ព័ត៍មានសុខភាព
សុខភាព៖ ជិតមានរដូវ មានរោគសញ្ញាអ្វីខ្លះ?
× ចង្កោមរោគសញ្ញា មុនពេលមានរដូវ រួមមាន ការប្រែប្រួលអារម្មណ៍ ការឡើងតឹងសុដន់ ឃ្លានអាហារ អស់កម្លាំង ឆាប់ខឹង និងការធ្លាក់ទឹកចិត្ត។ វាអាចកើតមានចំពោះ ៣ នាក់ក្នុងចំនោមស្ត្រី ៤ នាក់។
ការព្យាបាល និងការផ្លាស់ប្ដូររបៀបរបបក្នុងការរស់នៅ អាចជួយកាត់បន្ថយ ឬគ្រប់គ្រងចង្កោមរោគសញ្ញា មុនពេលមានរដូវបាន ។
ចង្កោមរោគសញ្ញា មុនពេលមានរដូវ ផ្នែកលើអារម្មណ៍ និងអាកប្បកិរិយារួមមាន ៖
• ភាពតានតឹង ឬការថប់អារម្មណ៍
• មានអារម្មណ៍ធ្លាក់ទឹកចិត្ត
• ការយំរៀបរាប់
• ការប្រែប្រួលអារម្មណ៍ និងការឆាប់ខឹង
• ការផ្លាស់ប្តូរចំណង់អាហារ
• គេងមិនលក់
• ការគេចចេញ ពីសកម្មភាពសង្គម
• មានបញ្ហា ក្នុងការផ្តោតអារម្មណ៍
ចង្កោមរោគសញ្ញា មុនពេលមានរដូវ ផ្នែករាងកាយ រួមមាន ៖
• ការឈឺសាច់ដុំ ឬសន្លាក់
• ឈឺក្បាល
• អស់កម្លាំង
• ការឡើងទម្ងន់ ដែលទាក់ទងទៅនឹងការចាល់ជាតិទឹក
• ហើមពោះ
• ការឡើងតឹងនៃសុដន់
• កើតមានមុននៅលើផ្ទៃមុខ
• ការទល់លាមក ឬការរាគរូស។
ការឈឺចាប់ផ្នែកខាងរាងកាយ និងភាពតានតឹងផ្លូវចិត្ត បានធ្វើអោយប៉ះពាល់ ដល់ការរស់នៅប្រចាំថ្ងៃរបស់ស្ត្រី។ សញ្ញា និងរោគសញ្ញាទាំងនោះ ភាគច្រើននឹងបាត់ទៅវិញ ក្នុងរយៈពេលបួនថ្ងៃ មុននឹងចាប់ផ្តើម នៃការមានរដូវចំពោះស្ត្រី។
ប៉ុន្ដែ ស្ត្រីមួយចំនួនតូច អាចមានចង្កោមរោគសញ្ញា មុនពេលមានរដូវ ជារៀងរាល់ខែ ដែលគេហៅថា Premenstrual Dysphoric Disorder (PMDD) ដែលអាចមានសញ្ញា និងរោគសញ្ញា រួមមាន ការធ្លាក់ទឹកចិត្ត ការប្រែប្រួលអារម្មណ៍ អារម្មណ៍ឆាប់ខឹង ការថប់អារម្មណ៍ មានអារម្មណ៍ធុញ ពិបាកផ្ដោតអារម្មណ៍ និងភាពតានតឹង។
ប្រសិនបើអ្នក មិនអាចគ្រប់គ្រងរោគសញ្ញាទាំងនោះបាន ដោយការផ្លាស់ប្តូររបៀបរស់នៅ និងចង្កោមរោគសញ្ញា មុនពេលមានរដូវ ដែលអាចប៉ះពាល់ដល់សកម្មភាពប្រចាំថ្ងៃ និងសុខភាពរបស់អ្នក អ្នកគួរទៅជួបគ្រូពេទ្យ ជាបន្ទាន់៕
© រក្សាសិទ្ធិដោយ thmeythmey.com