កីឡាករ មនត្រស ផានសុវណ្ណអារុន (MONTROSS Phansovannarun) បានប្រកួតក្នុងវិញ្ញាសារ ហែលសេរី បុរស ១០០ម៉ែត្រ ដោយស្ថិតក្នុង Heat 3 ក្នុងចំណោម Heat ទាំង១២ មាន១០អត្តពលិក ។ ជម្រើសជាតិកម្ពុជារូបនេះ ទទួលបានចំណាត់ថ្នាក់លេខ៥ ក្នុង Heat និងលេខ៨៧ ក្នុងចំណោមអត្តពលិក សរុប១១៨នាក់ ដោយខ្លួន ធ្វើការបញ្ចប់ក្នុងថិរវេលា ៥៥:៧១ វិនាទី ខណៈលេខ១ក្នុងវិញ្ញាសា បានទៅលើ កីឡាករកាណាដា Joshua LIENDO EDWARDS ក្នុងថិរវេលា ៤៦:២៦ វិនាទី និងលេខ២ កីឡាករអ៊ីតាលី Alessandro MIRESSI ក្នុងថិរៈវេលា ៤៦:៣០ វិនាទី ។ តាមរយៈសហព័ន្ធកីឡាហែលទឹក មនត្រស ផានសុវណ្ណអារុន បានបំបែកកំណត់ត្រាថ្នាក់ជាតិ ដែលមិនធ្លាប់មានកីឡាករកម្ពុជាណា អាចធ្វើបានក្នុងវិញ្ញាសានេះ ។

 

នៅថ្ងៃជាមួយគ្នានេះដែរ កីឡាការិនី ម៉ីលិតាន មីននិក (Mei-Li Tan MINNICH) បានបង្កើតកំណត់ត្រាថ្មី សម្រាប់វិស័យកីឡាហែលទឹកកម្ពុជា ។ អត្តពលិករូបនេះ បានទទួលជោគជ័យ ក្នុងHeat 1 ក្នុងចំណោមអត្តពលិក៥នាក់ ដោយបញ្ចប់វិញ្ញាសា ហែលទឹកបែបមេអំបៅ ១០០ម៉ែត្រ ក្នុងថិរៈវេលា ១:០៨:៦៨ វិនាទី គួរបញ្ជាក់នៅក្នុងវិញ្ញាសានេះ ត្រូវបានចែកចេញជា ៥ Heat ។ ទោះបីជាយ៉ាងនេះក៏ដោយ អត្តពលិកកម្ពុជារូបនេះ មិនបានទៅវគ្គបន្ដឡើយ ដោយបានឈរត្រឹម ចំណាត់ថ្នាក់លេខ៣៨ ក្នុងចំណោមអត្តពលិក សរុប៤៥នាក់ ។ កីឡាការិនី ស៊ុយអែត Louise HANSSON ទទួលចំណាត់ថ្នាក់លេខ១ និងលេខ២ កីឡាការិនីអាម៉េរិក Claire CURZAN ។

 

ស្របពេល កីឡាការិនី កាំង មុយនីន (KAING Muynin) ត្រូវប្រកួតក្នុងវិញ្ញាសា ហែលសេរី៥០ម៉ែត្រ ។ កីឡាការិនីរូបនេះ ស្ថិតក្នុងHeat ទី១ មានអត្តពលិក ៩នាក់ និងមានអត្តពលិកសរុប ក្នុងវិញ្ញាសានេះ ១០៩នាក់ និង ១១Heat ។ មុយនីន បានធ្វើការបញ្ចប់វិញ្ញាសាក្នុង ថិរវេលា ២៨:៤២ ទទួលបានលេខ៣ ក្នុងHeat និងលេខ ៧០ ក្នុងចំណោមអត្តពលិកទាំងអស់ ។ 

 

បើតាមបញ្ជាក់របស់ អគ្គលេខាធិការសហព័ន្ធកីឡាហែលទឹកកម្ពុជា លោក ហែម គិរី ទៅសារពត៌មានថ្មីៗកាលពីថ្ងៃទី១១ ខែធ្នូ កន្លងទៅ មិនសូវរំពឹងថា កម្ពុជានឹងអាចយកមេដាយបានតែ តែរំពឹងត្រឹមយកបទពិសោធន៍ និងការពង្រឹងសមត្ថភាពកីឡាករ និងកីឡាការិនី ។ ជាក់ស្ដែកតាមរយៈការប្រកួតព្រឹត្តិការខាងលើ កីឡាករកម្ពុជា បានបំបែកកំណត់ត្រាថ្នាក់ជាតិថ្មី ដែលមិនទាន់មានកីឡាករណាអាចធ្វើបាន ៕