អន្តរជាតិ
នយោបាយអន្តរជាតិ
×![]()
រដ្ឋាភិបាលចិនបានប្រកាសស្វាគមន៍ដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិដែលកាត់ផ្តាច់រាល់ការផ្គត់ផ្គង់លុយកាក់ដល់ករក្រុមភេរវជន។ បេសកជនពិសេសរបស់ចិនប្រចាំអង្គការសហប្រជាជាតិបានបញ្ជាក់ក្នុងនាមរដ្ឋាភិបាលចិនថា ចិនប្រឆាំងរាល់ទម្រង់ភេរវកម្មទាំងអស់ ហើយចិននឹងប្រឹងប្រែងចូលរួមជាមួយសហគមនអន្តរជាតិដើម្បីកម្ចាត់ចលនាភេរវកម្មនៅលើពិភពលោក។
ការប្រកាសសាទរដំណោះស្រាយរបស់ក្រុមប្រឹក្សាសន្តិសុខកើតឡើងកាលពីម្សិលមិញនេះ ហើយដំណោះស្រាយដែលត្រូវអនុម័តឡើងនេះជាសញ្ញាវិជ្ជមានមួយដោយមានការសហការគ្នារវាងប្រទេសមហាអំណាច ស្ថាប័នអន្តរជាតិក្នុងការប្រយុទ្ធប្រឆាំងក្រុមភេរវជន។ ហើយដំណោះស្រាយថ្មីនេះក៏គាំទ្របណ្តាប្រទេសពាក់ព័ន្ធលើពិភពលោកក្នុងការខិតខំប្រឹងប្រែងបោសសម្អាតក្រុមភេវជន។
ជានិច្ចជាកាលរដ្ឋាភិបាលក្រុងប៉េកាំងតែងតែបង្ហាញជំហរប្រឆាំងរាល់គ្រប់រូបភាពនៃអំពើភេរវកម្ម ហើយចិនក៏ប្រឆាំងរាល់ការភ្ជាប់សាសានា ឬជនជាតិណាមួយទៅនឹងចលនាភេរវកម្មផងដែរ។ ការប្រកាសបែបនេះដោយសារក្រុមភេរវជនរដ្ឋឥស្លាមដែលកំពុងធ្វើព្យុះភ្លៀងនៅស៊ីរី និងអ៊ីរ៉ាក់ កំពុងតែជ្រកក្រោមស្លាកសាសនាឥស្លាមដើម្បីបង្កគ្រោះមហន្តរាយមនុស្សជាតិ។ ក្រុមនេះបានធ្វើអោយប៉ះពាល់ដល់តម្លៃនិងអារម្មណ៍របស់ប្រជាជនដែលប្រកាន់សាសនាឥស្លាមនៅលើពិភពលោកទាំងមូល ហើយទង្វើរបស់ពួកគេមិនអាចអត់អោនអោយបានឡើយ។
បេសកជនចិនខាងលើបានប្រកាសដង្ហើយអោយសហគមន៍អន្តជាតិទាំងមូល ចូលរួមអោយពេញទំហឹង និងអនុវត្តដំណោះស្រាយថ្មី និងដំណោះស្រាយមុនៗដែលផ្តោតលើការកម្ចាត់ចលនាភេរវកម្មនៅលើពិភពលោកថែមទៀតផង។ មិនត្រឹមតែប៉ុណ្ណោះទេ ចិនបានជំរុញអោយសហគមនអន្តរជាតិពង្រឹងកិច្ចសហប្រតិបត្តិការ អនុវត្តគោលនយោបាយក្នុងឬក្រៅប្រទេស រួមគ្នាជាធ្លុងមួយនិងកាត់ផ្តាច់រាល់ចំណូលនៃក្រុមភេរវជននៅលើពិភពលោកដើម្បីដាក់គំនៀបដល់ក្រុមទាំងនោះ។ លើសពីនេះចិនបានស្នើសុំអោយភាគីនិងប្រទេសពាក់ព័ន្ធត្រួតពិនិត្យនិងចាត់វិធានការដោះស្រាយបញ្ហាការផ្សព្វផ្សាយមនោគមន៍វិជ្ជាជ្រុលនិយមតាមប្រព័ន្ធអ៊ីនធឺណែត ការជ្រើសរើសក្រុមសកម្មប្រយុទ្ធតាមប្រព័ន្ធទំនាក់ទំនងសង្គមជាដើម ។
គួរបញ្ជាក់ថាកាលពីថ្ងៃព្រហស្បតិ៍ម្សិលមិញនេះ ក្រុមប្រឹក្សាសន្តិសុខ បានសម្រេចអនុម័តដំណោះស្រាយ ថ្មីបំផុតមួយដើម្បីកាត់ផ្តាច់រាល់ចំណូលរបស់ក្រុមភេរវជនរដ្ឋឥស្លាម និងក្រុម Al-Nusrahដោយសេចក្តីសម្រេចនេះផ្តោតសំខាន់លើការទប់ស្កាត់ការរកចំណូលដោយខុសច្បាប់ ការជួញដូរមនុស្ស ការជម្រិតទារលុយ និងការជួញដូរប្រេងជាដើម ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ថ្ងៃ
