ជាតិ
ថោនព្រមានប្តឹងទារសំណង៥០ម៉ឺនដុល្លារចំពោះអ្នកលួចចម្លងបទចម្រៀងរបស់ខ្លួន
×
ផលិតកម្មថោន បានចេញសេចក្ដីជូនដំណឹងនៅថ្ងៃទី១០ ខែមិនានេះ ដោយព្រមានថា ផលិតកម្មខ្លួននឹងប្ដឹងទាមទារសំណងជំងឺចិត្ត ចំនួនទឹកប្រាក់មិនតិចជាង៥០ម៉ឺនដុល្លារឡើយ ចំពោះជនណាដែលល្មើសលួចចំលងស្នាដៃ របស់ផលិតកម្មថោន យកទៅធ្វើអាជីកម្មបន្ដដោយខុសច្បាប់ ។ ការព្រមាននេះធ្វើឡើង ខណៈដែលផលិតកម្មថោន ត្រៀមនឹងចេញអាល់ប៊ុមបទចម្រៀងចូលឆ្នាំប្រពៃណីរបស់ខ្លួន នាពេលខាងមុខនេះ ។
ផលិតកម្មថោន បានបញ្ជាក់ថា ការលួចចម្លងស្នាដៃទាំងនេះ បានធ្វើឲ្យប៉ះពាល់យ៉ាងធ្ងន់ធ្ងរដល់ផលិតកម្មថោន ដែលបង្កឲ្យមានការខាតបង់ថវិការយ៉ាងច្រើនសន្ធឹកសន្ធាប់ ធ្វើឲ្យផលិតករមានការបាក់ទឹកចិត្តក្នុងការផលិត បើសិនជាសកម្មភាពលួចចំលងស្នាដៃនៅតែបន្ដ ។
ជាមួយគ្នាផលិតកម្មថោន បានឲ្យដឹងថា ខ្លួនបានត្រៀមសហការជាមួយនឹងគណៈកម្មាការអន្តរក្រសួងបង្ក្រាបបទល្មើសភាពយន្ដ និងវីឌីអូ ដើម្បីចុះបង្ក្រាបជនខិលខូចលួចចំលងបទចម្រៀង ដែលកំពុងរំលោភលើកម្មសិទ្ធបញ្ញាយ៉ាងធ្ងន់ធ្ងរនេះ ៕
© រក្សាសិទ្ធិដោយ thmeythmey.com