ភ្នំពេញ៖ រដ្ឋបាលខេត្តស្ទឹងត្រែង បានបង្ហាញការមិនពេញចិត្ត ពេលឃើញមានការស្លៀកពាក់ឈុតស៊ីចស៊ីតំណាងឱ្យខេត្តស្ទឹងត្រែង។ ពលរដ្ឋនិងរដ្ឋបាលខេត្តនេះ សុំឱ្យអ្នករៀបចំកម្មវិធី Miss Grand Cambodia ពិសេសផលិតកម្មមហាហង្ស បកស្រាយអំពីដំណើរការ នៃការបង្ហាញឈុតនីមួយៗ ដែលមានជាប់ពាក់ព័ន្ធជាមួយខេត្តស្ទឹងត្រែង។ ទោះជាយ៉ាងណា រដ្ឋបាលខេត្តស្ទឹងត្រែង អះអាងថា ខ្លួនគាំទ្រចំពោះការបង្ហាញឈុតតំណាងខេត្ត ដែលមិនធ្វើឱ្យប៉ះពាល់ដល់ប្រពៃណី និងទំនៀមទម្លាប់ របស់ខេត្តស្ទឹងត្រែង។
លោក ម៉ែន គុង នាយករងរដ្ឋបាលសាលាខេត្ត និងជាអ្នកនាំពាក្យរដ្ឋបាលខេត្តស្ទឹងត្រែង បានប្រាប់សារព័ត៌មានថ្មីៗ តាមទូរសព្ទនៅថ្ងៃទី២៨ ខែសីហា ឆ្នាំ២០២២នេះថា រដ្ឋបាលខេត្តគាំទ្រ កម្មវីធី Miss Grand Cambodia 2022 ចំពោះការបង្ហាញឈុតតំណាងខេត្តស្ទឹងត្រែង ដែលមិនធ្វើឱ្យប៉ះពាល់ដល់ប្រពៃណី និងទំនៀមទម្លាប់របស់ខេត្តខ្លួន។
លោក ម៉ែន គុង នាយករងរដ្ឋបាលសាលាខេត្ត និងជាអ្នកនាំពាក្យរដ្ឋបាលខេត្តស្ទឹងត្រែង
ទោះជាយ៉ាងណាក៏ដោយ ក្នុងដំណាក់កាលនៃការបង្ហាញឈុតនីមួយៗ ដែលមានជាប់ពាក់ព័ន្ធនឹងខេត្តស្ទឹងត្រែង ឃើញមានឈុតស៊ីចស៊ី ដូច្នេះលោក ម៉ែន គុង សុំឱ្យអ្នករៀបចំកម្មវិធី Miss Grand Cambodia បកស្រាយឱ្យប្រជាជនខេត្តស្ទឹងត្រែងយល់ឱ្យបានច្បាស់។ ដ្បិតអី នាយករងរដ្ឋបាលសាលាខេត្តរូបនេះ យល់ឃើញថា វាបានធ្វើឱ្យប៉ះពាល់ដល់តម្លៃប្រពៃណី ទំនៀមទម្លាប់ដ៏ល្អរបស់ខេត្តស្ទឹងត្រែង។
«ក្នុងការបង្ហាញឈុតរក្សាស្ថានភាព វប្បធម៌ ប្រពៃណី ទំនៀមទម្លាប់របស់ពលរដ្ឋ ក្នុងខេត្តស្ទឹងត្រែង យើងទាំងអស់គ្នាគាំទ្រ។ ប៉ុន្តែពួកយើងខ្លាចថា ការបង្ហាញឈុតខ្លះ ធ្វើឱ្យប៉ះពាល់ដល់ប្រពៃណីក្នុងខេត្តស្ទឹងត្រែងដែលមានជាយូរមកហើយ។ ខ្ញុំសង្ឃឹមថាអ្នករៀបចំកម្មវិធី នឹងបកស្រាយ ថាតើដំណាក់កាលនៃការបង្ហាញឈុតនីមួយៗ ឈុតណាតំណាងឱ្យកម្មវិធី ឈុតណាតំណាងឱ្យខេត្ត?»។
បន្ថែមពីនោះលោក ម៉ែន គុង នាយករងរដ្ឋបាលសាលាខេត្ត ក៏បានសូមឱ្យអ្នករៀបចំកម្មវិធី Miss Grand Cambodia កែសម្រួល ទាំងការផ្ដិតយករូបភាព ទស្សនីយភាព ក៏ដូចជាខ្លឹមសារផ្សេងៗ ដែលនាំឱ្យប៉ះពាល់ដល់តម្លៃប្រពៃណី ទំនៀមទម្លាប់ របស់ខេត្តស្ទឹងត្រែងផងដែរ។
សារព័ត៌មានថ្មីៗ បានព្យាយាមស្វែងរកទំនាក់ទំនង និងផ្ញើសារតាម Messenger ទៅកាន់ផលិតកម្មមហាហង្ស ដើម្បីសុំការពន្យល់បន្ថែម ប៉ុន្តែពុំទាន់មានការឆ្លើយតបណាមួយឡើយ។
សូមបញ្ជាក់ថា កាលពីពេលថ្មីៗនេះ កម្មវិធី Miss Grand Cambodia ក៏ដូចជាផលិតកម្មហហាហង្ស ដែលជាអ្នករៀបចំកម្មវិធី បានចេញលិខិតបំភ្លឺ និងសម្ដែងការសោកស្ដាយ ចំពោះការបង្ហាញឈុតដំណាងខេត្តចំនួន២ ដែលបង្ហាញពីល្បែងស៊ីសង ក្រោយពីមានការរិះគន់ខ្លាំងពីមហាជន។ ប៉ុន្តែគេមិនបានឃើញការឆ្លើយតបណាមួយ ទៅកាន់រដ្ឋបាលខេត្តស្ទឹងត្រែងឡើយ។
សូមរំលឹកថា កាលពីថ្ងៃសុក្រ ទី២៦ ខែសីហា ឆ្នាំ២០២២ រដ្ឋបាលខេត្តស្ទឹងត្រែង បានចេញលិខិតបំភ្លឺមួយ ដោយបញ្ជាក់ថា ខ្លួនបដិសេធចំពោះការបង្ហាញម៉ូត ដែលមានលក្ខណៈស្រើបស្រាល ធ្វើឱ្យប៉ះពាល់ធ្ងន់ធ្ងរដល់វប្បធម៌ ប្រពៃណី ពិសេសកិត្តិយសរបស់ស្ត្រីខ្មែរ។ និងបានបញ្ជាក់ថា អ្នករៀបចំកម្មវិធី មិនបានសុំការអនុញ្ញាតពីរដ្ឋបាលខេត្ត មុនពេលយកឈុតនោះទៅបង្ហាញឡើយ។
លោក ឡុង ប៉ុណ្ណាសិរីវត្ថ អ្នកនាំពាក្យក្រសួងវប្បធម៌ និងវិចិត្រសិល្បៈ បានប្រាប់សារព័ត៌មានថ្មីៗ តាមទូរសព្ទកាលពីថ្ងៃទី២៧ ខែសីហា ថាក្រុមការងារជំនាញរបស់លោក បានកោះហៅអ្នករៀបចំកម្មវិធី Miss Grand Cambodia ទៅស្ដីបន្ទោសរួចរាល់ហើយ ចំពោះការបង្ហាញឈុតល្បែងស៊ីសង ដែលធ្វើឱ្យប៉ះពាល់ពាល់ដល់សង្គម។
យ៉ាងណាក៏ដោយ រឿងឈុតដំណាងខេត្តស្ទឹងត្រែង លោកមិនបានបញ្ជាក់ច្បាស់ឡើយ ប៉ុន្តែលោកសូមឱ្យសាធារណជន បែងចែកឱ្យច្បាស់ ថាឈុតមួយណាជាឈុតដំណាងខេត្ត ហើយឈុតមួយណា ដែលតំណាងឱ្យកម្មវិធី មុននឹងរិះគន់។
«យើងតែងតែប្រាប់អ្នករៀបចំកម្មវិធីគ្រប់គ្នា ថាមុនធ្វើអ្វីមួយទាក់ទងនឹងវប្បធម៌ ប្រពៃណី និងទំនៀមទម្លាប់ ត្រូវមកឆ្លងក្រសួងសិន ដើម្បីបង្ការការខុស។ ប៉ុន្តែគាត់មិនមកឆ្លងយើង ទើបមានរឿងបែបនេះកើតឡើង។ ក្រសួងមិនចង់ថា មុនធ្វើអ្វីមួយត្រូវមកឆ្លងទេ។ បើគ្រប់ស្នាដៃត្រូវតែមកឆ្លងក្រសួង គេថាក្រសួងមិនបើកសិទ្ធិ ប៉ុន្តែពេលមិនមកឆ្លងគឺចេញមកបែបនេះ។ ចំពោះឈុតតំណាងឱ្យខេត្តស្ទឹងត្រែង ខ្ញុំសុំឱ្យអ្នករៀបចំកម្មវិធីនោះ គេបកស្រាវវិញ ព្រោះគេដឹងពីកម្មវិធីនោះច្បាស់»។ នេះជាការបញ្ជាក់បន្ថែមពីលោក ឡុង ប៉ុណ្ណាសិរីវត្ថ។
សូមបញ្ជាក់ថា ឈុតតំណាងឱ្យខេត្តស្ទឹងត្រែង ក្នុងកម្មវិធី Miss Grand Cambodia 2022 គឺឈុតព្រះម៉ែនាគគោមនោ ដោយបង្ហាញពីជំនៀរបស់ប្រជាជនរស់នៅតាមដងទន្លេមេគង្គ ចំពោះស្ដេចនាគដែលបានថែរក្សាប្រជាជនខ្មែរ។ ទោះជាយ៉ាងណា រដ្ឋបាលខេត្តស្ទឹងត្រែង សុំឱ្យអ្នករៀបចំកម្មវិធី Miss Grand Cambodia 2022 បកស្រាយរាល់ឈុតនីមួយៗ ដែលបេក្ខនារីតំណាងខេត្តស្ទឹងត្រែងស្លៀក៕