ជាកោះមានប្រជាជនសរុបប្រមាណ២២លាននាក់ ស្រីលង្កាកំពុងស្វះស្វែងរកជំនួយពីដៃគូអន្តរជាតិ និងមូលនិធិរូបិយវត្ថុអន្តរជាតិ (IMF) ដើម្បីដោះទ័លវិបត្តិសេដ្ឋកិច្ចដ៏អាក្រក់បំផុតដែលមិនធ្លាប់ប្រឈមតាំងពីទទួលបានឯករាជ្យពីអង់គ្លេសឆ្នាំ ១៩៤៨។ ការគ្រប់គ្រងសេដ្ឋកិច្ចប្រទេសមិនបានល្អរបស់អតីតមេដឹកនាំស្រីលង្កា លោក ហ្គោតាបាយ៉ា រ៉ាចាប៉ាក់សា បានធ្វើឱ្យប្រទេសក្ស័យធន ខ្វះទុនបម្រុងមិនអាចនាំចូលសូម្បីតែទំនិញចាំបាច់ដូចជាប្រេងឥន្ទនៈ ស្បៀងអាហារ និងថ្នាំពេទ្យជាដើម។ 

 

កង្វះទំនិញចាំបាច់ទាំងនេះ បណ្តាលឱ្យវិស័យទេសចរណ៍របស់ស្រីលង្កាដែលផ្តល់ចំណូលប្រមាណ៥ ភាគរយនៃផលិតផលក្នុងស្រុកសរុបធ្លាក់ចុះយ៉ាងខ្លាំង។ យោងតាមអាជ្ញាធរអភិវឌ្ឍន៍វិស័យ​ទេសចរណ៍ស្រីលង្កា ចំនួនទេសចរដែលភាគច្រើនមកពីអង់គ្លេស ឥណ្ឌា និងចិនបានធ្លាក់ចុះប្រហែល៦០ភាគរយក្នុងខែមិថុនា បើធៀបទៅនឹងខែមីនា ឆ្នាំ២០២២។ 

 

យ៉ាងណាមិញ ក្រោយទស្សនកិច្ចនៅឥណ្ឌាដើម្បីផ្សព្វផ្សាយវិស័យទេសចរ រដ្ឋមន្រ្តីទេសចរណ៍ស្រីលង្កាលោក Harin Fernando ប្រាប់អ្នកកាសែតនៅសប្តាហ៍មុនថា លោករំពឹងភ្ញៀវទេសចរយ៉ាងហោចណាស់១លាននាក់ពីឥណ្ឌានៅឆ្នាំនេះ។ ពាក់ព័ន្ធរឿងនេះ លោក​ Arindam Bagchi អ្នកនាំពាក្យក្រសួងការបរទេសឥណ្ឌា អំពាវនាវឱ្យប្រជាជនឥណ្ឌាពិចារណាពីកត្តាហានិភ័យមុនសម្រេចទៅទស្សនកិច្ចនៅរដ្ឋអាស៊ីខាងត្បូងនេះ។ 

 

«យើងបានតាមដានការវិវឌ្ឍនៅទីនោះ។ តាមការយល់ឃើញរបស់យើងនោះគឺថាប្រជាជនឥណ្ឌានៅតែជាប្រភពទេសចរដ៏ធំបំផុតសម្រាប់ស្រីលង្កា»។ អ្នកនាំពាក្យក្រសួងការបរទេសឥណ្ឌាតបទៅនឹងសំណួរអ្នកកាសែតបែបនេះអំឡុងសន្និសីទព័ត៌មានខ្លីមួយនាថ្ងៃទី២៥ ខែសីហា។

 

ទាក់ទងការធ្វើដំណើររបស់ប្រជាជនឥណ្ឌាទៅស្រីលង្កាក្នុងស្ថានភាពបច្ចុប្បន្ននេះ លោក Bagchi លើកទឹកចិត្តឱ្យប្រជាជនខ្លួនមើលការប្រុងប្រយ័ត្នឱ្យបានគ្រប់ជ្រុងជ្រោយដើម្បីបញ្ចៀសបញ្ហាណាមួយ។ បើតាមលោក Bagchi សុវត្ថិភាពរបស់ជនជាតិឥណ្ឌាទាំងអស់អំឡុងការស្នាក់នៅក្រៅទឹកដីឥណ្ឌាតែងជាក្តីបារម្ភចម្បងរបស់រដ្ឋាភិបាលក្រុងញូវដែលី។ ដូច្នោះ ពួកគេគួរតែត្រួតពិនិត្យមើលបញ្ហាពាក់ព័ន្ធដូចជាការប្តូររូបិយប័ណ្ណ និងស្ថានភាពប្រេងឥន្ទនៈមុនសម្រេចចិត្តចេញដំណើរទៅស្រីលង្កា៕