ដោយ៖ ទូច សូរិយា
ភ្នំពេញ៖ រដ្ឋបាលរាជធានីភ្នំពេញ នឹងរៀបចំព្រឹត្តិការណ៍សង្រ្កាន្តវត្តភ្នំ ពីថ្ងៃទី១៤ ដល់ថ្ងៃទី១៦ ខែ មេសា ដើម្បីអបអរពិធីបុណ្យចូលឆ្នាំខ្មែរ នៅរមណីយដ្ឋាន វប្បធម៌ប្រវត្តិសាស្រ្តវត្តភ្នំ។ នេះបើតាមសេចក្ដីជូនដំណឹងចេញផ្សាយថ្ងៃទី៥ មេសា។
ដើម្បីអបអរសាទរពិធីបុណ្យចូលឆ្នាំថ្មី និងបង្កើតភាពរីករាយដល់ពលរដ្ឋ និងភ្ញៀវទេសចរនៅរាជធានីភ្នំពេញ រដ្ឋបាលរាជធានីភ្នំពេញ នឹងរៀបចំព្រឹត្តិការណ៍សង្រ្កាន្តវត្តភ្នំ ចាប់ពីថ្ងៃទី១៤ ដល់ថ្ងៃទី១៦ ខែ មេសា ពីម៉ោង៨ព្រឹក-៨យប់។ ក្នុងព្រឹត្តិការណ៍សង្រ្កាន្តនេះ នឹងមានកម្មវិធីវប្បធម៌ ប្រពៃណីជាច្រើន ដូចជាពិធីគោរពទីទួលដូនពេញ, ពូនភ្នំខ្សាច់, ស្រង់ព្រះ, សម្តែងសិល្បៈរបាំត្រុដិ, ការតាំងបង្ហាញគំនូរសិល្បៈ, ការប្រគំតន្រ្តីបុរាណ-សម័យ, តាំងបង្ហាញគំនូរបុរាណ និងវត្ថុសិល្បៈវប្បធម៌។
ក្រៅពីនេះ ក៏មានកម្មវិធីកម្សាន្តជាច្រើន រួមមាន ទាញព្រ័ត្រ បោះអង្គញ់ វាយក្អម ចោលឈូង លាក់កន្សែង ដណ្ដើមស្លឹកឈើ និងល្បែងប្រជាប្រិយផ្សេងៗទៀត។ បន្ថែមពីនេះ អាជ្ញាធរ កំពុងមមារៀបចំតុបតែងកម្មវិធីសង្រា្កន្ត សណ្តាប់ធ្នាប់ សុខសុវត្ថិភាព និងសន្តិសុខដល់អ្នកចូលរួមផងដែរ។
សូមបញ្ជាក់ថា ក្រៅពីរមណីយដ្ឋានវត្តភ្នំ នៅវិមានឈ្នះ-ឈ្នះ ក៏មានរៀបចំសង្រ្កាន្តដែរ ខណៈនៅតាមបណ្តាខេត្តដូចជាសៀមរាប, កំពង់ស្ពឺ, កំពង់ឆ្នាំង, ស្វាយរៀ, កំពត, កែប, ព្រះសីហនុ, រតនគិរី, កណ្តាល, កំពង់ធំ, បន្ទាយមានជ័យ , បាត់ដំបង និងខេត្តពោធិ៍សាត់ ក៏ប្រកាសរៀបចំព្រឹត្តិការណ៍សង្រ្កាន្តដែរ៕