ជាតិ
សៀវភៅអប់រំស្តីពីការប្រឆាំងអំពើពុករលួយ នឹងត្រូវដាក់ចូលក្នុងកម្មវិធីសិក្សា
×
សៀវភៅអប់រំ ស្តីពីការប្រឆាំងអំពើពុករលួយ សម្រាប់កម្រិតមធ្យមសិក្សាបឋមភូមិ ថ្នាក់ទី៧ ៨ និងទី៩ នឹងត្រូវដាក់បញ្ចូលទៅ ក្នុងកម្មវិធីសិក្សាចំណេះទូទៅចាប់ពីឆ្នាំសិក្សាឆ្នាំ២០១៥-២០១៦ខាងមុខ។ នេះបើយោងតាមការប្រកាសរបស់ អង្គភាពប្រឆាំងអំពើពុករលួយ ACU ។
សេចក្តីប្រកាសដដែល បានឲ្យដឹងថា សៀវភៅនេះ មាន១២មេរៀន ដែលផ្តោតលើការធ្វើឲ្យសិស្សស្មោះត្រង់ មានវិន័យលើខ្លួនឯង យល់ និងគោរពច្បាប់ ចេះត្រិះរិះពិចារណា និងជ្រើសរើសនូវអ្វីដែលល្អសម្រាប់ខ្លួនឯង គ្រួសារ និងសង្គមជាតិ។ល។
«មេរៀនទាំង១២នោះ រួមមាន មេរៀនទី១ការទទួលខុសត្រូវ មេរៀនទី២ ស្វ័យគ្រប់គ្រង មេរៀនទី៣ យកឈ្នះសម្ពាធពីមិត្តភក្តិ មេរៀនទី៤ មានប្រាក់មានអ្វីគ្រប់យ៉ាងឬទេ? មេរៀនទី៥ ជម្រើសត្រឹមត្រូវ មេរៀនទី៦ ហ៊ាននិយាយាថា«ទេ» មេរៀនទី៧ ស្របច្បាប់ និងមិនស្របច្បាប់ យុត្តិធម៌ និងអយុត្តិធម៌ មេរៀនទី៨ ការចូលរួមបង្ការ និងទប់ស្កាត់អំពើពុករលួយ មេរៀនទី៩ ទំនាស់ជាមួយខ្លួនឯង មេរៀនទី១០ លក្ខណៈវិនិច្ឆ័យការងារ មេរៀនទី១១ សុចរិតភាព និងមេរៀនទី១២ ការអប់រំស្តីពីការប្រឆាំងអំពើពុករលួយ»។ នេះបើតាមសេចក្តីប្រកាសរបស់ ACUដដែល។
បើតាមសេចក្តីប្រកាសដដែល អង្គភាពប្រឆាំងអំពើពុករលួយ ACU និងក្រសួងអប់រំ យុវជន និងកីឡា នឹងរៀបចំកម្មវិធីបណ្តុះបណ្តាលដល់គ្រូបង្គោលរបស់ក្រសួងអប់រំ យុវជន និងកីឡា នៅទូទាំងប្រទេស នៅពេលឆាប់ៗខាងមុខនេះ៕
© រក្សាសិទ្ធិដោយ thmeythmey.com