រយៈពេលមួយសប្ដាហ៍នេះ កម្ពុជានឹងទទួលរងឥទ្ធិពលពីទ្រនុងសម្ពាធខ្ពស់ពីចិន និងខ្យល់មូសុងឥឦសានក្នុងកម្រិតបង្គួរទៅខ្លាំង។ ស្ថានភាពបែបនេះអាចធ្វើឱ្យខេត្តចំនួន៨ ចុះត្រជាក់ចន្លោះពី១៦ទៅ១៩ អង្សាសេ។
 

បើតាមការព្យាកររបស់ក្រសួងធនធានទឹក ​ចាប់ពីថ្ងៃទី១៤-២០ ខែធ្នូ តំបន់ទំនាបកណ្ដាល នឹងអាចចុះត្រជាក់ក្នុងរង្វង់ពី១៩ដល់១៦អង្សា។ ក្នុងនោះរួមមានខេត្តបន្ទាយមានជ័យ ប៉ៃលិន សៀមរាប និងខេត្តបាត់ដំបង។
 

ចំណែក​តំបន់ខ្ពង់រាប សីតុណ្ណភាពអប្បបរមា នឹងអាចចុះត្រជាក់ក្នុងរង្វង់ពី១៨ទៅ១៦ អង្សាសេ នៅខេត្តមណ្ឌលគិរី រតនគិរី ព្រះវិហារ និងខេត្តឧត្តរមានជ័យ។ ចំពោះតំបន់មាត់សមុទ្រវិញ សីតុណ្ណភាពអប្បរមា នឹងអាចចុះត្រជាក់ក្នុងរង្វង់ពី២០ទៅ១៨អង្សាសេ។ នៅលើផ្ទៃសមុទ្រ អាចមានរលកកម្រិតពីមធ្យមទៅបង្គួរ។
 

ក្រសួង​ធនធានទឹក ក៏​បាន​អំពាវនាវដល់​ពលរដ្ឋ ជាពិសេស​កង​ទ័ព​ដែលរស់នៅ និង​ឈរជើង​​នៅ​តំបន់​ជួរ​ភ្នំដងរែក និង​ខ្ពង់​រាប​ឦសាន​ រួមទាំង​ប្រជានេសាទ​ ត្រូវ​យក​ចិត្ត​ទុក​ដាក់ចំពោះ​​ស្ថាន​ភាព​ចុះ​ត្រជាក់នេះ៕