ជាតិ
សុខភាព
ប្រធានមន្ទីពេទ្យបង្អែក
×![]()
ដោយ: ធឿន បញ្ញាឬទិ្ធ
ជប៉ុនបានផ្តល់ជំនួយឥតសំណងដល់មន្ទីរពេទ្យ បង្អែកខេត្តព្រះសីហនុ ជាង១៥លានដុល្លារសហរដ្ឋអាម៉េរិក សម្រាប់កែលំអមន្ទីរពេទ្យនេះឡើងវិញ។ នេះបើតាមលោក សេង ណុង ប្រធានមន្ទីរពេទ្យបង្អែកខេត្តព្រះសីហនុ។ លោកបានបន្ដថា ជំនួយកែលំអមន្ទីរពេទ្យនេះ គឺអាចជួយលើកកម្ពស់ការព្យាបាល និងបង្កើនទំនុកចិត្តដល់ប្រជាពលរដ្ឋទៀតផង ។
ថ្លែងចំពោះមុខអ្នកកាសែតលោកប្រធានមន្ទីរពេទ្យរូបនេះ បានបន្ថែមថា គម្រោងកែលំអនេះអាចលើកកម្ពស់គុណភាពមន្ទីពេទ្យ សេវានឹងកើនឡើង បង្កើនជំនឿទុកចិត្តរបស់អតិថិជន ចំនួនអ្នកជំងឺកើនឡើង ចំណូលហិរញ្ញប្បទានកើនឡើង អាត្រាអ្នកស្លាប់ថយចុះ រួមចំណែកកាត់បន្ថយភាពក្រីក្រ និងបំរើសេវាសុខភាពដល់ប្រជាពលរដ្ឋក្នុងខេត្ត និងខេត្តជិតខាង កាត់បន្ថយការធ្វើដំណើរទៅព្យាបាលនៅទីកន្លែងឆ្ងាយ។
បើតាមលោកវេជ្ជបណ្ឌិតរូបនេះ កន្លងមកមន្ទីរពេទ្យបង្អែក ជួបបញ្ហាប្រឈមជាច្រើនដូចជា កង្វះខាតវេជ្ជបណ្ឌិតជំនាញវះកាត់ គុណភាពមន្ទីពេទ្យនៅមានកម្រិតដែលធ្វើឲ្យប្រជាពលរដ្ឋមួយចំនួនមិនសូវមានទំនុកចិត្ត ហើយងាកទៅរកមន្ទីពេទ្យផ្សេង។របាយការណ៍សម្រេចលទ្ធផលក្នុងឆ្នាំ២០១៤ របស់មន្ទីពេទ្យបង្អែកខេត្តព្រះសីហនុនេះ បានបង្ហាញថា ចំណូលហិរញ្ញប្បទានមានចំនួនជាង៨៣០លានរៀល ក្នុងនោះការព្យាបាលបង់ប្រាក់ដោយជំនួយមូលនិធិសមធម៌ (សម្រាប់ក្រីក្រ) មានចំនួនជាង៦១៩លានរៀល ។ អ្នកជំងឺសរុបមានចំនួន៩.២៤៦ករណី ក្នុងនោះអ្នកស្លាប់មានចំនួន ១៤៥នាក់ ស្មើនឹង២,៩១ភាគរយ ដែលជាអាត្រាស្លាប់នេះនៅតែកើនឡើង។
គម្រោងកែលម្អនេះចាប់ផ្តើមពីខែឧសភា ឆ្នាំ២០១៤ដល់ខែកញ្ញាឆ្នាំ២០១៥ មានរយៈពេល១៦ខែ ជាជំនួយឥតសំណង របស់រាជរដ្ឋាភិបាលជប៉ុន តាមរយៈJICA អាគារមន្ទីរពេទ្យគ្របដណ្តប់ ៥.១៨៥ម៉ែត្រការ៉េ។ គម្រោងនេះ មានការសាងសង់អាគារមន្ទីរពេទ្យថ្មី បំពាក់ឧបករណ៍ បរិក្ខាពេទ្យ និងបណ្តុះបណ្តាល ធនធានមនុស្សផងដែរ។
គួរបញ្ជាក់ថា ប្រទេសជប៉ុនបានចូលរួមស្ដារ និងអភិវឌ្ឍន៍ប្រទេសកម្ពុជា ចាប់តាំងពីឆ្នាំ១៩៩១មក។ ជប៉ុនបានកំណត់គោលការណ៍ផ្ដល់ជំនួយដល់ប្រទេសកម្ពុជា ក្នុងវិស័យអទិភាពចំនួន៣ក្នុងនោះរួមមាន ការពង្រឹងមូលដ្ឋានសម្រាប់សកម្មភាពសេដ្ឋកិច្ច ការលើកកម្ពស់ការអភិវឌ្ឍន៍សង្គម និងការពង្រឹងអភិបាលកិច្ចល្អ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
1 ថ្ងៃ
