អន្តរជាតិ
រុស្ស៊ី៖ បាតុករប្រឆាំងសង្រ្គាមអ៊ុយក្រែនច្រើន៣៥០០នាក់បន្ថែមទៀត ត្រូវចាប់ខ្លួន ប៉ូលិសរុស្ស៊ី ចាប់បណ្ដើរអ្នកតវ៉ាម្នាក់នៅទីក្រុងមូស្គូ។ រូបថត AFP
× ប៉ូលិសរុស្ស៊ី បានចាប់ខ្លួនបាតុករប្រឆាំងសង្រ្គាមនៅអ៊ុយក្រែនច្រើនជាង៣ ៥០០នាក់ បន្ថែមទៀតនៅទូទាំងប្រទេសក្នុងថ្ងៃទី៦ ខែមីនា។ នេះបើតាមរបាយការណ៍របស់ក្រសួងមហាផ្ទៃរុស្ស៊ី។
ចាប់តាំងពីការឈ្លានពានរបស់រុស្ស៊ី លើអ៊ុយក្រែនផ្ទុះឡើងនៅចុងខែកុម្ភៈមក ប្រជាជនរុស្ស៊ីបានចាប់ផ្តើមចេញមុខតវ៉ា ឱ្យបញ្ឈប់សង្រ្គាមភ្លាមៗ។ បាតុកររុស្ស៊ី បានគ្រវីទង់ជាតិអ៊ុយក្រែន ហើយលើកបដាមានសរសេរពាក្យ «កុំធ្វើសង្រ្គាម» និង «គួរឱ្យអាម៉ាស់ណាស់»។
អ្នកនាំពាក្យនៃក្រសួងមហាផ្ទៃរុស្ស៊ីលោកស្រី Irina Volk បាននិយាយថា មនុស្សជាង៣ ៥០០នាក់ ក្នុងការតវ៉ាថ្ងៃទី៦ ខែមីនា ដោយនៅទីក្រុងមូស្គូមានចំនួន១ ៧០០នាក់ ទីក្រុង St Petersburg មាន៧៥០នាក់ ហើយ១០៦១នាក់ទៀត នៅតាមក្រុងដទៃទៀត។ លោកស្រីបានបន្ថែមថា មនុស្សជាង ៥ ២០០នាក់ បានចូលរួមក្នុងបាតកម្ម។
ចាប់តាំងពីថ្ងៃទី២៤ខែកុម្ភៈ ដែលរុស្ស៊ីចាប់ផ្តើមឈ្លានពានអ៊ុយក្រែន មនុស្សប្រមាណច្រើនជាង១ម៉ឺននាក់ ត្រូវបានចាប់ខ្លួនហើយ។ នេះបើតាមរបាយការណ៍របស់គម្រោងផ្សព្វផ្សាយសិទ្ធិមនុស្សរុស្ស៊ី OVD-Info ។
រយៈពេលជិត២សប្តាហ៍ នៃការវាយប្រហាររបស់រុស្ស៊ីលើអ៊ុយក្រែន ប្រជាជនស៊ីវិលរបស់អ៊ុយក្រែនចំនួន ៣៦៤ នាក់ បានបាត់បង់ជីវិត ខណៈយ៉ាងហោច៧៥៩នាក់ទៀត រងរបួស។នេះបើតាមរបាយការណ៍របស់អង្គការសហប្រជាជាតិ៕
© រក្សាសិទ្ធិដោយ thmeythmey.com