អតីតសាស្រ្តាចារ្យផ្នែកភាសាអង់គ្លេសរូបនេះ បានចែករំលែកនូវគោលការណ៍ទាំង១០ របស់ខ្លួនដូចជា  គោលបំណងជីវិត, កំណត់អាទិភាពក្នុងចំណោមអាទិភាព , ការតាំងចិត្តឱ្យស្ងប់, ការស្រឡាញ់ថែទាំខ្លួន ដើម្បីប្រយោជន៍រួម, ការបង្វែបញ្ហាឱ្យទៅជាឱកាស , ការយកគ្រប់គ្នាជាគ្រូ , រៀនខ្លួនឯងខ្លះ និងជាក្រុមខ្លះ , ទ្រឹស្តី៥១ទល់នឹង៤៩, ដើរលើដីតែកុំដើរលើពពក និងសិក្សាពេញមួយជីវិត។ 

 

 

បើតាមអតីតនិស្សិតពីសហរដ្ឋអាម៉េរិករូបនេះ ការដឹងច្បាស់ពីគោលបំណងជីវិត នឹងនាំឱ្យបុគ្គលខ្លួនឯងអាចដឹងថា ខ្លួនឯងចង់ដើរឱ្យទៅដល់ទីណា ហើយតាមវិធីណា? ក៏ដូចជាផ្លូវណា? 

លោក រស់ សុវាចា បន្ថែមថា ៖ « ទោះបីបុគ្គលពូកែប៉ុណ្ណាក៏ដោយ បើសិនតាំងចិត្តមិនបានស្ងប់ទេ អាចនឹងមានបញ្ហាច្រើនជាង អ្នកដែលអាចតាំងចិត្តស្ងប់ ក្នុងការបំពេញការងារមួយណាក៏ដោយ» ។   

 

អតីតបុគ្គលិកនៃអង្គការសហប្រជាជាតិរូបនេះ លើកយកឃ្លាមួយគឺ «ការស្រឡាញ់ថែទាំខ្លួន ដើម្បីបំរើប្រយោជន៍រួម» មានន័យថា  ការស្រឡាញ់ខ្លួនតែងមានន័យច្រើនសម្រាប់មនុស្សផ្សេងគ្នា តែសម្រាប់លោកផ្ទាល់ ការស្រឡាញ់ខ្លួនគឺជាការថែទាំសុខភាព ដោយឆ្លៀតហាត់ប្រាណ ដើម្បីផ្តល់ថាមពលទៅដល់រាងកាយយើងផង ហើយនឹងប្រាជ្ញារបស់យើងផង។ 

 

 

ជាពិសេសត្រូវចេះបង្វែបញ្ហាប្រឈឱ្យទៅជាឱកាស! អ្នកនាំពាក្យក្រសួងអប់រំ យុវជន និងកីឡារូបនេះ បានពោលបន្ថែមដូច្នេះ៖ « ខ្ញុំផ្ទាល់បានយកគ្រប់គ្នាជាគ្រូ ព្រោះខ្ញុំយល់ឃើញថា គ្មានមនុស្សណាអាក្រក់ ឬ ល្អតែម្តងទេ។  គ្រប់មនុស្សទាំងអស់សុទ្ធតែមានភាពល្អ និងអាក្រក់នៅជាមួយខ្លួនតែមួយ។ អ៊ីចឹងទេ ខ្ញុំប្រាប់ខ្លួន​ឯងថា ទាំងអស់គ្នាជាគ្រូរបស់ខ្ញុំ ហើយត្រូវយកឱកាសរៀនសូត្រពីភាពល្អ របស់អ្នកនោះមកដាក់ ដើម្បីភាពប្រសើរដល់ខ្លួនឯង»។ 
 

បន្ថែមពីនេះទៀត វាគ្មិនខាងលើដដែល បានលើកពីទ្រឹស្តីផ្ទាល់ខ្លួនដែរថា  ៥១ ទល់នឹង ៤៩ លោក សង្កត់ធ្ងន់បែបនេះ៖ «៥១សម្រាប់ខ្ញុំជាសំឡេងគាំទ្រ និងលើកទឹកចិត្ត ព្រោះថា ក្នុងជីវិតយើងគ្រប់គ្នានេះ អត់មានអ្នកណាដែលត្រូវទាំងអស់ទេ ហើយក៏អត់មានអ្វី ដែលអាចផ្គាប់ចិត្តមនុស្សបានទាំងអស់គ្នាដែរ។ អ៊ីចឹង សម្រាប់ខ្ញុំ បើមានសំឡេងគាំទ្រតែ ៥១% ខ្ញុំសប្បាយចិត្តក្នុងការធ្វើបន្តទៀតហើយ  តែបើ៤៩%ទៀតគឺជាមនុស្សដែលចាំតែទើសយើង ទោះបីជាយើងធ្វើអីក៏ដោយក៏នៅតែមានកន្លែងឆ្គងមិនត្រូវចិត្តទេ។ អ៊ីចឹង ខ្ញុំប្រាប់ខ្លួនឯងថា បើក្នុងន័យស្ថាបនា ខ្ញុំនឹងទទួលហើយធ្វើការកែលម្អ ដើម្បីឱ្យបានកាន់តែប្រសើរ  តែបើជាការនិយាយបែបជាន់ពន្លេច ខ្ញុំនឹងមិនទុកក្នុងចិត្តទេ ដើម្បីឱ្យអារម្មណ៍យើងស្រួលធ្វើការទៅមុខទៀត»។ 
 

ចំណុចទាំងនេះ សុទ្ធតែជាគោលការណ៍ដែលលោក រស់ សុវាចា បានអនុវត្តកន្លងមក។ ក្រៅពីចំណុចទាំងនេះ លោកតែងប្រកាន់យកភាពត្រឹមត្រូវ និងពន្លឿនការឆ្លើយតបទៅកាន់បណ្តាសារព័ត៌មានក្នុងស្រុក  តាមរយៈការប្រមូលប្រភពព័ត៌មាននានា៕