កីឡាជាតិ
ជាតិ
កីឡាករដែលត្រូវភ្នំពេញក្រោនពិន័យ៖ ស្ងៀមជាងស្រដី ពីឆ្វេងទៅស្តាំ៖ ស៊ូ យ៉ាទី ឃឹម បូរី ហុង ផេង និងគួច សុគម្ភៈ។ រូបថត Cam Photo Agency
× កីឡាករឆ្នើមទាំងបួនរបស់ភ្នំពេញក្រោនរួមមាន គួច សុគម្ភៈ ឃឹម បូរី ស៊ូ យ៉ាទី និងហុង ផេង សម្រេចរក្សាភាពស្ងៀមស្ងាត់មិនបកស្រាយអ្វីឡើយទាក់ទងនឹងបញ្ហាដែលខ្លួនត្រូវបានក្លិបពិន័យរហូតដល់ចប់ពានរង្វាន់សម្តេច ហ៊ុន សែន។
«បងអើយ ខ្ញុំសុខចិត្តនៅស្ងប់ស្ងៀមល្អជាង» នេះជាការលើកឡើងដូចៗគ្នារបស់កីឡាករទាំងបួនរូប។ ខ្សែប្រយុទ្ធ គួច សុគម្ភៈ ខ្សែប្រយុទ្ធ ហុង ផេង និងអ្នកចាំទី ស៊ូ យ៉ាទី សុទ្ធតែបានបង្ហាញខ្លួននៅក្នុងឈុតជម្រើសជាតិនាពេលកន្លងមក ខណៈខ្សែប្រយុទ្ធ ឃឹម បូរី ក៏ធ្លាប់រួមចំណែកយ៉ាងធំធេងផងដែរសម្រាប់ក្រុមជម្រើសជាតិ។
តាមរយៈ សេចក្តីថ្លែងការណ៍របស់ខ្លួននាល្ងាចថ្ងៃចន្ទ ទី៥ ខែមករា ឆ្នាំ២០១៥ ក្លិបកីឡាបាល់ទាត់ភ្នំពេញក្រោន បានសម្រេចព្យួររាល់សកម្មភាពរបស់កីឡាករឆ្នើមចំនួន៤រូប រហូតដល់បញ្ចប់ការប្រកួតពានរង្វាន់សម្តេច ហ៊ុន សែន ឆ្នាំ២០១៥ ។
ជាមួយនឹងការសម្រេចរបស់ខ្លួន ក្លិបម្ចាស់ការពារតំណែងជើងឯកក្របខណ្ឌកំពូលរបស់កម្ពុជាមួយនេះ បានលើកហេតុផលថា កីឡាករទាំងបួនរូប បានប្រព្រឹត្តប្រាស់ចាកពីបទបញ្ជាផ្ទៃក្នុងរបស់ក្លិបយ៉ាងធ្ងន់ ធ្ងរ ពោលគឺអំឡុងពេលនៃដំណើរប្រកួតនៅក្នុងប្រទេសចិន កាលពីថ្មីៗកន្លងមកនេះ ជាពិសេសការបដិសេធក្នុងការហ្វឹកហាត់ជាមួយក្លិប។
ភ្នំពេញក្រោនបានអះអាងថា ខ្លួនគ្មានជម្រើសអ្វីក្រៅពីចាត់វិធានការបែបនេះឡើយ។ ក្លិបបានលើកឡើងនៅក្នុងសេចក្តីថ្លែងការណ៍បន្ថែមថា ភ្នំពេញក្រោនតែងតែប្រកាន់ភ្ជាប់នូវគោលការណ៍នៃការគោរព ទៀងត្រង់ យុត្តិធម៌ និងវិជ្ជាជីវៈ ហើយពួកយើងរំពឹងថា ទាំងកីឡាករ និងបុគ្គលិកប្រតិបត្តិតាមគោលការណ៍ទាំងអស់ដែលមានស្រាប់ឲ្យបានម៉ត់ចត់។
បើតាមប្រភពព័ត៌មានដែលសារព័ត៌មានថ្មីៗ ទទួលបាន ក្រៅពីកីឡាករឆ្នើមទាំង៤រូប លោក លី ហៀង អគ្គលេខាធិការក្លឹប ក៏បានចេញលិខិតព្យួរការងារជំនួយការម្នាក់ទៀតផងដែរ។ បន្ថែមពីលើនេះ នាអំឡុងនៃការពិន័យ កីឡាករត្រូវតម្រូវឲ្យខិតខំហ្វឹកហាត់ដោយខ្លួនឯង ហើយទង្វើណាមួយដែលប៉ះពាល់ដល់កិត្តិយសក្លឹប នឹងត្រូវបានពិន័យជាផ្នែកហិរញ្ញវត្ថុ។
មានការរិៈគន់ផង និងកោតសរសើរផងទាក់ទងនឹងវិធានការរបស់ក្លិបភ្នំពេញក្រោន។ អ្នកខ្លះបានលើកឡើងថា រឿងរ៉ាវបានកើតរវាងក្រុមកីឡាករ និងគ្រូបង្វឹកជនជាតិស្វ៊ីស លោក Sam Schweingruber ប៉ុន្តែមិនមានអ្នកណាដឹងច្បាស់ពីដើមចមនៃបញ្ហានោះឡើយ។ ស្របពេលជាមួយគ្នា មតិមួយចំនួនបានកោតសរសើរក្លិបភ្នំពេញក្រោនដែលបានផ្តល់គំរូដល់ក្លិបដទៃក្នុងការដាក់ពិន័យកីឡាករដែលប្រព្រឹត្តខុស មិនថាពួកគេជាកម្លាំងសំខាន់របស់ក្លិបនោះឡើយ។
កាលពីឆ្នាំ២០១១ ក្លិបភ្នំពេញក្រោនបានឆ្លងកាត់ការរុះរើកីឡាករដ៏ធំមួយ ដោយកីឡាករ៩រូបត្រូវបានសហព័ន្ធកីឡាបាល់ទាត់អាស៊ី (AFC) ដាក់ទណ្ឌកម្មក្រោយបញ្ហាវាយគ្នាលើទីលាននាជំនួបវគ្គផ្តាច់ព្រ័ត្រពានរង្វាន់ AFC President's Cup ជាមួយម្ចាស់ផ្ទះតៃវ៉ាន់ Taiwan Power Company (ថ្ងៃទី២៥ ខែកញ្ញា)។ នាពេលនោះ កីឡាករទាំង៣រូបរួមមាន ចាន់ ឆាយ៉ា សាន ណារិទ្ធ និងស៊ុន សុវណ្ណរិទ្ធី ជាប់ពិន័យរយៈពេល៦ខែ ខណៈ ហុង រតនា ស៊ុន សុបញ្ញា ធុល សុធារិទ្ធ សួង វិរៈ ប៉េង ប៊ុនឆាយ និង Kingsley Njoku ជាប់ពិន័យ៨ប្រកួត។
លោក រិទ្ធី សំណាង ប្រធានក្លិបភ្នំពេញក្រោន ធ្លាប់បានមានប្រសាសន៍ថា លោកចង់បានក្លិបរបស់ខ្លួនក្លាយជាគំរូល្អដល់កីឡាករយុវជន និងក្លិបដទៃទៀតនៅក្នុងប្រទេស។ លោកមិនចង់ឃើញបាតុភាពមិនល្អណាមួយដែលកើតឡើងនៅក្នុងក្លិបនោះឡើយ៕
© រក្សាសិទ្ធិដោយ thmeythmey.com