ជាតិ
សង្គមជាតិ
អ្នកដាំ និងអ្នកបរិភោគអាច«ស្លាប់»ដោយសារជាតិគីមីដូចគ្នា!
× ភ្នំពេញ៖ «ផឹកទឹកត្រូវនឹកដល់ប្រភព ដូច្នេះ ហូបផ្លែស្វាយក៏ត្រូវនឹកដល់ថ្នាំគីមីដែរ។ ពីព្រោះបច្ចុប្បន្ននេះ ទម្រាំមានផ្លែស្វាយដាក់លក់លើទីផ្សារ មានផ្លែស្វាយដាក់នៅលើចាន និងឈានចូលដល់ក្នុងក្រពះរបស់អ្នកបរិភោគ កសិករបានប្រើប្រាស់ថ្នាំគីមីស្ទើរតែអស់ពីលទ្ធភាព រហូតករសិករខ្លះស្ទើរតែស្លាប់ខ្លួនឯង។ ជាធម្មតា ដើមស្វាយចេញផ្លែមួយឆ្នាំម្ដង ប៉ុន្តែឥទ្ធិពលថ្នាំគីមី អាចកែប្រែឲ្យស្វាយមួយដើម ផ្លែចាប់ពី២ទៅ៣ដងក្នុងមួយឆ្នាំ។ តើករសិករប្រើប្រាស់ថ្នាំគីមីក្នុងដំណាក់កាលណាខ្លះ មុននឹងទទួលបានទិន្នផលស្វាយ?
ក្រោយ បញ្ចប់ការប្រមូលផល ដើមស្វាយមានឱកាសលូតលាស់តាមបែបធម្មជាតិ បានរយៈពេលតែ១ខែប៉ុណ្ណោះ មានន័យថា បន្ទាប់ពីនោះ ដើមស្វាយត្រូវតស៊ូលូតលាស់ជាមួយថ្នាំគីមី ដែលកសិករប្រើប្រាស់ដើម្បីបន្តការបង្កបង្កើនផល។
ផ្ដើមពីស្វាយដែលទើបនឹងបេះផ្លែនារដូវចាស់បាន១ខែ ជាដំណាក់កាលបឋម កសិករបានប្រើប្រាស់ជីគីមី (ផលិតផលវៀតណាម និងថៃ) កប់ទៅក្នុងដីក្បែរគល់ស្វាយ ដើម្បីពង្រឹងថាមពលឲ្យដើមស្វាយ ដែលទើបនឹងបេះផ្លែរួចនោះ មានកម្លាំងសម្រាប់តស៊ូជាមួយថ្នាំគីមីដែលនឹងប្រើនាពេលខាងមុខ។
ក្រោយពីស្វាយស្រូបយកជីគីមីបានរយៈពេលប្រហែលកន្លះខែ កសិករបានផ្ដើមប្រើថ្នាំគីមីមួយប្រភេទ ទៀត បាញ់ស្រោចទៅលើស្លឹក និងដើម ដើម្បីជម្រុះស្លឹកចាស់ និងជំនួសដោយត្រួយថ្មី។ ក្នុងដំណាក់កាលត្រួយថ្មីនេះ កសិករត្រូវប្រើថ្នាំគីមីយ៉ាងតិចណាស់ក៏មួយលើកដែរ ដើម្បីទប់ស្កាត់សត្វល្អិតដែលអាចនឹងចូលមកស៊ី ឬកាត់ត្រួយ។ បន្ទាប់ពីត្រួយថ្មីលូតលាស់ហើយនោះ កសិករក៏ផ្ដើមប្រើថ្នាំប្រភេទម្សៅគីមី ដែលត្រូវលាយទឹកចាក់ស្រោចជុំវិញបរិវេណគល់ស្វាយ។ ថ្នាំប្រភេទនេះ ត្រូវបានប្រើក្នុងគោលបំណងឲ្យស្វាយចេញផ្កាខុសពីរដូវធម្មជាតិរបស់វា។
ក្រោយពីប្រើថ្នាំស្រោចគល់រយៈពេលពីសប្ដាហ៍ ត្រួយស្វាយដែលចេញដោយថ្នាំគីមីនោះ ក៏ផ្ដើមលូតលាស់ជាស្លឹកចាស់ ហើយដំណាក់កាលនេះ កសិករក៏បានប្រើថ្នាំគីមីបាញ់ស្រោចលើស្លឹក និងដើមស្វាយជាថ្មីទៀត ដើម្បីឲ្យស្វាយចេញផ្កា។ ក្នុងដំណាក់កាល ដែលស្វាយចេញផ្ការហូតដល់ស្វាយចេញពន្លកក្ដិប ឬហៅថា ក្បាលរុយ វាគឺជាដំណាក់កាលដ៏ស្វិតស្វាញ ដែលកសិករត្រូវតស៊ូជាមួយធម្មជាតិផង និងសត្វល្អិតផង ដើម្បីថែផ្កាឲ្យលូតលាស់បានល្អ។
ដំណាក់កាលខាងលើនេះ កសិករត្រូវប្រឈមនឹងបញ្ហាចំនួនពីរ។ ទី១គឺបញ្ហាអាកាសធាតុ ដែលមានទាំងអាកាសធាតុក្ដៅ និងភ្លៀងធ្លាក់។ ប្រសិនបើអាកាសធាតុក្ដៅ នោះផ្កាស្វាយនឹងរោយជ្រុះ ប៉ុន្តែប្រសិនបើមានភ្លៀងធ្លាក់វិញ ផ្កាស្វាយនឹងត្រូវរលួយ ជាពិសេស នៅពេលដែលមានភ្លៀងអាស៊ីដ
ធ្លាក់តែម្ដង។ ក្នុងដំណាក់កាលទាំងពីរនេះ ករសិករប្រើប្រាស់ទាំងថ្នាំការពារកម្ដៅថ្ងៃផង ថ្នាំការពារទឹកភ្លៀងផង។ កសិករខ្លះ ក៏បានប្រើថ្នាំបាញ់ពង្រីកពន្លកក្ដិបស្វាយ បង្ខំឲ្យវាលូតផុតពីផ្កាស្វាយនិងផុតពីដំណាក់កាលក្ដៅ និងភ្លៀងធ្លាក់ផងដែរ។
ឈានចូលដល់ដំណាក់ស្វាយមានក្ដិប កសិករក៏មិនបានមើលរំលងថ្នាំការពារសត្វល្អិត និងថ្នាំបំប៉នក្ដិបនោះដែរ។ រៀងរាល់មួយសប្ដាហ៍ម្ដង កសិករតែងប្រើប្រាស់ថ្នាំគីមីទាំងនោះ រហូតដល់ស្វាយមានគ្រាប់រឹង ឬភាសាម្ចាស់ចម្ការថា«ស្វាយប្រលុង»។ មុននឹងផ្លែស្វាយឈានដល់ «ប្រលុង» កសិករក៏ប្រឈមមុខនឹងបញ្ហាអាកាសធាតុផងដែរ ជាពិសេស ការធ្លាក់សន្សើមប្រៃ ហើយដែលវានឹងធ្វើឲ្យក្ដិបស្វាយមួយចំនួនស្វិតទងជ្រុះធ្លាក់។ ករសិករបានប្រើប្រាស់ថ្នាំគីមីការពារសន្សើមប្រៃដើម្បីដោះស្រាយបញ្ហានេះ។
ឆ្លងចូលដល់ដំណាក់កាលនេះ ផ្លែស្វាយបានឈានចូលដល់ដំណាក់កាលដែលអាចប្រមូលផលបានហើយ គ្រាន់តែវាមិនទាន់ចាស់តែប៉ុណ្ណោះ។ ដូច្នេះដើម្បីឲ្យផ្លែស្វាយឆាប់បានលក់ ជាពិសេសលក់ក្នុងដំណាក់កាល«ដើមដៃ»នោះ កសិករបានប្រើប្រាស់ថ្នាំពីដំណាក់ទៀត។ ទីមួយកសិករបានប្រើប្រាស់ថ្នាំបាញ់ពង្រីកផ្លែ ដែលថ្នាំប្រភេទនេះ នឹងធ្វើឲ្យស្វាយរីកផ្លែក្នុងរយៈពេលមួយសប្ដាហ៍ក្រោយពីបាញ់ថ្នាំ។ បន្ទាប់ពីស្វាយរីកផ្លែហើយនោះ កសិករបានប្រើប្រាស់ថ្នាំមួយប្រភេទទៀត គឺថ្នាំបាញ់យកពណ៌ ដើម្បីឲ្យស្វាយឡើងក្បាលម្សៅ និងមានពណ៌លឿង ដែលមើលទៅដូចជាស្វាយចាស់។
ជាចុងក្រោយ ផ្លែស្វាយដែលឆ្លងកាត់ដំណាក់កាលប្រើថ្នាំគីមីទាំងនេះ នឹងត្រូវបេះប្រមូលផលយកមកលក់នៅរាជធានីភ្នំពេញ ជាពិសេសផ្សារដើមគរ និងផ្សារនាគមាស ដែលជាផ្សារបន្លែផ្លែឈើដ៏ធំប្រចាំប្រទេសកម្ពុជា។ ដោយឡែក ផ្លែស្វាយមួយចំនួនទៀត ត្រូវបានឈ្មួញមកពីប្រទេសវៀតណាមប្រមូលទិញទៅកាន់ប្រទេសរបស់ខ្លួន ដោយមានខ្លះទៀតនឹងត្រូវបញ្ជូនទៅកាន់ទីផ្សារប្រទេសចិន។
ការសិក្សារស៊ើបអង្កេតរបស់អ្នកកាសែតស្វីសក្នុងប្រទេសកម្ពុជាកាលពី ប៉ុន្មានឆ្នាំមុន បានបង្ហាញថា ប្រជាជនខ្មែរកំពុងប្រឈមនឹងបញ្ហាការប្រើប្រាស់ថ្នាំពុលគីមីខុស បច្ចេកទេស។ ដោយអ្នកកាសែតបានប្រើចំណងជើងអត្ថបទភាសាបារាំងនោះថា «ហ្វ័រមុល បូរ៉ាក់ និងថ្នាំសម្លាប់សត្វល្អិត កំពុងស្ថិតក្នុងចានម្ហូបខ្មែរ»។
តើមានតែអ្នករិភោគទេឬ ដែលប្រឈមមុខនឹងសាធាតុគីមីទាំងនោះ?
តាមពិតទៅ ជនរងគ្រោះទី១ ដោយសារថ្នាំគីមី គឺជាកសិករម្ចាស់ចំការតែម្ដង ខណៈដែលអ្នកបរិភោគគឺជាជនរងគ្រោះទី២ប៉ុណ្ណោះ។ លោក នៅ ចំរើន ប្រជាកសិកររស់នៅក្នុងភូមិ ថ្មគរ ឃុំថ្មគរ ស្រុកល្វាឯម ខេត្តកណ្ដាល បានបញ្ជាក់ឲ្យដឹងថា បច្ចុប្បន្ននេះ ពលរដ្ឋក្នុងឃុំរបស់លោកកំពុងរស់នៅជាមួយបរិយាកាសថ្នាំពុលគីមី។
លោកបានសង្កត់ធ្ងន់ថា៖«ក្បែរផ្ទះ ក្រោយផ្ទះ មុខផ្ទះ គឺសុទ្ធតែដើមស្វាយ ហើយសុទ្ធតែជាស្វាយដែលប្រើថ្នាំគីមីដើម្បីទាញផលមុនរដូវ។ រាល់ថ្ងៃនេះ គ្រប់គ្នាហាក់បន្សាំរួចទៅហើយជាមួយនឹងបរិយាកាសថ្នាំពុល។ ថ្ងៃនេះផ្ទះយើងបាញ់ថ្នាំ ថ្ងៃស្អែកផ្ទះគេបាញ់ថ្នាំ វាធម្មតាទៅហើយ»៕
© រក្សាសិទ្ធិដោយ thmeythmey.com