ជាតិ
ផ្សោតសមុទ្រទម្ងន់៩០គីឡូក្រាមបានងាប់ ដោយសារជាប់មងអ្នកនេសាទនៅខេត្តកំពត សត្វផ្សោតសមុទ្រមួយក្បាលទម្ងន់៩០គីឡូក្រាមត្រូវបានងាប់បន្ទាប់ពីជាប់មងអ្នកនេសាទនៅខេត្តកំពត
× ភ្នំពេញ៖ ផ្សោតក្បាលត្រងោលទម្ងន់៩០គីឡូក្រាមមួយក្បាលបានងាប់ ក្រោយជាប់មងអ្នកនេសាទនៅក្នុងខេត្តកំពត នៅថ្ងៃទី១៣ ខែធ្នូ ឆ្នាំ២០២២។ មន្ត្រីជំនាញជលផលថា នេះជាលើកទីមួយដែលមានករណីសត្វផ្សោតជាប់មង និងបណ្ដាលឱ្យងាប់បែបនេះ។
នៅពេលទទួលបានដំណឹងសត្វផ្សោតសមុទ្រជាប់មងអ្នកនេសាទ ក្រុមការងារនាយរងខណ្ឌរដ្ឋបាលជលផលកំពត រួមទាំងអង្គការWEA និងគណកម្មការសហគមន៍នេសាទត្រពាំងរពៅបានចុះមើលសត្វផ្សោត១ក្បាលនោះ។ អ្នកស្រី ទុំ សុភាព នាយរងរដ្ឋបាលខណ្ឌជលផលខេត្តកំពត បានប្រាប់សារព័ត៌មានThmeyThmey25ថា ផ្សោតនេះ មានប្រវែង១.៨ម៉ែត្រ ទទឹង ០.៤ម៉ែត្រ និងមានទម្ងន់៩០ គីឡូក្រាម ត្រូវបានងាប់ដោយសារជាប់ត្រីការ៉ាវ ស្ថិតត្រង់ចំណុចព្រែកជីក ក្នុងភូមិត្រពាំងរពៅ សង្កាត់ព្រែកត្នោត ក្រុងបូកគោ។
សត្វផ្សោតសមុទ្រមួយក្បាលទម្ងន់៩០គីឡូក្រាមត្រូវបានងាប់បន្ទាប់ពីជាប់មងអ្នកនេសាទនៅខេត្តកំពត។ រូបភាពដោយ៖ អ្នកស្រី ទុំ សុភាព។
នាយរងខាងលើបានបញ្ជាក់ថា កន្លងមកកម្លាំងជលផលខេត្តកំពតមិនធ្លាប់ប្រទះករណីបែបនេះឡើយ នេះអាចជាលើកទីមួយសម្រាប់ការបាត់បង់។ អ្នកស្រី បន្ថែមថា ធាតុពិតអ្នកនេសាទបានព្យាយាមជួយសង្គ្រោះដែរ ប៉ុន្ដែដោយសារគ្មានឧបករណ៍គ្រប់គ្រាន់ទើបធ្វើឱ្យបរាជ័យ។
«ផ្សោតនោះចូលមកក្នុងដែននេសាទរបស់ពលរដ្ឋ ទើបបណ្ដាលឱ្យជាប់មង។ ពេលនោះគាត់ព្យាយាមជួយសង្គ្រោះដែរ ប៉ុន្ដែមិនទាន់ពេល។ បើអាចជួយសង្គ្រោះមុនពេល១០នាទីប្រហែលមានសង្ឃឹម។ ផ្សោតនោះយើងមិនអនុញ្ញាតិឱ្យបរិភោគឡើយ ហើយពេលនេះវាត្រូវបានយកទៅកប់ហើយ»។ នេះជាការបញ្ជាក់របស់អ្នកស្រី សុភាព។
សត្វផ្សោតសមុទ្រមួយក្បាលទម្ងន់៩០គីឡូក្រាមត្រូវបានងាប់បន្ទាប់ពីជាប់មងអ្នកនេសាទនៅខេត្តកំពត។ រូបភាពដោយ៖ អ្នកស្រី ទុំ សុភាព។
បន្ទាប់ពីបានប្រទះករណីខាងលើ មន្ត្រីជលផលបានអប់រំ និងបញ្ជា្របចំណេះទាក់ទងការថែរក្សានិងអភិរក្សធនធានទាំងនោះបន្ថែមទៀត។ បន្ថែមលើនេះ ត្រូវបង្កើនការប្រុងប្រយ័ត្ន ក្នុងការប្រើប្រាស់ឧបករណ៍នេសាទមួយចំនួនទៅលើទីតាំងដែលសម្បូរសត្វផ្សោត និងជាការរួមចំណែកជួយរក្សាសុវត្ថិភាព និងរក្សាជីវិតរបស់សត្វសមុទ្រផងដែរ។
អ្នកស្រី សុភាព លើកឡើងដូច្នេះ៖ « យើងត្រូវការការចូលរួមពីអ្នកទាំងអស់គ្នា។ បច្ចុប្បន្នសត្វផ្សោតមាននៅសល់មិនច្រើនទេ ដូច្នេះការចូលរួមស្រឡាញ់ ថែរក្សា ការពារ និងអភិរក្សជារឿងសំខាន់បំផុត សម្រាប់ដំណាក់កាលនេះ»៕
Tag:
ផ្សោតសមុទ្រ
ខេត្តកំពត
ជាប់មង
© រក្សាសិទ្ធិដោយ thmeythmey.com