ជាតិ
នយោបាយជាតិ
EU៖ «យើងត្រូវការសិទ្ធិមនុស្សគ្រប់កន្លែង គ្រប់ពេលវេលា» រដ្ឋមន្ត្រីការបរទេសនៃសហភាពអឺរ៉ុប លោកស្រី Federica Mogherini
× នៅក្នុងទិវាគោរពសិទ្ធិមនុស្សអន្តរជាតិ១០ធ្នូនេះ ថ្មីៗសូមចុះផ្សាយសេចក្តីថ្លែងការណ៍ទាំងស្រុងរបស់ប្រមុខការទូតសហភាពអឺរ៉ុប លោកស្រី ហ្វេដេរីកា ម៉ូកហេរីនី (Federica Mogherini)។
ថ្ងៃនេះយើងប្រារព្ធទិវាសិទ្ធិមនុស្ស ដើម្បីអបអរការអនុម័តរបស់មហាសន្និបាតអង្គការសហប្រជាជាតិលើ សេចក្តីប្រកាសជាសកលស្តីពីសិទ្ធិមនុស្សកាលពី ៦៦ឆ្នាំកន្លងមកនេះ។ ប្រធានបទសម្រាប់ទិវាសិទ្ធិមនុស្សអន្តរជាតិ ក្នុងឆ្នាំនេះគឺ សិទ្ធិមនុស្ស ៣៦៥ (Human Rights 365) ដែលឆ្លុះបញ្ចាំងអំពីបំណងប្រាថ្នារបស់យើងទាំងអស់គ្នានៅក្នុងទទួលបានសិទ្ធិមនុស្សពេញលេញនៅគ្រប់ទីកន្លែង និងគ្រប់ពេលវេលា។
សហភាពអឺរ៉ុបប្តេជ្ញាគាំទ្រដល់សិទ្ធិទាំងអស់នេះ។ កាលពីពីរឆ្នាំមុនយើងបានអនុម័តក្របខ័ណ្ឌយុទ្ធសាស្ត្រ ស្តីពីសិទ្ធិមនុស្ស និងប្រជាធិបតេយ្យ ដែលរួមជាមួយនឹងផែនការសកម្មភាពនៃក្របខ័ណ្ឌនេះ យើងបានតែងតាំងតំណាងពិសេសរបស់សហភាពអឺរ៉ុបទទួលបន្ទុកសិទ្ធិមនុស្ស។ ចាប់តាំងពីពេលនោះមកដោយមានការគាំទ្រពីបណ្តារដ្ឋជាសមាជិក យើងបានធ្វើការតស៊ូមតិផ្នែកសិទ្ធិមនុស្សនៅក្នុងការពិភាក្សាស្តីពីសិទ្ធិមនុស្ស ចំនួន ៤០លើកជាមួយប្រទេសតតិយលោក ហើយយើងបានចូលរួមជាមួយអង្គការក្នុងតំបន់ និងទេ្វភាគី ដែលរួមមានអង្គការសហប្រជាជាតិផងដែរ។
តំណាងពិសេសរបស់សហភាពអឺរ៉ុបលោក Stavros Lambrinidis មានទំនាក់ទំនងយ៉ាងជិតស្និទ្ធ និងយ៉ាងសកម្មជាមួយដៃគូសំខាន់ៗ និងគាំទ្រដល់តួនាទីរបស់អង្គការសង្គមស៊ីវិលនៅទូទាំងពិភពលោក។ ប្រតិភូសហភាពអឺរ៉ុបបានត្រួតពិនិត្យ រាយការណ៍ និងអនុវត្តវិធានការលើបញ្ហាសិទ្ធិមនុស្ស ដែលពេលខ្លះស្ថិតនៅក្រោមកាលៈទេសៈដ៏លំបាក។
យើងបានសម្រេចលទ្ធផលជាច្រើន ប៉ុន្តែនៅមានកិច្ចការជាច្រើនដែលយើងត្រូវបន្តអនុវត្ត។ កិច្ចការមួយក្នុងចំណោមកិច្ចការទាំងនេះគឺពាក់ព័ន្ធនឹងការធ្វើទារុណកម្ម។ អនុសញ្ញាប្រឆាំងនឹងការធ្វើទារុណកម្មត្រូវបាន អង្គការសហប្រជាជាតិអនុម័តនៅថ្ងៃនេះកាលពី ៣០ឆ្នាំមុន ប៉ុន្តែទោះជាយ៉ាងនេះក្តី នៅតែមានការធ្វើទារុណកម្ម ជាច្រើននៅជុំវិញពិភពលោកនៅឡើយ ហើយកត្តានេះ តម្រូវឲ្យយើងផ្តោតការយកចិត្តទុកដាក់ជាបន្ទាន់ផងដែរ។
ការបន្តផែនការសកម្មភាពស្តីពីសិទ្ធិមនុស្ស និងប្រជាធិបតេយ្យសម្រាប់ឆ្នាំ២០១៥ គឺជាឱកាសក្នុងការបន្តការប្តេជ្ញាចិត្តរបស់យើង និងដោះស្រាយបញ្ហាប្រឈមថ្មីៗចំពោះភាពជាសកល និងភាពមិនអាចកាត់ផ្តាច់បាននៃបញ្ហាសិទ្ធិមនុស្ស៕
© រក្សាសិទ្ធិដោយ thmeythmey.com