កីឡាអន្តរជាតិ
អន្តរជាតិ
AFF Suzuki Cup៖ វគ្គផ្ដាច់ព្រ័ត្រជើងទី១ ថៃ បើកទ្វាកីឡដ្ឋានស្វាគមន៍ម៉ាឡេស៊ី
× ពានរង្វាន់បាល់ទាត់ធំប្រចាំតំបន់អាស៊ីភាគអាគ្នេយ៍ដែលមានឈ្មោះថា AFF Suzuki Cup 2014 បានឈានដល់ប្រកួតផ្ដាច់ព្រ័ត្រហើយ ដោយក្រុមជម្រើសជាតិថៃ ត្រូវបើកទ្វាកីឡដ្ឋាន Rajamangala National Stadium ក្នុងក្រុងបាងកក ទទួលស្វាគមន៍ក្រុមម៉ាឡេស៊ី ក្នុងជើងទី១ នៅម៉ោង ៧ យប់ថ្ងៃទី ១៧ ខែ ធ្នូ ឆ្នាំ ២០១៥ នេះ។
ឈានដល់វគ្គសហព័ន្ធកីឡាបាល់ទាត់អាស៊ីអាគ្នេយ៍ (AFF) បានកំណត់ប្រកួត ២ ជើងដើម្បីដឹងឈ្នះចាញ់ ពោលគឺធ្វើឡើងនៅទឹកដីរបស់ក្រុមទាំងសងខាង។
៥ ប្រកួតចុងក្រោយនៅក្នុងពានរង្វាន់នេះ ក្រុមជម្រើសជាតិថៃ មិនដែលស្គាល់ពាក្យថាចាញ់នៅឡើយនោះទេ ដោយក្នុងនោះឈ្នះ ៤ និង ស្មើ ។ ប្រកួតចុងក្រោយថៃ បានយកឈ្នះ ក្រុមហ្វីលីពីន ក្នុងទឹកដីរបស់ខ្លួនដោយលទ្ធផល ៣ ទល់ ១ កាលពីវគ្គពាក់កណ្ដាលផ្ដាច់ព្រ័ត្រ។
លោកគ្រូបង្វឹកKiatisuk Senamuang របស់ជម្រើសជាតិថៃ កំពុងតែមានសំទុះទឹកចិត្តជាមួយកីឡាករវ័យក្មេងទាំងអស់របស់លោកនៅលើទីលាន តាមរយៈលទ្ធភាពវិជ្ជមាននាពេលកន្លងមក។ យ៉ាងហោចណាស់កីឡាករចំនួន ៨ នាក់ក្នុងឈុត Asian Games 2014 បានដល់ឱ្យលេងជាជម្រើសដំបូងនៅវគ្គពាក់កណ្ដាលផ្ដាច់ព្រ័ត្រពេលប៉ះហ្វីលីពីន។ លោកបានប្រាប់សារព័ត៌មាន The Bangkok Post៖ «ពួកយើងចង់ឈ្នះជើងឯកក្រោយខកខានរយៈពេល ១២ ឆ្នាំចុងក្រោយមកនេះ។ នៅពេលនេះយើងនៅសល់តែ ២ ប្រកួតទៀតប៉ុណ្ណោះ ដូច្នេះយើងត្រូវហ្វឹកហាត់ខ្លាំងជាងមុនដើម្បីជោគជ័យ»។
សហព័ន្ធកីឡាបាល់ទាត់ថៃ (FAT) បានត្រៀមទឹកប្រាក់ចំនួន ២៣ លានបាត ប្រមាណជា ៧០១០០០ ដុល្លារសហរដ្ឋអាមេរិក ប្រសិនបើក្រុមជម្រើសជាតិខ្លួនអាចនាំពានរង្វាន់ត្រឡប់ទៅប្រទេសវិញ។ ដំណាលគ្នានេះសន្តិសុខប្រមាណជាង ១ ០០០ នាក់ត្រូវបានត្រៀមការពារសុវត្តិភាពក្នុងប្រកួតជើងទី១ នេះ។
ចំណែកក្រុមម៉ាឡេស៊ី វិញបានធ្វើឱ្យមហាជនភ្ញាក់ផ្អើលយ៉ាងខ្លាំងក្រោយអាចយកឈ្នះក្រុមម្ចាស់ផ្ទះវៀតណាម នៅទីក្រុងហាណូយ ក្នុងលទ្ធផល ៤ ទល់ ២ នៅប្រកួតទី២ នៃវគ្គពាក់កណ្ដាលផ្ដាច់ព្រ័ត្រ។ កីឡាករ Rahim, Mahayuddi, Sali, Yahyah សុទ្ធតែធ្លាប់រកគ្រាប់បាល់បង្កើតស្នាមញញឹមដល់លោក Dollah Salleh គ្រូបង្វឹកក្រុមម៉ាឡេស៊ី ជាប្រចាំផងដែរ។
ក្រឡេកទៅមើលប្រវត្តិ ៥ ប្រកួតចុងក្រោយរបស់ក្រុមទាំង ២ ក្នុងពានរង្វាន់នេះមាន៖
នៅឆ្នាំ ២០០៨ វគ្គជម្រុះតាមពូល (នៅភូកេត) ថៃ ៣ – ០ ម៉ាឡេស៊ី
នៅឆ្នាំ ២០១០ វគ្គជម្រុះតាមពូល (នៅហ្សាកាតា) ម៉ាឡេស៊ី ០ – ០ ថៃ
នៅឆ្នាំ ២០១២ វគ្គពាក់កណ្ដាលផ្ដាច់ព្រ័ត្រ ជើងទី១ (នៅកូឡាំពួរ) ម៉ាឡេស៊ី ១ – ១ ថៃ
នៅឆ្នាំ ២០១២ វគ្គពាក់កណ្ដាលផ្ដាច់ព្រ័ត្រ ជើងទី២ (នៅបាងកក) ថៃ ២ – ០ ម៉ាឡេស៊ី
នៅឆ្នាំ ២០១៤ វគ្គជម្រុះតាមពូល (នៅសិង្ហបុរី) ម៉ាឡេស៊ី ២ – ៣ ថៃ
© រក្សាសិទ្ធិដោយ thmeythmey.com