ជាតិ
បទយកការណ៍ / បទសម្ភាសន៍
យុវជន តាំងអ៊ុយម៉េងប្រាប់ពីគន្លឹះជោគជ័យក្នុងការទទួលបានអាហារូបករណ៍ពី Ohio University
×![]()
ភ្នំពេញ៖ តាំង អ៊ុយម៉េង អាយុ២៣ឆ្នាំ កំពុងសិក្សាថ្នាក់អនុបណ្ឌិតជំនាញសិក្សាអន្តរជាតិនៅសាកលវិទ្យាល័យ Ohio សហរដ្ឋអាមេរិក។ យុវជនអាយុ២៣ឆ្នាំរូបនេះ ទទួលបានឱកាសសិក្សានៅលើទឹកដីនៃមហាអំណាចពិភពលោកដោយសារតែរូបគេជោគជ័យក្នុងការស្នើសុំអាហារូបការណ៍តាមប្រព័ន្ធអ៊ីនធ័រណិតទៅកាន់សាកលវិទ្យាល័យ Ohio ផ្ទាល់។ តាមរយៈសារព័ត៌មានថ្មីៗ អ៊ុយម៉េង បានចែករំលែកពីគន្លឹះសំខាន់ពីជោគជ័យនៃការទទួលបានអាហារូបករណ៍។
ជាអតីតនិស្សិតបញ្ចប់ថ្នាក់បរិញ្ញាបត្រជំនាញសេដ្ឋកិច្ច នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) និងអតីតនិស្សិតអាហារូបករណ៍បញ្ចប់ថ្នាក់បរិញ្ញាបត្រអក្សរសាស្ត្រអង់គ្លេស នៃវិទ្យាស្ថានភាសាបរទេស (IFL) នៅឆ្នាំ ២០១២នោះ យុវជនតាំង អ៊ុយម៉េង អាយុ២៣ឆ្នាំ កំពុងសិក្សាថ្នាក់អនុបណ្ឌិតលើជំនាញសិក្សាអន្តរជាតិ ដោយសារលើផ្តោតលើ ភូមិសាស្ត្រសេដ្ឋកិច្ច និងនយោបាយសហគមន៍អាស៊ាននៅក្នុងសាកលវិទ្យាល័យ Ohio Universityក្នុងឆ្នាំសិក្សា២០១៤ ដល់ ២០១៦ ។
ការចូលចិត្តអាន និងស្រាវជ្រាវ គឺជាទុនដ៏សំខាន់ដែលនាំឲ្យ យុវជន តាំង អ៊ុយម៉េង មានឱកាសបន្តការសិក្សាថ្នាក់អនុបណ្ឌិតនៅសាកលវិទ្យាល័យដ៏ល្បីឈ្មោះនៅសហរដ្ឋអាមេរិក និងមានកំណើតជាង២០០ឆ្នាំ។ ការបំពេញលក្ខខណ្ឌផ្សេងៗទៅតាមតម្រូវការរបស់សាកលវិទ្យាល័យ មិនមែនជារឿងលំបាកឡើយសម្រាប់យុវជនរូបនេះ ដោយសារតែរូបគេបានត្រៀមខ្លួនសម្រាប់អាហារូបករណ៍តាំងពីមិនទាន់រៀនចប់មហាវិទ្យាល័យមកម្ល៉េះ។
កូនប្រុសច្បងក្នុងចំណោមកូន៣នាក់នៃគ្រួសារអាជីវករក្នុងរាជធានីភ្នំពេញរូបនេះ បានកត់សម្គាល់ថា៖ «សិស្ស និងនិស្សិតភាគច្រើន តែងមានបំណងចង់បានអាហារូបករណ៍ទៅបន្តការសិក្សានៅ បរទេស ប៉ុន្តែពួកគេមួយចំនួន នៅមិនទាន់រកបានព័ត៌មានអាហារូបករណ៍គ្រប់គ្រាន់នៅ ឡើយ ដូច្នេះពួកគេនឹងមិនអាចឱកាសអាហារូបករណ៍បាននោះទេ»។
អ៊ុយម៉េង ដែលជាអតីតសិស្សវិទ្យាល័យ ជា ស៊ីម សន្ធរម៉ុក ផងដែរនោះ បានចែករំលែកពីគន្លឹះដំបូងនៃការដាក់ពាក្យស្នើសុំក្នុង កម្មវិធី អាហាររូបករណ៍ពីសាកលវិទ្យាល័យ Ohio យ៉ាងដូច្នេះថា មុននឹងដាក់អាហារូបករណ៍បាន ជោគជ័យនោះ សិស្ស និងនិស្សិតត្រូវប្រមូលព័ត៌មានជុំវិញអាហារូបករណ៍ឲ្យបានច្បាស់លាស់ ជាមុនសិន។
យុវជនឆ្នើមរូបនេះ បានលើកជាសំណួរឡើងថា៖«យើងត្រូវបានសិក្សាពីតម្រូវការរបស់អាហារូបករណ៍ថា តើគេចង់បានអ្វីខ្លះ?។ យើងត្រូវធ្វើអ្វីខ្លះ?»។
ចំពោះលក្ខខណ្ឌដើម្បីទទួលបានអាហារូបករណ៍ពីកម្មវិធីអាហារូបករណ៍របស់សាកលវិទ្យាល័យ Ohio នោះ អ៊ុយម៉េង បានលើកឡើងថា មាន ៥ចំណុចសំខាន់ៗ ដែលក្នុងនោះរួមមាន ទីមួយ ពិន្ទុមធ្យមភាគប្រចាំឆ្នាំ (GPA) ចាប់ពី ៣.0 ឡើងទៅ និងពិន្ទុតាមមុខវិជ្ជាពី A B និងC ទីពីរ គឺ លិខិតអំណះអំណាងពីគ្រឹះស្ថានសិក្សា និងកន្លែងការងារ ទីបីគឺ ជីវប្រវត្តិ និងបទពិសោធន៍យ៉ា ហោច ណាស់រយៈពេល ២ឆ្នាំ និងទី៥នោះ គឺ ពិន្ទុសមត្ថភាពភាសាអង់គ្លេស (TOEFL ៨០ពិន្ទុឡើង ឬ IELT ៦.០ ឡើងទៅ) និងគោលបំណងជាក់លាក់មួយមុន និងក្រោយពីបញ្ចប់ការសិក្សា។
ក្រៅពីការសិក្សា យុវជន អ៊ុយម៉េង ក៏បានធ្វើការងារស្ម័គ្រចិត្តនៅតាមស្ថាប័នមួយចំនួនដែរ ក្នុងនោះរួមមាន អង្គការទស្សនៈពិភពលោកប្រចាំកម្ពុជា (World Vision Cambodia) និងក្រុមប្រឹក្សាយុវជនឯកអគ្គរដ្ឋទូតអាមេរិក (Ambassador's Youth Council ) ជាដើម។ ជាងនេះ ទៀត យុវជនរូបនេះ ក៏បានចូលរួមផ្លាស់ប្តូរការសិក្សារយៈពេល មួយឆ្នាំកន្លះនៅសហភាពអឺរ៉ុប ហុងកុង អាល្លឺម៉ង់ បារាំង សហរដ្ឋអាមេរិក និងថៃផងដែរ។បទពិសោធន៍ការងារ និងសមត្ថភាពក្នុងការសិក្សានេះ ក៏ជាកត្តាដែលជំរុញឲ្យ អ៊ុយម៉េង បានទទួលអាហារូបករណ៍ ទៅសិក្សានៅក្នុងសាកលវិទ្យាល័យ Ohio ផងដែរ។
យុវជនរូបនេះនិយាយថា ឱកាសអាហារូបករណ៍បរទេសមានច្រើន ដូច្នេះ សិស្ស-និស្សិត ត្រូវមានជំនឿជាក់លើសមត្ថភាពក្នុងការប្រកួតប្រជែងជាមួយនិស្សិតបរទេសដទៃទៀត។ លោកបានណែនាំថា៖«យើងត្រូវអានសៀវភៅឲ្យច្រើនតាមដែលអាចធ្វើបាន ដើម្បីយកគំនិតពីគេ មកច្នៃប្រឌិតថ្មីពិសេសយើងស្រាវជ្រាវឯកសារតាមអ៊ីនធឺណែត យើងអាចទទួលចំណេះដឹង លើពិភពលោកទាំងមូល»។
ចំពោះ ការចំណាយលើការរស់នៅប្រចាំថ្ងៃលើទឹកដីសហរដ្ឋអាមេរិកវិញ យុវជន អ៊ុយម៉េង មិនជួបប្រទះការលំបាកឡើយ ដោយសារលោកទទួលបានអាហារូបករណ៍សិក្សា។ លោកភារកិច្ចតែមួយគត់នោះគឺ ប្រឹងប្រែងសិក្សារៀនសូត្រ។
លោកថា៖«ការសិក្សានៅអាមេរិកនេះ ទាមទារឲ្យអានសៀវភៅ និងស្រាវជ្រាវឲ្យច្រើន ដោយសារយើងត្រូវនិស្សិតបរទេសដទៃទៀត។ ពេលប្រឡងម្តងៗតយើងមិនអាចបើកមើល បាននោះទេ ប្រសិនបើកចម្លងគំនិតពីគេនោះ ខាងសាលានឹងឲ្យធ្លាក់ជាស្វ័យប្រវត្តិ»។
នៅថ្ងៃអនាគត បន្ទាប់ពីបញ្ចប់ថ្នាក់អនុបណ្ឌិតជំនាញសិក្សាអន្តរជាតិនោះ លោក តាំង អ៊ុយម៉េង មានបំណងយកចំណេះមកបម្រើការងារក្នុងអង្គការក្រៅរដ្ឋាភិបាល និងធ្វើជា សាស្ត្រាចារ្យនៅតាមគ្រឹះស្ថានឧត្តមសិក្សានានា នៅក្នុងប្រទេសកម្ពុជាវិញ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
1 ថ្ងៃ
