វីរុសបំប្លែងខ្លួនទម្រង់ដែលតា គឺជាវីរុសថ្មីមួយបង្កជាជំងឺកូវីដ-១៩ ដែលបានប្តូរពីទម្រង់ដើម និងត្រូវបានរកឃើញដំបូងនៅឥណ្ឌា ក្នុងខែធ្នូ ឆ្នាំ២០២០។ វីរុសបំប្លែងខ្លួន ដែលតា មានសមត្ថភាពឆ្លងលឿនជាងវីរុសទម្រង់ដើម និងមិនទាន់មានវ៉ាក់សាំង អាចបង្ការបាន ១០០ភាគរយនៅឡើយទេ។ នៅលើទំព័រសុខភាពរបស់មន្ទីរពេទ្យ Yale បានបង្ហាញ ៥ ចំនុច ដើម្បីឱ្យអ្នកដឹងអំពីវីរុសបំប្លែងថ្មី ទម្រង់ដែលតា។
១. ងាយឆ្លងជាងវីរុសបង្កជាជំងឺកូវីដ-១៩ ទម្រង់ដទៃ
ជំងឺកូវីដ-១៩ បង្កដោយវីរុសទម្រង់ដែលតា ត្រូវបានគេកំណត់អត្តសញ្ញាណដំបូង ក្នុងខែធ្នូឆ្នាំ ២០២០ នៅឥណ្ឌា និងបានរីកសាយយ៉ាងឆាប់រហ័សនៅលើពិភពលោក។ គិតត្រឹមចុងខែកក្កដាឆ្នាំ ២០២១ វីរុស ដែលតា បានឆ្លងរាលដាល ដល់ជាង ១០០ប្រទេសហើយ ដោយក្នុងនោះរួមទាំងកម្ពុជាផង។ មជ្ឈមណ្ឌលគ្រប់គ្រង និងការពារជំងឺឆ្លងអាមេរិក (CDC) បានពិពណ៌នាវីរុសបំប្លែងថ្មី ទម្រង់ដែលតា ថាវាមានសមត្ថភាពឆ្លងរហ័សជាងជំងឺផ្តាសាយធំ ក៏ដូចជាវីរុសដែលបណ្តាលឱ្យកើតជំងឺអុតតូច, ជំងឺ SARS និង Ebola ទៅទៀត។ នេះបើតាមការរាយការណ៍នៅក្នុងកាសែត The New York Times។
២. អ្នកមិនចាក់វ៉ាក់សាំងនឹងប្រឈមហានិភ័យខ្ពស់ក្នុងការឆ្លងវីរុស ទម្រង់ដែលតា
អ្នកដែលមិនបានចាក់វ៉ាក់សាំងការពារជំងឺកូវីដ-១៩ មានហានិភ័យខ្ពស់បំផុត ក្នុងការឆ្លងវីរុសបំប្លែងខ្លួនទម្រង់ដែលតា។ កុមារ និងក្មេងជំទង់ គឺជាកង្វល់ដ៏ធំព្រោះបច្ចុប្បន្ននេះ ព្រោះអ្នកទាំងនោះមិនទាន់មានវ៉ាក់សាំង ត្រូវបានអនុម័តសម្រាប់កុមារអាយុពី ៥ ទៅ ១២ឆ្នាំឡើយ។ ការសិក្សាថ្មីរបស់អង់គ្លេសបានបង្ហាញថា កុមារ និងមនុស្សពេញវ័យដែលមានអាយុក្រោម ៥០ឆ្នាំ មានលទ្ធភាពឆ្លងវីរុសដែលតាខ្លាំងជាងមនុស្សចាស់ ២,៥ដង។ វេជ្ជបណ្ឌិតឯកទេសជំងឺឆ្លង និងវ៉ាក់សាំងកុមារនៃមន្ទីរពេទ្យ Yale លោកស្រី Inci Yildirim បានលើកឡើងបែបនេះ។
៣. វីរុសទម្រង់ដែលតា មានអត្រាឆ្លងខ្ពស់ និងងាយឆ្លងជាសហគមន៍
វីរុសទម្រង់ដែលតា អាចឆ្លងយ៉ាងរហ័សពីមនុស្សម្នាក់ទៅមនុស្សម្នាក់ទៀត។ ដូច្នេះវានឹងធ្វើឱ្យមានការប្រឈមខ្លាំង ក្នុងការរីកសាយចូលទៅក្នុងសហគមន៍។ វាក៏អាស្រ័យលើប្រជាជនតាមតំបន់ ដែលបានចាក់វ៉ាក់សាំងពេញលេញផងដែរ។ បើមិនដូច្នោះទេ វីរុសទម្រង់ដែលតា នឹងផ្ទុះឡើងនៅក្នុងសហគមន៍ និងទូទាំងប្រទេស បានយ៉ាងងាយ និងឆាប់រហ័សបំផុត ហើយពេលនោះស្ថានភាពនឹងកាន់តែពិបាក ដោយមិនអាចគ្រប់គ្រងអ្នកជំងឺបាន។
៤. ការចាក់វ៉ាក់សាំងគឺជាវិធីការពារដ៏ល្អបំផុតប្រឆាំងនឹងវីរុស ដែលតា
នៅពេលនេះ អ្វីសំខាន់បំផុត ដើម្បីការពារខ្លួនពីវីរុសទម្រង់ដែលតា គឺត្រូវចាក់វ៉ាក់សាំងបង្ការជំងឺកូវីដ-១៩ ឱ្យបានពេញលេញ។ យ៉ាងណាមិញ សម្រាប់អ្នកមានបញ្ហាសុខភាព ឬមិនមានលក្ខខណ្ឌសមស្របនឹងការចាក់វ៉ាក់សាំង ត្រូវគោរពតាមការណែនាំរបស់ CDC ឬក្រសួងសុខាភិបាល ដូចជាពាក់ម៉ាស់ រក្សាគម្លាតសុវត្ថិភាព និងធ្វើអនាម័យឱ្យបានល្អជាដើម។ ម្យ៉ាងវិញទៀត អង្គការសុខភាពពិភពលោក (WHO) បានលើកទឹកចិត្តឱ្យគ្រប់គ្នាពាក់ម៉ាស់ បើទោះជាបានចាក់វ៉ាក់សាំងពេញលេញ និងស្ថិតក្នុងចំណោមមនុស្សដែលបានចាក់វ៉ាក់សាំងហើយដូចគ្នាក៏ដោយ។
៥. មានបញ្ហាច្រើនទៀតត្រូវសិក្សាអំពីវីរុស ដែលតា
មកដល់ពេលនេះ អ្នកស្រាវជ្រាវនៅមិនទាន់សិក្សាអស់នៅឡើយទេអំពីវីរុសបំប្លែងខ្លួនដែលតា។ នៅមានចម្ងល់ជាច្រើនមិនទាន់ស្រាយរួចដូចជា តើវីរុសបំប្លែងខ្លួនដែលតា នឹងធ្វើឱ្យមនុស្សរងផលប៉ះពាល់ខ្លាំងជាងវីរុសដើមឬយ៉ាងណា? តើវីរុសដែលតាផ្តល់ផលប៉ះពាល់ដល់រាងកាយយ៉ាងដូចម្តេច? លើសពីនេះ ក៏មានការព្រួយបារម្ភអំពីវីរុសបំប្លែងខ្លួនទម្រង់ ដែលតាបូក ដែលកំពុងត្រូវការទិន្នន័យបន្ថែម ដើម្បីកំណត់សមត្ថភាពរាលដាល និងផលប៉ះពាល់នៃវីរុសទម្រង់ថ្មីនេះផងដែរ៕