សង្គមអន្តរជាតិ
អន្តរជាតិ
មនុស្ស ៣៩នាក់ត្រូវបានចាប់ខ្លួន ក្នុងការវាយប្រហារប៉ុស្តឹ៍ប៉ូលិសនៅវៀតណាម ជនសង្ស័យត្រូវបានចាប់ខ្លួនក្នុងព្រឹត្តិការណ៍វាយប្រហារប៉ុស្តឹ៍បូលិសនៅខេត្ត Dak Lak ។ រូបភាពពី ៖ Công an Nhân dân online ។
× នៅថ្ងៃទី១៣ ខែមិថុនា លោកឧត្តមសេនីយទោ To An Xo អ្នកនាំពាក្យក្រសួងនគរបាលវៀតណាមបាននិយាយថា ក្រៅពីមនុស្សចំនួន ៣៩នាក់ដែលត្រូវបានចាប់ខ្លួនក្នុងរយៈពេលបីថ្ងៃកន្លងមកនេះ កម្លាំងកំពុងបន្តស្វែងរកជនសង្ស័យដែលនៅសេសសល់។
«បច្ចុប្បន្នមិនមានស្ថិតិជាក់លាក់ណាមួយអំពីចំនួនមនុស្សដែលលាក់ខ្លួននោះទេ» ។ អ្នកនាំពាក្យដដែលបន្តបែបនេះ។ ជាមួយគ្នានេះ នគរបាលខេត្ត Dak Lak កំពុងអំពាវនាវឲ្យជនល្មើសឆាប់ចេញមកសារភាពកំហុស ដើម្បីទទួលបានការបន្ធូរបន្ថយទោស ។
កាលពីវេលាទៀបភ្លឺនាថ្ងៃទី១១ ខែមិថុនា មនុស្សមួយក្រុម បានប្រើកាំភ្លើង និងអាវុធផ្សេងៗដើម្បីវាយប្រហារ និងបំផ្លាញទីស្នាក់ការគណៈកម្មាធិការប្រជាជន ការិយាល័យនគរបាលនៅឃុំ Ea Tieu និង Ea Ktur ក្នុងស្រុក Cu Kuin ខេត្ត Dak Lak។ ជាលទ្ធផល ប៉ូលិស៤នាក់ មន្ត្រីឃុំ២នាក់និងប្រជាជន ៣នាក់បានស្លាប់ ព្រមទាំងមន្ត្រីនគរបាល២នាក់របួសធ្ងន់។
ភ្លាមៗនោះ ក្រសួងនគរបាលវៀតណាមបានបញ្ជាឱ្យអង្គភាពជំនាញ ធ្វើការសម្របសម្រួលជាមួយនគរបាលខេត្ត Dak Lak ដើម្បីចាប់ខ្លួនជនសង្ស័យ ក្នុងនោះក៏មានកងកម្លាំងយោធាបានសហការប្រតិបត្តិការប្រយុទ្ធបន្ទាន់ផងដែរ ។
បើតាមសារព័ត៌មាន VnExpress មន្ត្រីពាក់ព័ន្ធក្នុងផែនការការពារគោលដៅ និងចាប់ខ្លួនជនសង្ស័យ កម្លាំងនគរបាលចល័តប្រចាំតំបន់ ក្រសួងនគរបាល និងបញ្ជាការដ្ឋានកងរាជអាវុធហត្ថខេត្ត Dak Lak នៅតែបន្តរៀបចំកងវរសេនាតូចប្រដាប់អាវុធ កំណត់តំបន់ជុំវិញដែលប្រមូលផ្តុំដោយក្រុមឃាតករ ដើម្បីចាប់ខ្លួនក្រុមសង្ស័យបន្ថែមទៀត។
គួរបញ្ជាក់ថា តំបន់ខ្ពង់រាបភាគកណ្តាលដែលមានជនជាតិភាគតិចមួយចំនួន ត្រូវបានចាត់ទុកជាតំបន់រសើបសម្រាប់រដ្ឋាភិបាលវៀតណាម និងជាតំបន់ក្តៅគគុកយូរណាស់មកហើយជុំវិញបញ្ហាដីធ្លី៕
Tag:
វៀតណាម
វាយប្រហារ
ចាប់ខ្លួន
© រក្សាសិទ្ធិដោយ thmeythmey.com