ប្រទេសកម្ពុជា មានសក្តានុពលបាតសមុទ្រយ៉ាងច្រើន ដោយសារការអំណោយផលនៃអាកាសធាតុ ត្រូពិកមូសុង ដែលមានពន្លឺគ្រប់គ្រាន់សម្រាប់ធនធានទាំងនោះ។ ជាមួយគ្នានោះ ក្នុងចំណោមខេត្តជាប់សមុទ្រទាំង៤ ក្នុងប្រទេសកម្ពុជា ខេត្តព្រះសីហនុ មានធនធានបាតសមុទ្រច្រើនជាងគេ ជាពិសេសនៅតំបន់កោះរ៉ុង និងកោះរ៉ុងសន្លឹម។ 

យោងតាមការស្រាវជ្រាវរបស់លោក គន្ធា ភិរម្យ ប្រធានការិយាល័យផ្សព្វផ្សាយទេសចរណ៍ក្នុងស្រុក ទេសចរណ៍បាតសមុទ្រ សំដៅដល់សកម្មភាពរបស់មនុស្ស ដែលធ្វើដំណើរចេញពីកន្លែងរស់នៅ ប្រចាំថ្ងៃរបស់ពួកគេ។ ទេសចរ ស្នាក់នៅយ៉ាងតិចមួយយប់នៅទីតាំងទេសចរណ៍នោះ ដើម្បីធ្វើសកម្មភាពជ្រមុជទឹកមើលធនធានបាតសមុទ្រតាមរយៈឧបករណ៍បច្ចេកទេស។ 

 

យ៉ាងណាមិញ ទេសចរណ៍បាតសមុទ្រនៅកម្ពុជា មិនទាន់មានទីផ្សារច្រើនឡើយក្នុងប្រទេសកម្ពុជា។ ទេសចរណ៍បាតសមុទ្រ ត្រូវបានគេចាត់ទុកថាជាទេសចរណ៍កម្រិតខ្ពស់ មានន័យថាជាប្រភេទទេសចរណ៍ដែលត្រូវការចំណាយថវិកាច្រើន និងឧបករណ៍បច្ចេកទេសត្រឹមត្រូវ។ លើសពីនេះ រាល់អាជីវកម្មទេសចរណ៍ជ្រមុជទឹកមើលផ្កាថ្មត្រូវមានការទទួលស្គាល់ ពីPADI ទៅលើសុវត្ថិភាព និងបច្ចេកទេសត្រឹមត្រូវ។ នេះបើតាមឯកសារស្រាវជ្រាវដដែល។

 

បើតាមលោក គន្ធា ភិរម្យ ទោះទេសចរណ៍បាតសមុទ្រ ជាទេសចរណ៍កម្រិតខ្ពស់។ ប៉ុន្តែកម្ពុជាគួរសិក្សា និងជំរុញទីផ្សារទេសចរណ៍ប្រភេទនេះបន្ថែម ខណៈកម្ពុជាមានធនធានបាតសមុទ្រច្រើនរាប់មិនអស់៕