ជាង៤ខែមកនេះ លោក Lee Tae Hoon បានដឹកនាំក្រុម បាន១៣ប្រកួត ដោយក្នុងនោះ ឈ្នះ៤ ស្មើ២ និងចាញ់៧ប្រកួត ដែលហាក់ដូចជាមិនសូវល្អសោះ សម្រាប់ការប្រកួតនៅក្នុងក្របខណ្ឌពានរង្វាន់មិត្តហ្វូនខេមបូឌាលីគ និងពានរង្វាន់សម្ដេច ហ៊ុន សែន នាឆ្នាំ២០២១។ បច្ចុប្បន្ននេះ ក្រុមកងយោធពលខេមរភូមិន្ទ មាន២២ ឈរនៅលេខ៧ នៃពានរង្វាន់មិត្តហ្វូន ខណៈការប្រកួតនៅសល់តែ១ប្រកួតទៀតប៉ុណ្ណោះ។
 

មុនមកដឹកនាំក្លិបកងយោធពលខេមរភូមិន្ទនេះ លោក Lee បានទៅដឹកនាំក្លិប HOANG ANH Gia Lai FC នៅក្របខណ្ឌលីគទី១ របស់វៀតណាម រយៈពេល១រដូវកាល គឺ២០១៩-២០២០  ដោយកាន់តួនាទី ជានាយកបច្ចេកទេសក្លិប។
 

 

គ្រូបង្វឹកសញ្ជាតិកូរ៉េខាងត្បូងរូបនេះ ក៏ជាអតីតគ្រូបង្វឹកជម្រើសជាតិកម្ពុជាផងដែរ។ លោក Lee ធ្លាប់បានដឹកនាំជម្រើសជាតិកម្ពុជា ចាប់ពីឆ្នាំ២០១០-២០១២ ។ ក្រោយមកគ្រូបង្វឹកវ័យ៦១ឆ្នាំរូបនេះ ត្រូវបានតែងតាំងដឹកនាំជម្រើសជាតិកម្ពុជា ម្ដងទៀតនៅឆ្នាំ២០១៣ ដល់២០១៦ មុននឹងមកដឹកនាំជម្រើសជាតិអាយុក្រោម១៥ឆ្នាំ ពីឆ្នាំ ២០១៦ ដល់២០១៨។ លោក Lee ក៏ជាអតីតគ្រូបង្វឹកក្រុមជម្រើសជាតិបាល់ទាត់នារីកូរ៉េខាងត្បូង នៅឆ្នាំ២០០៥ និង២០០៩ ផងដែរ៕