អន្តរជាតិ
នយោបាយអន្តរជាតិ
អាល្លឺម៉ង់ ប្រាប់ស៊ែប៊ីឱ្យត្រូវតែជ្រើសរើសរវាងអឺរ៉ុបនិងរុស្ស៊ី អធិការបតីអាល្លឺម៉ង់ Olaf Scholz (ឆ្វេង) និងប្រធានាធិបតីស៊ែប៊ី Aleksander Vucic នាជំនួបកន្លងមក។ រូបថត Xinhua
× អាល្លឺម៉ង់នៅថ្ងៃទី១ ខែវិច្ឆិកាប្រាប់ស៊ែប៊ីឱ្យសម្រេចចិត្តចូលរួមជាមួយសហភាពអឺរ៉ុប (EU) ឬចូលដៃចូលជើងជាមួយរុស្ស៊ី។ អាល្លឺម៉ង់ ក៏គំរាមពីការខាតបង់ការគាំទ្រពីអាល្លឺម៉ង់ ប្រសិនបើដើរតាមរុស្ស៊ី។
«តម្រូវការសម្រាប់ការសម្រេចចិត្តគឺកំពុងតែឈានចូលមកដល់ដោយសារការអភិវឌ្ឍភូមិសាស្ត្រនយោបាយ»។ ទីភ្នាក់ងារព័ត៌មាន Reuter ស្រង់សម្ដីមន្រ្តីជាន់ខ្ពស់រដ្ឋាភិបាលអាល្លឺម៉ង់ម្នាក់បានលើកឡើងបែនេះ។
បើតាមមន្ត្រីរដ្ឋាភិបាលអាល្លឺម៉ង់ដដែល ប្រធានាធិបតីស៊ែប៊ី Aleksandar Vucic បានដឹងយ៉ាងច្បាស់អំពីជំហររបស់លោកផ្ទាល់ ហើយប្រសិនបើលោក Vucic ដឹកនាំប្រទេសតាមទិសដៅនៃ EU លោក Vucic នឹងទទួលបានការគាំទ្រពីអាល្លឺម៉ង់។ ផ្ទុយទៅវិញ ប្រសិនបើស៊ែប៊ីសម្រេចដើរតាមទិសដៅផ្សេងនោះ ស៊ែប៊ីនឹងទទួលបានលទ្ធផលផ្ទុយជាក់ជាមិនខាន។
ខណៈកំពុងស្វែងរកការចូលរួមជាមួយ EU នោះ ស៊ែប៊ីក៏កំពុងព្យាយាមធ្វើឱ្យមានតុល្យភាពទំនាក់ទំនងជិតស្និទ្ធជាប្រវត្តិសាស្ត្រជាមួយរុស្ស៊ីផងដែរ ដែលវាដើរផ្ទុយពីបំណងធ្វើសមាហរណកម្មសេដ្ឋកិច្ច និងនយោបាយជាមួយលោកខាងលិច។
ការព្រមានរបស់អាល្លឺម៉ង់ ធ្វើឡើងមុនជំនួបមួយនៅបែរឡាំងដែលស៊ែប៊ីរំពឹងមានវត្តមានដែរ។ ស៊ែប៊ី ហាក់មិនសូវអើពើអនុវត្តទណ្ឌកម្មលើរុស្ស៊ីចំពោះការឈ្លានពានឡើយ ដែលវាធ្វើឱ្យប៉ះពាល់ការចូលសមាជិកអឺរ៉ុបដែលខ្លួនបានដាក់ពាក្យតាំងពីឆ្នាំ២០១២៕
Tag:
អាល្លឺម៉ង់
ស៊ែប៊ី
រុស្ស៊ី
© រក្សាសិទ្ធិដោយ thmeythmey.com