កាលពីឆ្នាំមុន ប្រធានាធិបតីអាម៉េរិក ចូ បៃដិន និងសមភាគចិន ស៊ី ជិនភីង ព្រមព្រៀងលើកិច្ចចរចាគ្រប់គ្រងអាវុធរវាងប្រទេសទាំងពីរ។ ប៉ុន្តែ មកទល់ពេលនេះក្រុងវ៉ាស៊ីនតោនបញ្ជាក់ថា ក្រុងប៉េកាំងនៅតែមិនចាប់អារម្មណ៍ចូលតុពិភាក្សាសោះ ដោយអះអាងថាខ្លួនមានឃ្លាំងអាវុធនុយក្លេអ៊ែរតិចជាងអាម៉េរិកឆ្ងាយណាស់។

 

បើតាមមន្ទីរបញ្ចកោណ ចិនកំពុងពង្រីកកងកម្លាំងនុយក្លេអ៊ែររបស់ខ្លួន ហើយកំពុងព្យាយាមសម្រេចឱ្យបាន១ពាន់ក្បាលគ្រាប់នុយក្លេអ៊ែរត្រឹមឆ្នាំ២០៣០។ បើតាមរបាយការណ៍របស់វិទ្យាស្ថានស្រាវជ្រាវសន្តិភាពអន្តរជាតិក្រុងស្តុកខុល (SIPRI) បច្ចុប្បន្នចិនមានក្បាលគ្រាប់នុយក្លេអ៊ែរក្នុងដៃចំនួន ៣៥០។ 

 

«ជាជំហានដំបូង យើងពិតជាចង់សន្ទនាជាមួយពួកគេអំពីគោលនយោបាយបរទេសគ្នាទៅវិញទៅមក អំពីទំនាក់ទំនងរឿងវិបត្តិ អំពីការគ្រប់គ្រងវិបត្តិ»។ ឧបការីរងរបស់រដ្ឋមន្រ្តីការបរទេសអាម៉េរិកទទួលបន្ទុកការគ្រប់គ្រងអាវុធ លោក Alexandra Bell ប្រាប់ស្ថាប័នគោលនយោបាយ Atlantic Council បែបនេះនៅថ្ងៃទី១ ខែវិច្ឆិកា។

 

លោក Bell បន្ថែមទៀតថា ក្រុងវ៉ាស៊ីនតោនមានកិច្ចចរចាបែបនោះជាមួយរុស្ស៊ីជាច្រើនទសវត្សរ៍មកហើយ ប៉ុន្តែនៅឡើយតែជាមួយចិនទេប៉ុណ្ណោះ។ បើតាមមន្រ្តីអាម៉េរិករូបនេះ ក្រុងវ៉ាស៊ីនតោនមិនចាំបាច់រំឭកម្តងហើយម្តងទៀតថាភាគីទាំងពីរត្រូវចូលតុសន្ទនាជាមួយគ្នាទេ ពីព្រោះឥឡូវចូលខួបទី៦០នៃវិបត្តិមីស៊ីលគុយបាហើយ។ កាលពីឆ្នាំ១៩៦២ អាម៉េរិក និងសហភាពសូវៀតស្ទើរតែធ្លាក់ចូលសង្រ្គាមនុយក្លេអ៊ែរដោយសារតែវត្តមានមីស៊ីលសូវៀតនៅគុយបាដែលជាប់របងផ្ទះអាម៉េរិក។

 

ជុំវិញបញ្ហានេះ មិនត្រឹមតែមិនចង់ចរចាទ្វេភាគីជាមួយអាម៉េរិកទេ មេដឹកនាំចិន លោក ស៊ី លើកឡើងកាលពីសមាជបក្សកុម្មុយនីស្តចិនខែមុនថា ក្រុងប៉េកាំងនឹងពង្រឹងការទប់ទល់ជាយុទ្ធសាស្រ្តរបស់ខ្លួនដែលចង់សំដៅលើការអភិវឌ្ឍអាវុធនុយក្លេអ៊ែរ៕