ជាតិ
×![]()
ដោយ: ថ្មីៗ
ភ្នំពេញ៖ នាថ្ងៃទី១៥ មីនា ខាងមុខនេះ សិស្សានុសិស្សជាង ១០០នាក់ នៃវិទ្យាស្ថាននិងសាលារៀនអន្តរទ្វីបអាមេរិកាំង នឹងរៀបចំនូវកម្មវិធីទេពកោសល្យដើម្បីជំនួយឧបត្ថម្ភ លើកទី៥ដើម្បីរៃអង្គាសថវិកា យកទៅទិញសម្ភារៈប្រើប្រាស់ប្រចាំ និងសម្ភារៈសិក្សាជូនដល់ ប្រជាជន និងកុមារក្រីក្រ ដែលកំពុងរស់នៅក្នុងខេត្តកំពង់ស្ពឺ ។ នេះបើតាមការបញ្ជាក់របស់ លោក ឆែ ចំរើន អ្នកសម្របសម្រួលកម្មវិធី។
សិស្សានុសិស្សនៃវិទ្យាស្ថានអន្តរទ្វីបអាមេរិកាំង (American Intercon Institute) និងសាលារៀនអន្តរទ្វីបអាមេរិកាំង (American Intercon School) នឹងរៀបចំកម្មវិធីទេពកោសល្យដើម្បី ជំនួយឧបត្ថម្ភ (Talents For A Cause) លើកទី៥ នៅថ្ងៃទី១៥ មីនា ឆ្នាំ២០១៥នេះ។ ពួកគេ បានប្រមូលថវិកាពីការលក់សំបុត្រចូលទស្សនាតន្ត្រីសប្បុរសធម៌ ការលក់ម្ហូបអាហារ និង ផលិតផលអនុស្សាវរីយ៍ផ្សេងៗទៀត។
កម្មវិធីតន្ត្រីសប្បុរសធម៌លើកទី៥ ប្រចាំឆ្នាំ២០១៥ នេះ នឹងមានការរៀបចំសម្តែងសិល្បៈមួយ ចំនួន រួមមាន ការបង្ហាញក្បាច់រាំសម័យ ចម្រៀង ការប្រគំតន្ត្រី កំប្លែង និងការសម្តែងទេព កោសល្យវេទមន្ត ជាដើម។
កម្មវិធីដែលនឹងប្រព្រឹត្តឡើងក្នុងមជ្ឈមណ្ឌលសហប្រតិបត្តិការកម្ពុជា កូរ៉េ (CKCC)នោះ ត្រូវបានលោក ឆែ ចំរើន អ្នកសម្របសម្រួលកម្មវិធី TFAC ប្រាប់ឲ្យដឹងថា កម្មវិធីនេះ មានគោលបំណងជួយបណ្តុះគំនិតយុវជនឲ្យយល់ពីសង្គម តាមរយៈ ការងារស្ម័គ្រចិត្ត និងការងារជាក្រុម។ សំខាន់ជាងនេះទៀត លោកបានបន្ថែមថា កម្មវិធីនេះក៏នឹងជួយរៃអង្កាសថវិកា តាមរយៈការលក់សំបុត្រចូលរួកម្សាន្តរីករាយ ដើម្បីជួយពលរដ្ឋក្រីក្រ និងកុមារ ដែលកំពុងជួបប្រទះភាពខ្វះខាតក្នុងការ សិក្សា និងជីវិតរស់នៅប្រចាំថ្ងៃ។
លោកនិយាយថា៖«ឆ្នាំនេះ យើងនឹងប្រមូលថវិកាដែលទទួលពីការលក់សំបុត្រ ដើម្បីយកទៅ ជួយប្រជាជនក្រីក្រ ពិសេសនោះគឺ ជំរុញការសិក្សាដល់កុមារក្រីក្រក្នុងខេត្តកំពង់ស្ពឺ»។
គួររម្លឹកថា កម្មវិធីទេពកោសល្យដើម្បីជំនួយឧបត្ថម្ភ (Talents For A Cause)នេះ ត្រូវបាន រៀបចំជាលើកដំបូងនៅក្នុងឆ្នាំ ២០១០ រហូតដល់ បច្ចុប្បន្ននេះ។ ជារៀងរាល់ឆ្នាំ កម្មវិធីសប្បុរសធម៌នេះប្រមូលថវិកាមិនតិចជាង ៤ពាន់ដុល្លារអាមេរិកនោះទេ ដើម្បីជួយ គ្រួសារកុមារក្រីក្រី នៅតាមតំបន់ក្នុងខេត្តមួយចំនួន ដូចជា ខេត្តកំពង់ស្ពឺ កណ្តាល តាកែវ និងរាជធានីភ្នំពេញ៕
លោកអ្នកអាចរកជាវសំបុត្រ ចូលរួមចំណែកក្នុងកម្មវិធីសប្បុរសធម៌ ដោយទំនាក់ទំនងផ្ទាល់ ជាមួយ លោក ឆែ ចំរើន អ្នកសម្របសម្រួលកម្មវិធី TFAC តាមរយៈ ទូរស័ព្ទលេខ ០៨៩ ៦៣៥ ៥៨០ និង ០១០ ៨០៣ ៥៥១ ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
1 ថ្ងៃ
