស់រយៈពេលជិតពីរសប្តាហ៍។
លោក Zine el-Abidine Ben Ali
លោក Zine el-Abidine Ben Ali គឺជាអតីតប្រធានាធិបតី ទុយនីស៊ី ដែលត្រូវបានប្រជាជនទម្លាក់ពីតំណែងក្នុងចលនាបដិវត្តន៍អារ៉ាប់ក្នុងឆ្នាំ ២០១១។ លោក Ben Ali បានទទួលមរណភាពនៅអាយុ ៨៣ឆ្នាំ ក្នុងស្ថានភាពនិរទេសនៅបរទេស។ អតីតប្រធានាធិបតី ទុយនីស៊ីរូបនេះ បានទទួលមរណភាពនៅថ្ងៃទី ១៩ ខែកញ្ញា។
លោក Jacques Chirac
លោក Jacques Chirac គឺជាអតីតប្រធានាធិបតីបារាំង បានទទួលមរណភាពក្នុងអាយុ ៨៦ឆ្នាំ។ ការស្លាប់របស់លោក ត្រូវបានប្រកាសដោយក្រុមគ្រួសាររបស់លោកផ្ទាល់នៅថ្ងៃទី២៦ ខែកញ្ញា។ លោក គឺជាប្រមុខរដ្ឋបារាំង ដែលបានកាន់តំណែងចន្លោះពីឆ្នាំ១៩៩៥ ដល់ឆ្នាំ២០០៧។
អាប៊ូ អាកើ អាល់-បាក់ដាឌី (Abu Bakr al-Baghdadi)
អាកើ អាល់-បាក់ដាឌី គឺជាមេដឹកនាំក្រុមរដ្ឋឥស្លាម ដែលចាត់ទុកជាជនមួយរូប ដែលអាមេរិកតាមចាប់ជាទីបំផុត។ មេដឹកនាំរូបនេះ បានបាត់បង់ជីវិតនៅអាយុ ៤៨ឆ្នាំ នៅថ្ងៃទី២៧ ខែតុលា បន្ទាប់ពីមានប្រតិបត្តិការយោធារបស់អាមេរិក នៅក្នុងប្រទេសស៊ីរី។ ប្រមុខក្រុមរដ្ឋឥស្លាម បានបំផ្ទុះគ្រាប់បែកសម្លាប់ខ្លួន និងកូនចំនួនបីនាក់ទៀតក្នុងរូងក្រោមមួយកន្លែងក្នុងទឹកដីស៊ីរី ខណៈរត់គេចពីប្រតិបត្តិការរបស់យោធាពិសេសអាមេរិក។
លោក Robert Norris
លោក Robert Norris ដែលមានរហស្សនាមថា «Marlboro Man» គឺជា តួអង្គក្នុងពាណិជ្ជកម្មបារីម៉ាល់បូរ៉ូដំបូងគេ បានទទួលមរណភាពក្នុងអាយុ៩០ឆ្នាំ កាលពីថ្ងៃទី៣ ខែវិច្ឆិកា។ ទោះបីជាយ៉ាងណាក៏ដោយ មរណភាពរបស់បុរសអាមេរិករូបនេះ មិនមែនបណ្តាលមកពីបារីនោះទេ ពីព្រោះលោកមិនធ្លាប់មានប្រវត្តិជក់បារីទាល់តែសោះ។
តារាចម្រៀង Kpop Goo Hara
អ្នកនាង Goo Hara គឺជាតារាចម្រៀងកូរ៉េខាងត្បូង ត្រូវបានមន្ត្រីប៉ូលិសរកឃើញថា បានបាត់បង់ជីវិតនៅក្នុងផ្ទះរបស់នាង នាទីក្រុងសេអ៊ូល នៅថ្ងៃទី ២៤ ខែវិច្ឆិកា។ ធ្លាប់ជាសមាជិកក្រុមដ៏ល្បី «Kara» តារា Goo Hara បានស្លាប់នៅអាយុ ២៨ឆ្នាំ។ ដោយឡែកមូលហេតុនៃការស្លាប់របស់នាង កំពុងស្ថិតក្រោមការស៊ើបអង្កេត។
តារាសម្តែងកូរ៉េ លោក Cha In-ha
លោក Cha In-ha គឺជា តារាសម្តែងកូរ៉េខាងត្បូងមួយរូប ដែលត្រូវបានគេរកឃើញថា បានបាត់បង់ជីវិត ក្នុងវ័យ ២៧ឆ្នាំ ក្នុងថ្ងៃទី ៣ ខែធ្នូ ឆ្នាំ ២០១៩។ ចំណែកមូលហេតុនៃការស្លាប់រកលោក មន្ត្រីប៉ូលីសនៅតែមិនទាន់រកមូលហេតុឃើញនៅឡើយទេ។
តារារ៉េបអាមេរិក Juice WRLD
លោក Juice WRLD គឺជាតារារ៉េបមួយរូប ដែលបានបាត់បង់ជីវិតនៅក្នុងមន្ទីពេទ្យមួយនៅអាមេរិក ក្រោយដួលប្រកាច់ និងឈាមហូរតាមមាត់ នៅអាកាសយានដ្ឋាន Midway International Airport ក្រុង Chicago កាលពីថ្ងៃទី៨ ខែធ្នូ។ ការស្លាប់របស់តារារ៉េបរូបនេះ គឺខ្វះតែ៦ថ្ងៃប៉ុណ្ណោះ ដែលជាខួបកំណើត ២១ឆ្នាំរបស់លោក។ ប៉ុន្តែក្រុមជំនាញត្រួតពិនិត្យវេជ្ជសាស្ត្រប្រចាំតំបន់ Cook County មិនបានបញ្ជាក់ពីមូលហេតុនៃការស្លាប់នេះឡើយ ៕