ភ្នំពេញ៖ សារមន្ទីរជាតិបានវេចខ្ចប់រូបសិល្បៈចំនួន៨ ដើម្បីយកទៅតាំងពិព័រណ៍នៅសហរដ្ឋអាម៉េរិក តបតាមការស្នើសុំរបស់សារមន្ទីរសិល្បៈក្លេវើឡេន នៃរដ្ឋអូហៃយ៉ូ សហរដ្ឋអាម៉េរិក។ ការតាំងពិព័រណ៍នោះ មានចំណងជើងថា Revealing Krishna: Journey to Cambodia’s Sacred Mountain ដែលនឹងរៀបចំឡើងពីថ្ងៃទី១៤ ខែវិច្ឆិកា ឆ្នាំ២០២១ រហូតដល់ថ្ងៃទី២៣ ខែមករា ឆ្នាំ២០២២។
លោក ឆាយ វិសុទ្ធ ប្រធាននាយកដ្ឋានសារមន្ទីរជាតិភ្នំពេញ បានប្រាប់សារព័ត៌មានថ្មីៗថា ការខ្ចីរូបទៅតាំងពិព័រណ៍ ដែលជាការស្នើសុំរបស់សារមន្ទីរនៅអាម៉េរិកនោះ ជាឱកាសនៃការផ្សព្វផ្សាយពីសិល្បៈដ៏អស្ចារ្យរបស់ខ្មែរ ពិសេសសិល្បៈសម័យភ្នំដា ដែលជាសម័យមុនអង្គរ។ បន្ថែមពីនោះ ជាឱកាសមួយនៃការភ្ជាប់ទំនាក់ទំនង រវាងសារមន្ទីរសិល្បៈក្លេវើឡេន ជាមួយសារមន្ទីរជាតិកម្ពុជា ដើម្បីធ្វើការងាររួមគ្នាទៅថ្ងៃមុខទៀត។ ជាងនោះទៅទៀត លោក វិសុទ្ធ ថានេះជាផ្នែកមួយដែលសារមន្ទីរទាំងពីរ បានរៀនសូត្រពីគ្នាសម្រាប់ការងារវេចខ្ចប់។
រូបពីសារមន្ទីរជាតិកម្ពុជា
លោក វិសុទ្ធ បញ្ជាក់៖«យើងរំពឹងថាថ្ងៃក្រោយ យើងអាចនឹងមានការងារច្រើន ដែលត្រូវធ្វើជាមួយគ្នាបន្តទៀត។ គេអាចមានលទ្ធភាពប្រគល់រូបអ្វីផ្សេងទៀត មកដល់យើងក៏ថាមិនបាន។ តែនេះជាច្រកមួយ ដែលយើងកំពុងពង្រឹង។ វត្ថុទាំងនោះមានទំហំធំ ពិសេសស្នានទ្រោណី ដោយមានទំងន់ដល់ទៅរាប់តោន ដែលកម្រមានអ្នកខ្ចីយកទៅតាំងពិព័រណ៍ណាស់»។
ប្រធាននាយកដ្ឋានសារមន្ទីររូបនេះបន្ថែមទៀតថា ខាងសារមន្ទីរនៅសហរដ្ឋអាម៉េរិក ស្នើសុំរូបមុនសម័យអង្គរ ដោយសារតែទាក់ទងនឹងបំណែកមួយចំនួន ដែលខាងសារមន្ទីរ ធ្លាប់ប្រគល់មកឱ្យកម្ពុជា។
រូបពីសារមន្ទីរជាតិកម្ពុជា
«បំណែកជើងនៅគេ ហើយរូបនៅយើង។ ដូច្នេះគេក៏ចង់ផ្សព្វផ្សាយពីសិល្បៈក្នុងសម័យកាលនោះ ដោយភាគច្រើនទាក់ទងនឹងព្រះនារាយណ៍។ កន្លងមកគេធ្លាប់បានប្រគល់រូបមួយចំនួនមកស្រុកខ្មែរវិញ»។ នេះជាការពន្យល់របស់លោក វិសុទ្ធ។
សមុច្ច័យទាំង៨នោះរួមមាន លិង្គមកពីសារមន្ទីរអង្គរបុរី នៃខេត្តតាកែវ។ ដោយឡែករូបនាងទុគ៌ា ព្រះនារាយណ៍ ព្រះក្រឹស្ណៈទ្រភ្នំគោវធ៌ន ព្រះពុទ្ធទ្រង់អភ័យមុទ្រា ស្នានទ្រោណី ពលរាម និងដងខ្លួនព្រះក្រឹស្ណៈទ្រភ្នំគោវធ៌ន នៅសារមន្ទីរជាតិផ្ទាល់តែម្ដង។
ដំណើរការនៃការវេចខ្ចប់រូបសិល្បៈទាំងនោះ ធ្វើឡើងអស់រយៈពេល៥ថ្ងៃ ដោយមន្ត្រី និងបុគ្គលិកសារមន្ទីរជាតិ សហការជាមួយក្រុមហ៊ុនថូម៉ាស។ ដំណើរការនោះរួមមានការសម្អាត និងជួសជុលរូប ការបន្ថែមពណ៌ ការលើកដាក់កេស ការរៀបចំដាក់ស្នោទប់ និងដាក់ក្រដាសការពារសំណើមនៅក្នុងកេស ការឃុំបេ និងបិទគំនូសសញ្ញានានាជាដើម។ នេះជាលើកទីមួយហើយ ដែលសារមន្ទីរជាតិកម្ពុជា វេចខ្ចប់វត្ថុបុរាណ ដោយមិនមានអ្នកជំនាញបរទេសជួយ។
រូបពីសារមន្ទីរជាតិកម្ពុជា
សូមបញ្ជាក់ថា គិតចាប់ពីឆ្នាំ១៩៦៣ មកដល់ឆ្នាំ២០១៩ មានប្រទេសជាង១០បានខ្ចីរូបសិល្បៈពីកម្ពុជាទៅតាំងពិព័រណ៍ និងសរុបចំនួន២២លើក។ រូបសិល្បៈកម្ពុជា ត្រូវបានខ្ចីយកទៅតាំងនៅសហរដ្ឋអាម៉េមេរិកច្រើនជាងគេ ហើយមាននៅបារាំង អាល្លឺម៉ង អូស្ត្រាលី សិង្ហបុរី ម៉ាឡេស៊ី ជប៉ុន កូរ៉េ និងចិនជាដើម៕