ជាតិ
×![]()
លិខិមិត្តអ្នកអាន
មែនទែនទៅ នៅក្នុងប្រទេសប្រជាធិបតេយ្យ សារព័ត៌មានត្រូវបានគេចាត់ទុកថា គឺជាស្ថាប័នឯករាជ្យអំណាចទី៤ក្នុងចំណោមអំណាចបីផ្សេងទៀត ដូចជា អំណាចនីតិបញ្ញត្តិ នីតិប្រតិបត្តិ និងនីតិវិនិច្ឆ័យ(អំណាចតុលាការ)។ 
សារព័ត៌មាន គឺជាអ្នកដៃគូអភិវឌ្ឍរបស់រដ្ឋាភិបាលផង និងជាឆ្មាំតាមដានគ្រប់សកម្មភាព ទាំងល្អ ទាំងអាក្រក់របស់រដ្ឋាភិបាលផង។ តាមទ្រឹស្តីសាមញ្ញ គេច្រើននិយាយថា សារព័ត៌មាន គឺជាកញ្ចក់ឆ្លុះបញ្ចាំងសង្គមពីក្រោមឡើងទៅលើ និងពីលើចុះមកក្រោមវិញ។ ក្នុងន័យម្យ៉ាងទៀត សារព័ត៌មាន មានតួនាទីតាមដាន និងត្រួតពិនិត្យការអនុវត្តកិច្ចការរបស់រដ្ឋមួយចំនួនដើម្បីផ្សព្វផ្សាយជូនពលរដ្ឋដែលជាម្ចាស់ឆ្នោត។
ក្នុងសេចក្តីព្រាងច្បាប់ស្តីពីសិទ្ធិទទួលព័ត៌មាន ពលរដ្ឋមានសិទ្ធិទទួលព័ត៌មានពីរដ្ឋាភិបាល រីឯ រដ្ឋាភិបាលវិញ មានកាតព្វកិច្ចត្រូវតែផ្តល់ព័ត៌មានជូនពលរដ្ឋ ជារឿយៗ តាមរយៈសារព័ត៌មាន។ បើទោះបីជាសារព័ត៌មានត្រូវបានគេចាត់ទុកថា ជាដៃគូអភិវឌ្ឍដ៏សំខាន់របស់រដ្ឋាភិបាលយ៉ាងណាក៏ដោយ ក៏ជារឿយៗ សារព័ត៌មាន និងរដ្ឋាភិបាល កម្រនឹងមានគំនិតស្របគ្នាណាស់នៅក្នុងសង្គមប្រជាជាធិបតេយ្យ។
នៅក្នុងសង្គមប្រជាធិបតេយ្យ សារព័ត៌មាន និងនិតិបញ្ញត្តិត្រូវបានគេមើលឃើញថា ជាដៃគូប្រកួតប្រជែងផ្នែកគំនិត តស៊ូមតិ និងជជែករកខុស-ត្រូវ។ មតិកាន់តែច្រើន កាន់តែល្អ។ អ្នកប្រជាធិបតេយ្យ ច្រើនឲ្យតម្លៃទៅលើមតិចម្រុះដោយពួកគេប្រៀបធៀបមតិចម្រុះទៅនឹងសួនច្បារដែលមានផ្កាចម្រុះច្រើនពណ៌។
ទោះបីជាសារព័ត៌មាន និងរដ្ឋាភិបាលច្រើនមានគំនិតផ្ទុយគ្នាយ៉ាងណាក៏ដោយ ប៉ុន្តែ ក្នុងគ្រាអាសន្ន គ្រាកលិយុគ ដូចព្រឹត្តិការណ៍មេរោគកូវីដ១៩នេះ តើសារព័ត៌មានគួរផ្សព្វផ្សាយតែព័ត៌មានជាន់ពន្លិចរដ្ឋាភិបាល? តើសារព័ត៌មាន គួរច្បិចយកតែចំណុចខ្សោយរបស់រដ្ឋាភិបាលក្នុងគ្រាអាសន្ននេះមកបរិហារ ឬវាយប្រហារ? តើសារព័ត៌មាន គួរសរសេជំរុញឲ្យមានភាពចលាចលក្នុងសង្គមកាន់តែខ្លាំង?
ឬក៏ត្រឡប់មកវិញ ក្នុងស្ថានការណ៍បែបនេះ សារព័ត៌មានគួរចូលរួមចំណែកជាមួយរដ្ឋាភិបាលក្នុងគ្រាអាសន្ននេះផ្សព្វផ្សាយព័ត៌មានណាដែលអាចកាត់បន្ថយភាពតានតឹង។ សារព័ត៌មានគួរចូលរួមផ្សព្វផ្សាយព័ត៌មានពិតប្រឆាំងនឹងព័ត៌មានក្លែងក្លាយ។ សារព័ត៌មានគួរចៀសវាងផ្សព្វផ្សាយដំណឹងដែលបង្កឲ្យមានការភ័ន្តច្រឡំដល់សាធារណជន។ល។
ផ្អែកលើសំណួរ និងគំនិតខាងលើនេះ, បើតាមយោបល់ខ្ញុំ ទោះបីសារព័ត៌មាន និងរដ្ឋាភិបាលច្រើនមានមតិផ្ទុយគ្នាក៏ដោយ ប៉ុន្តែ ក្នុងកាលៈទេសៈប្រឈមដូចករណីកូវីដ១៩នេះ សារព័ត៌មានជាក្រុមហ៊ុន ឬជាបុគ្គល(អ្នកលេងហ្វេសប៊ុក) គួរចូលរួមធ្វើសារអប់រំ ចូលរួមផ្សព្វផ្សាយព័ត៌មានដែលលើកទឹកចិត្តដល់ក្រុមការងារ ជាពិសេសគ្រូពេទ្យ លើកទឹកចិត្តដល់អ្នកប្រតិបត្តិគ្រប់ជាន់ថា្នក់ ផ្សព្វផ្សាយសរសើរដល់សប្បុរសជន ជាជាងផ្សព្វផ្សាយអត្ថបទដែលបង្កឲ្យមានសម្អប់ កំហឹង ឬហិង្សា។ ចាំចប់គ្រាអាសន្ននេះសិន ពេលនោះ សារព័ត៌មានអាចប្រើប្រាស់អំណាចរបស់ខ្លួនដើម្បីថ្លឹងតុល្យភាពអំណាចជាមួយរដ្ឋាភិបាលសម្រាប់ផលប្រយោជន៍មហាជនជាថ្មីឡើងវិញ។ ជាថ្មីម្តងទៀត ក្នុងគ្រាប្រឈម(កូវីដ១៩)នេះ សារព័ត៌មានជាក្រុមហ៊ុន ឬជាបុគ្គល(អ្នកលេងហ្វេសប៊ុក) គួរចៀសវាងការផ្សព្វផ្សាយណាដែលនាំឲ្យខាតបង់ដល់ជាតិ ឬនាំឲ្យជាតិបែកបាក់។ ចូរស្រឡាញ់គ្នាក្នុងគ្រាក្រ ជួយគ្នា ក្នុងគ្រាលំបាក(ប្រឈម)៕
លោក លឹម រតនា ពលរដ្ឋភ្នំពេញ
© រក្សាសិទ្ធិដោយ thmeythmey.com
