លោក ហ៊ុន សុធា ស្ថាបត្យករវ័យក្មេងនៅ សសរ ស្ថាបត្យកម្ម បានលើកឡើងថា «ដើម្បីជំរុញដល់ការអភិវឌ្ឍនៃវិស័យស្ថាបត្យកម្មនៅកម្ពុជាឱ្យកាន់តែមានភាពជឿនលឿនទៅមុខ ស្ថាបត្យករគ្រប់រូបចាំបាច់ត្រូវមានគំនិតច្នៃប្រឌិតថ្មីៗ បន្ថែមទៀត។»
ដើម្បីអាចរក្សាបានការប្រកួតប្រជែងនៅក្នុងទីផ្សារ ក្រុមហ៊ុនស្ថាបត្យកម្ម និងរចនាផ្នែកខាងក្នុងជាច្រើន បាននឹងកំពុងពឹងផ្អែកទាំងស្រុងទៅលើធនធានមនុស្ស ដែលមានទេពកោសល្យ ហើយវាពិតសំខាន់ណាស់ ដែលស្ថាបត្យករទាំងអស់គប្បីបន្តពង្រឹងសមត្ថភាព និងភាពច្នៃប្រឌិតឱ្យកាន់ខ្លាំងថែមទៀត ដើម្បីឱ្យពួកគេអាចបង្កើតស្ថាបត្យកម្មប្រកបដោយគុណភាពខ្ពស់ និងភាពទាក់ទាញ។
ដូច្នេះថ្ងៃនេះ អ្នកយកសារព័ត៌មានថ្មីៗ មានកិច្ចពិភាក្សាមួយជាមួយ លោក ហ៊ុន សុធា ដែលជាស្ថាបត្យករវ័យក្មេងនៅក្រុមហ៊ុន សសរ ស្ថាបត្យកម្ម ដើម្បីពិភាក្សាបន្ថែមលើវិធីសាស្ត្រក្នុងការពង្រឹងជំនាញ និងចំណេះដឹងរបស់ស្ថាបត្យករសម្រាប់តម្រូវការទីផ្សារ ដើម្បីឱ្យពួកគេអាចមានសមត្ថភាពប្រកួតប្រជែងសម្រាប់អាជីពនាពេលអនាគតរបស់ពួកគេ។
សូមទស្សនាកិច្ចពិក្សារ លោក ហ៊ុន សុធា ដែលជាស្ថាបត្យករវ័យក្មេងនៅក្រុមហ៊ុន សសរ ស្ថាបត្យកម្ម ជាមួយសារព័ត៌មានថ្មីៗដូចតទៅ៖
សារព័ត៌មានថ្មីៗ៖ ក្រៅពីជំនាញ និងចំណេះដឹងនៅសាលា តើមានទេពកោសល្យអ្វីខ្លះទៀតសម្រាប់អ្នក ដែលចង់ក្លាយជាស្ថាបត្យករមួយរូប?
លោក ហ៊ុន សុធា៖ ក្នុងនាមជាស្ថាបត្យករមួយរូប លោក ហ៊ុន សុធា ស្ថាបត្យករវ័យក្មេងនៅ សសរ ស្ថាបត្យកម្ម គិតថាដើម្បីក្លាយជាស្ថាបត្យករដ៏ឆ្នើមមួយរូប ដំបូងយើងគួរតែមានគំនិតសិល្បៈមួយចំនួន ដើម្បីបញ្ចូលទស្សនៈសិល្បៈ វប្បធម៌ និងវិទ្យាសាស្ត្រជាមួយគ្នា ដើម្បីលើកកម្ពស់វិស័យស្ថាបត្យកម្មឱ្យកាន់តែអស្ចារ្យ។
សំខាន់ជាងនេះទៅទៀត ជាស្ថាបត្យករមួយរូបក៏គួរមានជំនាញទន់នៅក្នុងខ្លួនខ្លះដូចជា៖ ភាពក្លាហាន ការគ្រប់គ្រង និងភាពជាអ្នកដឹកនាំ ដើម្បីធ្វើការបានល្អក្នុងចំណោមក្រុមការងារ និងជាមួយមនុស្សផ្សេងៗទៀត ដូចដែរយើងបានដឹងហើយថាជាស្ថាបត្យករមួយរូបតែងតែជួបប្រទះស្ថានភាពគ្រប់បែបយ៉ាង និងបញ្ហាជាច្រើនដែលនឹកស្មានមិនដល់។ ដូច្នេះជំនាញទាំងនេះនឹងជួយឱ្យពួកគេដឹងពីរបៀបក្នុងការគ្រប់គ្រងគម្រោងនីមួយៗ ដោយជោគជ័យសម្រាប់អតិថិជនរបស់ពួកគេយ៉ាងរលូន។
សារព័ត៌មានថ្មីៗ៖ តើ សុធា មានជាមតិយោបល់អ្វីខ្លះសម្រាប់ការអភិវឌ្ឍក្នុងវិស័យស្ថាបត្យកម្ម?
លោក ហ៊ុន សុធា៖ ដើម្បីទទួលបានការអភិវឌ្ឍប្រកបដោយភាពច្នៃប្រឌិតនៅក្នុងវិស័យស្ថាបត្យកម្មនៅកម្ពុជា ជាដំបូងខ្ញុំចង់លើកទឹកចិត្តដល់ស្ថាបត្យករវ័យក្មេងគ្រប់ៗរូបឱ្យស្វែងរកឱកាស ដើម្បីពង្រឹងជំនាញ និងចំណេះដឹងរបស់ពួកគេដោយចូលរួមក្នុងការប្រកួតប្រជែងទាំងថ្នាក់ជាតិ និងអន្តរជាតិ។ លោក សុធាបានបន្តទៀតថា៖ «ជាមួយនឹងបទពិសោធប្រកួតប្រជែងបែបនេះ វាអាចឱ្យពួកគេពង្រីកចំណេះដឹង និងទទួលបានផលប័ត្រកាន់តែច្រើនសម្រាប់អាជីពនាពេលអនាគតរបស់ពួកគេ»។
លើសពីនេះទៅទៀត នេះជាឱកាសល្អសម្រាប់ស្ថាបត្យករខ្មែរគ្រប់ៗរូបដើម្បីបង្ហាញសមត្ថភាព ទៅកាន់ពិភពលោក។ ដូច្នេះខ្ញុំជឿជាក់ថាវានឹងប្រសើរប្រសិនបើយើងមានការប្រកួតប្រជែងថ្នាក់ជាតិនៅក្នុងប្រទេសរបស់យើង ហើយបន្ទាប់មកយើងដុះខាត់ជំនាញ និងចំណេះដឹងបន្ថែម ដើម្បីត្រៀមខ្លួនសម្រាប់ការប្រកួតអន្តរជាតិ ពីព្រោះវានឹងផ្តល់ឱកាសកាន់តែច្រើនសម្រាប់ស្ថាបត្យករដែលមានទេពកោសល្យនៅកម្ពុជា។ សុធា បានបន្ថែមថា៖«តាមរយៈការប្រកួតប្រជែងបែបនេះ អាចនឹងមានការផ្លាស់ប្តូរដ៏ធំមួយសម្រាប់វិស័យស្ថាបត្យកម្មទាំងបច្ចុប្បន្ន និងអនាគត»។
តាមរយៈការពង្រឹងធនធានមនុស្សក្នុងផ្នែកស្ថាបត្យកម្ម លោក សុធា ជឿជាក់យ៉ាងមុតមាំថាយើងនឹងឃើញស្ថាបត្យករកម្ពុជាដឹកនាំគម្រោងស្ថាបត្យកម្មធំ ៗ នាពេលអនាគតបានច្រើន ព្រោះបច្ចុប្បន្នយើងឃើញតែស្ថាបត្យករបរទេស ដែលកំពុងគ្រប់គ្រងគម្រោងទាំងនោះ។
សារព័ត៌មានថ្មីៗ៖ តើអ្វីជាក្តីរំពឹងរបស់ សុធា ចំពោះវិស័យស្ថាបត្យកម្មនៅកម្ពុជានាពេលអនាគត?
លោក ហ៊ុន សុធា៖ ជាការកត់សម្គាល់ឃើញថាប្រទេសកម្ពុជាជាប្រទេសកំពុងអភិវឌ្ឍន៍ ដែលជាឱកាសល្អសម្រាប់ការអភិវឌ្ឍនៃវិស័យមួយចំនួនផងដែរ។ ដូច្នេះខ្ញុំគិតថាស្ថាបត្យកម្មនៅកម្ពុជានឹងមានការរីកចម្រើន ជឿនលឿនទៅមុខនាពេលអនាគត ដើម្បីសម្រេចបានគោលដៅនេះ ស្ថាបត្យករគ្រប់រូបចាំបាច់ត្រូវមានគំនិតច្នៃប្រឌិតថ្មីៗបន្ថែមទៀត។
លោក សុធា បានផ្តាំដូច្នេះថា៖ «ខ្ញុំសូមលើកទឹកចិត្តយ៉ាងខ្លាំងដល់ស្ថាបត្យករគ្រប់ៗ រូបឱ្យបន្តចែករំលែកចំណេះដឹងបន្ថែម និងយកចិត្តទុកដាក់លើគម្រោងស្ថាបត្យកម្មអន្តរជាតិពីប្រទេសអភិវឌ្ឍន៍ ដើម្បីភាពរីកចម្រើនក្នុងវិស័យស្ថាបត្យកម្មក្នុងប្រទេសកម្ពុជា។ លោក សុធា ក៏បានកត់សម្គាល់ថា ឥឡូវនេះយើងអាចមើលឃើញ [ទេពកោសល្យ] ពីនិស្សិតកម្ពុជាជាមួយនឹងគំនិតច្នៃប្រឌិត និងសក្តានុពល។ ទោះយ៉ាងណាក៏ដោយ អ្វីដែលសំខាន់ គឺត្រូវដឹងពីវិធីសាងសង់ស្ពានដើម្បីឈានទៅដល់ការរីកចម្រើនផ្នែកស្ថាបត្យកម្មនៅកម្ពុជា»៕
(អត្ថបទពាណិជ្ជកម្ម)