ជាតិ
ក្រសួងទេសចរណ៍បកស្រាយថា រូបភាពនៃអច្ឆរិយភាពទាំង១០ មានខ្លះទិញសិទ្ធិត្រឹមត្រូវ ខ្លះយកពី Open Source រូបភាព៖ ក្រសួងទេសចរណ៍
× ភ្នំពេញ៖ ក្រោយពីក្រសួងទេសចរណ៍ បង្ហោះរូបភាពចំនួន ១០សន្លឹក ដែលផ្សព្វផ្សាយពីសារខ្លីៗនៃអច្ឆរិយភាពទាំង១០ នៃយុទ្ធនាការ «ឆ្នាំទស្សនាកម្ពុជា ២០២៣» ក៏មានសាធារណជនមិនតិចទេ ចូលខមិនរិះគន់ អំពីរូបភាព ថាប្រើប្រាស់រូបភាពមិនត្រឹមត្រូវ និងរំលោភលើកម្មសិទ្ធិបញ្ញាជាដើម។ ជុំវិញបញ្ហានេះ ក្រសួងទេសចរណ៍ បកស្រាយថា រូបភាពខ្លះនៃយុទ្ធនាការទាំងនោះ បានទិញសិទ្ធិប្រើប្រាស់ និងខ្លះយកពីប្រភពបើកចំហ(Open Source)។
កាលពីថ្ងៃទី៣១ ខែមីនា កន្លងទៅ ក្រសួងទេសចរណ៍បានបង្ហោះរូបភាពចំនួន ១០សន្លឹក ដោយផ្សារភ្ជាប់សារខ្លីៗ នៃអច្ឆរិយភាពទាំង១០ របស់យុទ្ធនាការ «ឆ្នាំទស្សនាកម្ពុជា ២០២៣» ក្រោមពាក្យស្លោក «គ្រប់ថ្ងៃគឺជាអច្ឆរិយភាព» ដែលខ្លឹមសារទាំងនេះគឺជាផ្នែកមួយនៃវិធានការគោលនយោបាយអនុវត្តយុទ្ធនាការ។ ការផ្សព្វផ្សាយនេះ គឺមានគោលបំណងផ្សព្វផ្សាយអំពីសក្តានុពល ទេសចរណ៍ សំដៅស្ដារ និងលើកស្ទួយវិស័យទេសចរណ៍កម្ពុជា បន្ទាប់ពីទទួលរងផលប៉ះពាល់ពីវិបត្តិជំងឺកូវីដ-១៩។
បន្ទាប់ពីការបង្ហោះ ក្រសួងទេសចរណ៍ បានទទួលនូវមតិរិះគន់ និងប្រតិកម្មពីសាធារណជន ដោយចោទប្រកាន់ថា ប្រើប្រាស់រូបភាពមិនត្រឹមត្រូវ និងរំលោភលើកម្មសិទ្ធិបញ្ញាជាដើម។ ទន្ទឹមនឹងនេះ ក្រសួងទេសចរណ៍ ក៏បានបំភ្លឺថា រូបភាពមួយចំនួនបានស្នើសុំទិញសិទ្ធិប្រើប្រាស់។ ចំពោះ រូបភាពមួយចំនួនទៀត បានមកពីកម្មវិធីប្រកួតប្រជែងរូបភាព ដែលរៀបចំឡើងដោយក្រសួងផ្ទាល់។ រីឯរូបភាពដទៃទៀត គឺទទួលបានពីប្រភពបើកចំហ (Open Source) ដែលអនុញ្ញាតឱ្យសាធារណជនទាញយកដោយសេរី និងស្របច្បាប់។
ក្នុងសេចក្ដីបំភ្លឺ ក្រសួងទេសចរណ៍ លើកឡើងថា រូបភាពដែលប្រើប្រាស់ក្នុងយុទ្ធនាការនោះ គឺជារូបភាពដើមរបស់កម្ពុជា។ បន្ថែមលើការបកស្រាយ ក្រសួងទេសចរណ៍ ក៏បានអំពាវនាវឱ្យសាធារណជន ឈប់ចែកចាយបន្ត និងកែតម្រូវការបង្ហោះ ដោយផ្សព្វផ្សាយព័ត៌មានដែលមិនត្រឹមត្រូវទាំងនេះតទៅទៀត ដើម្បីចៀសវាងបង្កផលប៉ះពាល់ ដល់កិត្តិយស សេចក្តីថ្លៃថ្នូរ នៃប្រទេសជាតិទាំងមូលផងដែរ៕
Tag:
ក្រសួងទេសចរណ៍
«ឆ្នាំទស្សនាកម្ពុជា២០២៣»
© រក្សាសិទ្ធិដោយ thmeythmey.com