ជាតិ
នយោបាយជាតិ
លោក ហ៊ុន ម៉ាណែត ទៅជួបអ្នកគាំទ្រនៅអូស្ត្រាលី ដោយមិនបារម្ភពីបាតុកម្ម
× ភ្នំពេញ៖ លោក ហ៊ុន ម៉ាណែត កូនប្រុសច្បងរបស់នាយករដ្ឋមន្ត្រីកម្ពុជា បានដឹកនាំគណៈប្រតិភូមួយចំនួន ចាកចេញពីកម្ពុជា នៅព្រលប់ម៉ោង៦និង៣០នាទី នាថ្ងៃព្រហស្បតិ៍នេះ ឆ្ពោះទៅកាន់ប្រទេសអូស្ត្រាលី ដើម្បីជួបសំណេះសំណាលជាមួយអ្នកគាំទ្ររបស់ខ្លួន។ បន្ទាប់មក គណៈប្រតិភូនេះ នឹងបន្តទៅបំពេញបេសកកម្ម នៅប្រទេសញ៉ូហ្សេលែន ផងដែរ មុននឹងវិលត្រឡប់មកកម្ពុជាវិញ។
មុននឹងឡើងយន្តហោះ លោក ហ៊ុន ម៉ាណែត បានផ្តល់បទសម្ភាសខ្លីមួយ ដល់ក្រុមអ្នកសារព័ត៌មាន ជុំវិញគោលបំណងរបស់លោក ដែលទៅបំពេញបេសកកម្មនៅឯបរទេស។ លោក ប្រាប់អ្នកសារព័ត៌មានថា គោលបំណងនៃការបំពេញទស្សនកិច្ចលើកនេះ គឺដើម្បីជួបជុំប្រជាពលរដ្ឋកម្ពុជា ដែលកំពុងរស់នៅឯក្រៅប្រទេស។ ដំណើរទស្សនកិច្ចនេះ នឹងផ្តល់ឱកាសដល់លោក ហ៊ុន ម៉ាណែត និងប្រជាពលរដ្ឋនៅឯបរទេស បានឈ្វេងយល់ព័ត៌មានជាមួយគ្នា ទាក់ទងនឹងបញ្ហាប្រទេសជាតិ។
ក្រៅពីបង្ហាញគោលបំណងនៃការទៅបំពេញបេសកកម្មរួចហើយ លោក ហ៊ុន ម៉ាណែត ក៏បានអះអាងថា ពលរដ្ឋខ្មែរមួយចំនួន ដែលកំពុងរស់នៅក្នុងប្រទេសអូស្ត្រាលី បានចេញមុខព្រមានធ្វើបាតុកម្ម ដើម្បីប្រឆាំងនឹងវត្តមានរបស់លោក នៅពេលដែលគណៈប្រតិភូទៅដល់ទីនោះ។ បើទោះបីជាមានគម្រោងបាតុកម្មមែនក៏ដោយចុះ ក៏លោក ហ៊ុន ម៉ាណែត មិនព្រួយបារម្ភដែរ។ លោកអះអាងថា ការធ្វើបាតុកម្មប្រឆាំងនឹងរូបលោកនេះ មិនមែនរឿងថ្មីនោះទេ តួយ៉ាងដូចជាប្រជាពលរដ្ឋខ្មែរដែលរស់នៅក្នុងសហរដ្ឋអាមេរិក ក៏ធ្លាប់ធ្វើបាតុកម្មប្រឆាំងនឹងលោកដែរ ក្នុងអំឡុងពេលដែលលោក កំពុងបំពេញទស្សនកិច្ចនៅទីនោះ កាលពីប៉ុន្មានខែមុន។
យ៉ាងណាក៏ដោយ លោក ហ៊ុន ម៉ាណែត មិនមានទុទិដ្ឋិនិយម ចំពោះប្រជាពលរដ្ឋ ដែលត្រៀមធ្វើបាតុកម្មប្រឆាំងនឹងលោក នោះទេ។ លោក ហ៊ុន ម៉ាណែត បានចាត់ទុកថា ការធ្វើបាតុកម្ម គឺជាសិទ្ធិរបស់ប្រជាពលរដ្ឋ។ តែលោក នៅតែស្នើឲ្យប្រជាពលរដ្ឋ ធ្វើបាតុកម្មឲ្យសមស្របទៅតាមច្បាប់ និងគោរពសិទ្ធិគ្នាទៅវិញទៅមក បើពុំដូច្នេះទេពួកគេ ប្រាកដជាប្រឈមមុខនឹងផ្លូវច្បាប់របស់ប្រទេសអូស្រា្តលីជាមិនខាន។
លោក ហ៊ុន ម៉ាណែត សង្កត់ធ្ងន់ៗបែបនេះថា៖«ខ្ញុំសូមបញ្ជាក់ ការរៀបចំធ្វើបាតុកម្មនេះ មិនមែនធ្វើឡើងដោយចៃដន្យទេ គឺមានការរៀបចំច្បាស់លាស់ ហើយអម្បាញ់មិញនេះ ក៏មានលោកពូម្នាក់នៅអូស្រា្តលី គាត់បានចេញមកហើយ គាត់ថាគាត់បានត្រៀមលក្ខណ ដើម្បីរៀបចំធ្វើបាតុកម្ម។ […..] តែខ្ញុំអត់ (ព្រួយបារម្ភ) ទេ ព្រោះខ្ញុំធ្លាប់ហើយ មិនមែនជាលើកទីមួយទេ ព្រោះយើងកាលនៅអាមេរិក ក៏មាន (បាតុកម្ម) ច្រើនហើយដែរ»។
សូមបញ្ជាក់ថា ប្រជាពលរដ្ឋខ្មែរមួយចំនួនដែលដឹកនាំដោយលោក ហុង លីម តំណារាស្ត្រអូស្ត្រាលីដើមកំណើតខ្មែរ ព្រមានធ្វើបាតុកម្មប្រឆាំងនឹងវត្តមានលោក ហ៊ុន ម៉ាណែត នៅក្នុងទឹកដីអូស្ត្រាលី។ ពួកគេប្រឆាំងវត្តមានលោក ហ៊ុន ម៉ាណែត ក្រោមហេតុផលថា កូនប្រុសរបស់សម្តេចនាយករដ្ឋមន្ត្រីរូបនេះ ទៅធ្វើពិធីសប្បាយរីករាយផឹកស៊ីនៅអូស្ត្រាលី ចំពេលដែលប្រជាពលរដ្ឋខ្មែរមួយចំនួននៅអូស្ត្រាលីកំពុងធ្វើបុណ្យកាន់ទុក្ខ១០០ ថ្ងៃលោកបណ្ឌិត កែម ឡី។
គួររម្លឹកថា នេះជាលើកទីពីរហើយ ដែលលោក ហ៊ុន ម៉ាណែត ដឹកនាំគណៈប្រតិភូ ទៅជួបប្រជាពលរដ្ឋ នៅឯបរទេស។ កាលពីប៉ុន្មានខែមុន លោកបានដឹកនាំគណៈប្រតិភូ ទៅបំពេញទស្សកិច្ចនៅតាមបណ្តាប្រទេសមួយចំនួន ដូចជាសហរដ្ឋអាមេរិកជាដើម៕
© រក្សាសិទ្ធិដោយ thmeythmey.com