អន្តរជាតិ
តុលាការវៀតណាម ឱ្យអ្នកកាសែតម្នាក់ជាប់ពន្ធនាគារ៩ឆ្នាំ ព្រោះផ្សាយព័តមានប្រឆាំងរដ្ឋ
អ្នកកាសែតវៀតណាម Pham Doan Trang ។ រូបថត ICJ
×![]()
ដោយ: ឈួន ឈីវអុីង
តុលាការកំពូលក្រុងហាណូយ នៅថ្ងៃទី២៦ ខែសីហា រក្សាការផ្ដន្ទាទោសរបស់តុលាការដំបូងដែលកាត់ទោសអ្នកកាសែតស្រីម្នាក់ឱ្យជាប់ពន្ធនាគារ៩ឆ្នាំ ដោយសារផ្សព្វផ្សាយព័ត៌មានប្រឆាំងនឹងរដ្ឋជុំវិញរឿងសិទ្ធិមនុស្ស។ នេះបើតាមការលើកឡើងរបស់មេធាវីលោកស្រី និងប្រព័ន្ធផ្សព្វផ្សាយក្នុងស្រុក។
អ្នកកាសែតស្រីជនជាតិវៀតណាមឈ្មោះ Pham Doan Trang មានអាយុ ៤៤ឆ្នាំ ត្រូវបានកាត់ទោសដោយតុលាការប្រជាជនក្រុងហាណូយក្នុងឆ្នាំ២០២១ បន្ទាប់រងការចោទពីបទប្រព្រឹត្តសកម្មភាពប្រឆាំងរដ្ឋដែលជាបទចោទពេញនិយមសម្រាប់ការកាត់ទោសសកម្មជនសិទ្ធិមនុស្ស និងអ្នកកាសែត។
នេះក៏ដោយសារលោកស្រីផ្សព្វផ្សាយពីបញ្ហាសិទ្ធិមនុស្ស និងនិយាយវាយប្រហារប៉ូលិសវៀតណាមដែលប្រព្រឹត្តអំពើហិង្សា។ ក្រោយត្រូវបានតុលាការដំបូងកាត់ទោស៩ឆ្នាំកាលពីខែធ្នូ ឆ្នាំ២០២១ លោកស្រី បានដាក់ពាក្យប្ដឹងជំទាស់ទៅតុលាការកំពូល។ នៅថ្ងៃទី២៦ ខែសីហា តុលាការកំពូលក្រុងហាណូយបានច្រានចោលបណ្ដឹងឧទ្ធរណ៍លោកស្រី Trang ហើយរក្សាការសម្រេចឱ្យជាប់ពន្ធនាគាររយៈពេល៩ឆ្នាំ។
«Trang បានអះអាងថា ការកាត់ក្តីដំបូងក្នុងខែធ្នូ មិនបានអនុវត្តតាមនីតិវិធីច្បាប់ក្នុងស្រុក និងសន្ធិសញ្ញាអន្តរជាតិទេ រីឯតុលាការអះអាងថា មិនមានហេតុផលគ្រប់គ្រាន់ទទួលយកបណ្តឹងឧទ្ធរណ៍របស់លោកស្រីឡើយ»។ លោកមេធាវី Dang Dinh Manh របស់លោកស្រី Trang បានលើកឡើងបែបនេះ មុនបន្ថែមថា សមាជិកគ្រួសារលោកស្រី Trang និងអ្នកការទូតនៅវៀតណាម មិនអនុញ្ញាតឱ្យចូលរួមពេលតុលាការកាត់ក្ដីឡើយ។
ទោះបីជាវៀតណាមមានការកែទម្រង់សេដ្ឋកិច្ចឱ្យមានភាពបើកចំហ និងទូលំទូលាយ ដើម្បីផ្លាស់ប្តូរសង្គមក៏ដោយ ក៏ប្រទេសកុម្មុយនិស្តមួយនេះនៅតែរឹតបន្តឹងការគ្រប់គ្រងប្រព័ន្ធផ្សព្វផ្សាយក្នុងស្រុក និងមិនអត់ឱនចំពោះការរិះគន់ផ្សេងចំពោះរដ្ឋាភិបាល។
តាំងពីដើមមក សហភាពអឺរ៉ុបបានប្រតិកម្មនឹងការកាត់ទោសលោកស្រី Trang ដោយបានអះអាងថា វាជាការកាត់ក្ដីមិនច្បាស់លាស់។ សហភាពអឺរ៉ុប បានអំពាវនាវឲ្យអាជ្ញាធរវៀតណាមដោះលែងអ្នកការពារសិទ្ធិមនុស្សទាំងអស់ដែលត្រូវបានឃុំខ្លួន។ កាលពីខែមីនា អាម៉េរិកបានប្រគល់ពានរង្វាន់ស្ត្រីអន្តរជាតិមានភាពក្លាហានឱ្យលោកស្រី Trang ថែមទៀត។ ប៉ុន្តែវៀតណាមបានជំទាស់នឹងការផ្ដល់ពានរង្វាន់នេះ។
លោកស្រី Trang ជាអ្នកនិពន្ធ និងអ្នកកាសែតគាំទ្រសិទ្ធិមនុស្ស ក៏ដូចជាសកម្មជនប្រជាធិបតេយ្យល្បីឈ្មោះម្នាក់នៅវៀតណាម។ នៅឆ្នាំ២០១៨ លោកស្រីត្រូវបានឃុំខ្លួនបន្ទាប់ពីបានជួបគណៈប្រតិភូអឺរ៉ុបពេលរៀបចំវេទិការសន្ទនាស្ដីពីសិទ្ធិមនុស្សប្រចាំឆ្នាំរវាងអឺរ៉ុប និងវៀតណាម។ លោកស្រី Trang ក៏ត្រូវបានអញ្ជើញឱ្យចូលរួមក្នុងវេទិការស្ដីពីសិទ្ធិមនុស្សរបស់លោក បារ៉ាក់ អូបាម៉ា កាលពីឆ្នាំ២០១៦ តែត្រូវប៉ូលិសវៀតណាមឃាត់ខ្លួនមិនឱ្យទៅ៕
Tag:
វៀតណាម
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
1 ថ្ងៃ
