ជាតិ
×![]()
ដោយ: ខន ចំប៉ា
ក្រសួងធនធានទឹក និងឧតុនិយមបានចេញសេចក្តីជូនដំណឹងមួយស្តីពីស្ថានភាពនិងការព្យាករណ៍អាកាសធាតុ នារដូវប្រាំងក្នុងឆ្នាំ២០១៥នេះ។
បើយោងតាមសេចក្តីជូនដំណឹងដែលចេញផ្សាយនៅថ្ងៃទី២៧ខែកុម្ភៈនេះសីតុណ្ហភាពនៅមហាសមុទ្រប៉ាស៊ីហ្វិកនៅត្រង់ចំណុចខ្សែអេក្វាទ័រ នៅឆ្នាំ២០១៥នេះមានកំរិតទាបច្រើនជាងមធ្យមភាគប្រចាំឆ្នាំ។
បើតាមសេចក្តីជូនដំណឹងដដែលកម្ពុជានឹងទទួលរងឥទ្ធិពលនៃបាតុភូត Dipole Model Index ឬ Neutral Condition (ជាបាតុភូតចន្លោះរវាងអែលនីណូនិងឡានីណា)។ជាមួយគ្នានោះខ្យល់មូសុងឦសាន និងជ្រលងសម្ពាធខ្ពស់ពីប្រទេសចិន ដែលមានឥទ្ធិពលខ្សោយមកលើកម្ពុជានារដូវប្រាំងក្នុងឆ្នាំ២០១៥នេះផងដែរ។
«ស្ថានភាពសីតុណ្ហភាពនៅតំបន់ខ្ពង់រាប មានសីតុណ្ហភាពមធ្យមអប្បរមា មានពី២១-២៤អង្សារសេ និងមធ្យមអតិបរមាពី៣៤-៣៦អង្សារសេ នៅក្នុងខែមិនានិងសីតុណ្ហភាពមធ្យមអប្បរមា មានពី២៣-២៥អង្សារសេ និងមធ្យមអតិបរមាពី៣៤-៣៧អង្សារសេ នៅក្នុងមេសា។
ចំណែកនៅតំបន់វាលទំនាប នៅក្នុងខែមិនា មានសីតុណ្ហភាពមធ្យមអប្បរមា មានពី២៣-២៥អង្សារសេ និងមធ្យមអតិបរមាពី៣៤-៣៦អង្សារសេ និងសីតុណ្ហភាពមធ្យមអប្បរមា ពី២៤-២៥អង្សារសេ និងមធ្យមអតិបរមាពី៣៥-៣៧អង្សារសេ នៅក្នុងមេសា។រីឯនៅតំបន់មាត់សមុទ្រវិញនៅក្នុងខែមិនាមានសីតុណ្ហភាពមធ្យមអប្បរមា មានពី២៤-២៦អង្សារសេ និងមធ្យមអតិបរមាពី៣២-៣៤អង្សារសេ នៅក្នុងមេសាមានសីតុណ្ហភាពមធ្យមអប្បរមា ពី២៤-២៦អង្សារសេ និងមធ្យមអតិបរមាពី៣៤-៣៦អង្សារសេ» ។នេះបើតាមសេចក្តីជូនដំណឹងដដែល។
សេចក្តីជូនដំណឹងដដែលបន្តថាភ្លៀងកក់ខែ ផ្គររន្ទះនិងខ្យល់កន្ត្រាក់អាចកើតមានច្រើននៅចុងខែមេសានិងក្នុងខែឧសភានៅតាមបណ្តាខេត្តនានាពិសេសខេត្តនៅតំបន់មាត់សមុទ្រនិងវាលទំនាប៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
1 ថ្ងៃ
