អំឡុងទស្សនកិច្ចនៅទីក្រុងហាណូយ រដ្ឋមន្រ្តីការពារជាតិជប៉ុន គីស៊ី ណូបុ បានជួបជាមួយនាយករដ្ឋមន្រ្តីវៀតណាម ផាម មិញឈិញ នៅថ្ងៃទី១២ ខែកញ្ញា។ លោក ឈិញ ក៏ប្រាប់លោក គីស៊ី ពីជំហររបស់វៀតណាមដែលចាត់ទុកជប៉ុនជាដៃគូដ៏សំខាន់មួយរបស់ខ្លួន។

 

បើតាមការផ្សាយរបស់កាសែត Vietnam News ប្រមុខរដ្ឋាភិបាលវៀតណាមអះអាងថា ចាប់តាំងពីបក្ស រដ្ឋាភិបាល និងប្រជាជនវៀតណាមផង ផ្ដល់ការជឿជាក់លើជប៉ុនក្នុងគោលនយោបាយការបរទេសរបស់ខ្លួន។ លោក ឈិញ បញ្ជាក់ថា វៀតណាមស្វាគមន៍ចំពោះការចូលរួមចំណែកយ៉ាងសកម្ម របស់ជប៉ុន និងគាំទ្រជប៉ុនក្នុងការរក្សាសន្តិភាព ស្ថិរភាព និងការអភិវឌ្ឍនៅក្នុងតំបន់ និង ពិភពលោកទាំងមូល។

 

បន្ថែមពីនេះទៅទៀត នាយករដ្ឋមន្រ្តីវៀតណាម ក៏អរគុណចំពោះជប៉ុនដែលបានផ្តល់វ៉ាក់សាំងជាង៣ លានដូសដើម្បីប្រយុទ្ធនឹងជំងឺកូវីដ-១៩ ដល់វៀតណាម និងការសម្រួលដល់ប្រជាជនវៀតណាម ដែលកំពុងធ្វើការនិងរស់នៅជប៉ុន។ លោក ឈិញ បានសុំឱ្យជប៉ុនជួយវ៉ាក់សាំងបន្ថែមទៀត និងបន្ត ផ្តល់ជំនួយអភិវឌ្ឍន៍ផ្លូវការដល់វៀតណាមទៀត។ 

 

មេដឹកនាំវៀតណាមរូបនេះ សន្យាថា វៀតណាមនឹងបន្តបង្កើតភាពងាយស្រួល និងតម្លាភាពដល់ការ វិនិយោគរបស់បរទេសរួមទាំងប្រជាជនជប៉ុនផងដែរនៅក្នុងប្រទេសខ្លួន។

 

លោក គីស៊ី វិញ បានកោតសរសើរការខិតខំប្រឹងប្រែងរបស់រដ្ឋាភិបាលវៀតណាមក្នុងការប្រយុទ្ធ ប្រឆាំងនឹងជំងឺកូវីដ-១៩ និងបានបញ្ជាក់ថា លោកនឹងស្នើទៅអាជ្ញាធរពាក់ព័ន្ធឱ្យបន្តជំនួយដល់ វៀតណាម។ លើសពីនោះ ទីក្រុងតូក្យូ នឹងបន្តសហការជាមួយទីក្រុងហាណូយក្នុងវិស័យអាទិភាព របស់វៀតណាម៕