ផ្កាថ្មជាច្រើនប្រភេទ ត្រីសមុទ្រជាច្រើនក្បាល និងធនធានបាតសមុទ្ររាប់មិនអស់ ជាភាពទាក់ទាញមួយនៃទេសចរណ៍បាតសមុទ្រ។ ទេសចរណ៍ប្រភេទនេះ មិនទាន់ពេញនិយមឡើយក្នុងប្រទេសកម្ពុជា ដ្បិតទេសចរគិតថាលំបាក និងមិនទាន់បានយល់ពីសក្តានុពលទេសចរណ៍បាតសមុទ្រ។ ដោយឡែក ប្រទេសក្នុងតំបន់ បានទាញយកចំណូលជាច្រើនពីទេសចរណ៍ប្រភេទនេះ។ 

 

ក្នុងដំណើរកម្សាន្តជាមួយនាយកដ្ឋានជំរុញទេសចរណ៍ក្នុងស្រុក នៅក្រុងកោះរ៉ុង ខេត្តព្រះសីហនុ លោក កាន់ ភារៈ ម្ចាស់ក្រុមហ៊ុន Khmer Dive Group បានប្រាប់អ្នកសារព័ត៌មានថា លោកបានបង្កើតក្រុមហ៊ុននេះឡើងក្នុង ឆ្នាំ២០១៩ និងបានបង្វឹកយុវជនជាច្រើនពីជំនាញមុជទឹកក្នុងសមុទ្រនេះ។ 

 

 លោក កាន់ ភារៈ មានសុទិដ្ឋិនិយម Khmer Dive Group ជាផ្នែកមួយជំរុញ និងបង្ហាញសក្តានុពលធនធានបាតសមុទ្រ ដល់ទេសចរជាតិ និងអន្តរជាតិ។ « ទេសចរមកតំបន់កោះ គិតថាធនធានសមុទ្រខ្មែរ មិនស្អាតដូចប្រទេសដទៃ។ ប៉ុន្តែពេលគាត់មកដល់តំបន់កោះ ហើយបានមើលជីវៈចម្រុះ ជាមួយKhmer Dive Group គាត់ចាប់អារម្មណ៍ខ្លាំង។ តំបន់កោះរបស់យើងមានជីវៈចម្រុះច្រើន ដែលទេសចរមិនដែលបានឃើញនៅតំបន់ផ្សេង»។ នេះជាការលើកឡើងរបស់លោក កាន់ ភារៈ។

សម្រាប់ទេសចរ ដែលចង់មុជទឹកមើលធនធានបាតសមុទ្រ គួរតែហាត់រៀនសិនមុន។ សម្រាប់ក្រុមហ៊ុន Khmer Dive Group មានកន្លែងសម្រាប់ឱ្យទេសចរហាត់រៀនហែលទឹក នៅអាងទឹកនៅភ្នំពេញ និងកោះរ៉ុងផ្ទាល់តែម្ដង។

 

សូមជម្រាបថា ខេត្តព្រះសីហនុ មានតំបន់ផ្កាថ្មច្រើនជាងគេ គឺរហូតដល់ ១ ១៩៨ហិកតា ខណៈខេត្តកំពតមាន ៩៥៣ហិកតា។ ខេត្តកោះកុង ក៏មានមានតំបន់ផ្កាថ្ម៦០២ហិកតាដែរ រីឯខេត្តកែបមាន ជាង៥២ហិកតា។ នេះបើតាមរបាយការណ៍កាលពីឆ្នាំ២០០៧ របស់ក្រសួងបរិស្ថាន៕