ទន្ទឹមនឹងការលើកឡើងរបស់សម្តេច ហ៊ុន សែន លោក ថោង រដ្ឋមន្រ្តីក្រសួងទេសចរណ៍ បានថ្លែងថា ការប្រែក្លាយពហុកីឡដ្ឋានជាតិមរតកតេជោ ផ្សារភ្ជាប់ជាមួយវិមានឈ្នះ-ឈ្នះ រមនីយដ្ឋានសួនសត្វសាហ្វារីភ្នំពេញ តារាងកូនហ្គោល Garden City និងតំបន់ជុំវិញ ជាមេដែក និងជានិមិត្តរូបគោលដៅទេសចរណ៍ដ៏ទាក់ទាញថ្មីមួយទៀត។ លោក បន្តថា នេះជាគោលដៅសំខាន់មួយ ក្នុងគោលការណ៍គ្រប់គ្រងពហុកីឡដ្ឋានជាតិមរតកតេជោ ឈរលើមូលដ្ឋានគ្រឹះសំខាន់ៗចំនួន៥ ដូចជា សោភ័ណភាព សន្សំសំចៃ កៀរគរចំណូល និងទាក់ទាញចំណាប់អារម្មណ៍កីឡា និងទេសចរណ៍។

 

វិមានឈ្នះឈ្នះ ស្ថិតនៅប៉ែកខាងជើងនៃរាជធានីភ្នំពេញ ក្នុងសង្កាត់ព្រែកតាសេក ខណ្ឌជ្រោយចង្វា។ ក្នុងនោះវិមានកីឡដ្ឋាន បានចាប់ផ្តើមសាងសង់នៅថ្ងៃទី៤ ខែមេសា ឆ្នាំ២០១៧ លើទំហំផ្ទៃដីជាង១៦ហិកតា និងបានបញ្ចប់ការសាងសង់នៅថ្ងៃទីទី៣១ ខែឧសភា ឆ្នាំ២០២១។ 
 

កីឡដ្ឋាននេះ អាចផ្ទុកអ្នកទស្សនាបាន៦ម៉ឺននាក់ និងអាចរៀបចំព្រឹត្តិការណ៍ប្រកួតកីឡាថ្នាក់ជាតិ និងអន្តរជាតិធំៗកម្រិតពិភពលោកផងដែរ។ ពិសេសកីឡដ្ឋាននេះនឹងក្លាយជា ទីប្រកួតកីឡាស៊ីហ្គេម និងអាស៊ានប៉ារ៉ាហ្គេមលើកទី៣២ នៅកម្ពុជា នាឆ្នាំ២០២៣ខាងមុខ៕