លោក​ Pere Aragones ប្រធានតំបន់ Catalonia បាននិយាយក្នុងសិន្និសីទសារព័ត៏មាន នាថ្ងៃទី១២ តុលា ថា រាល់កីឡដ្ឋានទាំងអស់ក្នុងតំបន់ នឹងត្រូវបើកឲ្យមានអ្នកចូលទស្សនាពេញ១០០ភាគរយឡើងវិញ។ «ហើយសម្រាប់ដំណើរការរបស់ក្លិប Barcelona ពួកយើងក៏ទទួលស្វាគមន៍ដូចគ្នាសម្រាប់អនុញ្ញាតិទៅដល់ក្លិបពួកគេ»។
នេះបើតាមលោក​ Pere Aragones។

ជាការឆ្នើយតបទៅនឹងការប្រកាសពីសំណាក់រដ្ឋបាលក្នុងតំបន់ ក្លិប Barcelona ក៏បានផ្ញើសារអរគុណទៅកាន់ការសម្រេចចិត្តរបស់រដ្ឋបាល Catalonia ដែលបានផ្តល់ការលើកលែងដល់ការចូលទស្សនារបស់អ្នកគាំទ្រក្លិបជាធម្មតាឡើងវិញទៀតផង។ ក្រុម Barcelona ត្រូវបានប្រកួតដោយមិនមានអ្នកចូលទស្សនាឡើយ តាំងពីខែមីនាឆ្នាំ ២០២០មកដោយសារវិបត្តិកូវីដ-១៩។
 

ក្នុងការប្រកួតរវាងក្រុមម្ចាស់ផ្ទះ Barcelona ត្រូវស្វាគមន៍ក្រុមភ្ញៀវ Valencia នាថ្ងៃទី១៨ខែតុលា អាចនឹងមានអ្នកចូលទស្សនាប្រមាណ ៩៩,៣៥៤នាក់ រួមទាំងការប្រកួត El Clasico រវាងក្រុមដែលដឹកនាំដោយលោក Ronald Koeman ស្វាគមន៍ក្រុម Real Madrid នាថ្ងៃទី ២៤ ខែតុលា ក៏នឹងអាចមានអ្នកចូលទស្សនាបានប្រហាក់ប្រហែលគ្នានេះដែរ។
 

ប៉ុន្តែបើទោះជាទទួលបានការអនុញ្ញាតិពីសំណាក់រដ្ឋបាលកណ្តាលរបស់អេស៉្បាញក្តី ក៏ក្លិប Barcelona ជ្រើសរើសឲ្យមានចំនួនអ្នកចូលទស្សនាបានត្រឹមតែប្រមាណ ៦០ ភាគរយនៅឡើយ៕