ជាតិ
នយោបាយជាតិ
×![]()
នៅព្រឹកថ្ងៃអង្គារទី១០មីនានេះ លោកនាយករដ្ឋមន្ត្រី ហ៊ុន សែន បានមានប្រសាសន៍ថា ទំហំនៃគណៈរដ្ឋមន្ត្រីបច្ចុប្បន្នមិនធំ ដូចការរិះគន់នោះឡើយ។ លោកនាយករដ្ឋមន្ត្រីបានថ្លែងយ៉ាងនេះនៅនៅក្នុងពិធីចែកវិញ្ញាបនបត្រនិស្សិតសាលាភូមិន្ទរដ្ឋបាល។
មានសំឡេង
ប្រមុខរដ្ឋាភិបាលកម្ពុជាបានធ្វើអត្ថាធិប្បាយដ៏កម្រមួយអំពីទំហំនៃគណៈរដ្ឋមន្ត្រីរបស់លោក។ នៅចំពោះមុខមន្ត្រីរដ្ឋបាលរបស់រដ្ឋដែលទើបបញ្ចប់វគ្គបណ្តុះបណ្តាល លោកនាយករដ្ឋមន្ត្រីបានពន្យល់អំពីមូលហេតុដែលធ្វើឲ្យគេមើលឃើញថា គណៈរដ្ឋមន្ត្រីរបស់លោកធំប៉ោង។ នោះ គឺដោយសារតែរដ្ឋធម្មនុញ្ញកម្ពុជាបានសរសេរចែងហៅឈ្មោះគណៈរដ្ឋមន្ត្រីដែលគ្របដណ្តប់ពីនាយករដ្ឋមន្ត្រី រហូតដល់រដ្ឋលេខាធិការ។ ក៏ប៉ុន្តែ សម្រាប់លោកប្រមុខរដ្ឋាភិបាល រដ្ឋលេខាធិការនៅតាមក្រសួងសព្វថ្ងៃ មិនមានការទទួលខុសត្រូវចំពោះមុខនាយករដ្ឋមន្ត្រី និងចំពោះរដ្ឋសភានោះទេ។ ដូច្នេះ ចំពោះលោកនាយករដ្ឋមន្ត្រី គណៈរដ្ឋមន្ត្រីពិតប្រាកដ គឺមានត្រឹមតែរដ្ឋមន្ត្រី ទេសរដ្ឋមន្ត្រី ឧបនាយករដ្ឋមន្ត្រី និងនាយករដ្ឋមន្ត្រី។
ដើម្បីបន្ថយរូបភាពដែលធ្វើឲ្យគេមើលឃើញថា គណៈរដ្ឋមន្ត្រីមានទំហំធំដោយសារតែមានចំនួនរដ្ឋលេខាធិការនោះ លោក ហ៊ុន សែន បានបង្ហើបឲ្យដឹងថា លោកធ្លាប់មានបំណងធ្វើវិសោធនកម្មរដ្ឋធម្មនុញ្ញដើម្បី ដកចេញនូវមុខតំណែងរដ្ឋលេខាធិការពីកញ្ចប់គណៈរដ្ឋមន្ត្រី។
អ្នកនាំពាក្យនៃទីស្តីការគណៈរដ្ឋមន្ត្រី លោក ផៃ ស៊ីផាន បានថ្លែងប្រាប់សារព័ត៌មានថ្មីៗនៅរសៀលថ្ងៃអង្គារនេះថា លោកនាយករដ្ឋមន្ត្រីពិតជាធ្លាប់និយាយលើកឡើងអំពីទំហំគណៈរដ្ឋមន្ត្រីមែននៅក្នុងកិច្ចប្រជុំគណៈរដ្ឋមន្ត្រីកន្លងមក។
លោក ផៃ ស៊ីផាន បានពន្យល់បន្ថែមអំពីនីតិវិធីនៅក្នុងកិច្ចប្រជុំគណៈរដ្ឋមន្ត្រីឲ្យដឹងថា អ្នកដែលមានសិទ្ធិជជែកពិភាក្សា និងសម្រេចកិច្ចការនានានៅក្នុងកិច្ចប្រជុំគណៈរដ្ឋមន្ត្រី គឺក្រុមមន្ត្រីជាន់ខ្ពស់ដែលអង្គុយជួរមុខស្មើលោកនាយករដ្ឋមន្ត្រី អមជុំវិញតុប្រជុំ ដែលរួមមានរដ្ឋមន្ត្រី ទេសរដ្ឋមន្ត្រី ឧបនាយករដ្ឋមន្ត្រីតែប៉ុណ្ណោះ។ ហើយថា ក្រុមមន្ត្រីជាន់ខ្ពស់ទាំងនេះ មានជាង៣០រូប។ ដូច្នេះអ្នកនាំពាក្យ និងរដ្ឋលេខាធិការនៃទីស្តីការគណៈរដ្ឋមន្ត្រីរូបនេះ ក៏យល់ស្របតាមលោកនាយករដ្ឋមន្ត្រី ហ៊ុន សែន ដែរ ដែលថាគណៈរដ្ឋមន្ត្រីកម្ពុជាបច្ចុប្បន្នមិនធំនោះ។
ជារៀងរាល់អាណត្តិរដ្ឋាភិបាល សង្គមស៊ីវិល អ្នកវិភាគនានា និងគណបក្សប្រឆាំងផង តែងតែរិះគន់ទំហំគណៈរដ្ឋមន្ត្រី និងទំហំនៃសមាជិករដ្ឋាភិបាលដែលមានខ្លួនសំពីងសំពោងខ្លាំងជ្រុល ហើយនិងស្រូបយកថវិកាជាតិយ៉ាងសម្បើម។ តាមពិតក្រុមអ្នកសង្កេតការណ៍រិះគន់ត្រឹមទំហំគណៈរដ្ឋមន្ត្រីនោះឡើយ តែជាទំហំសមាជិករដ្ឋាភិបាល និងពិសេសថ្នាក់ដឹកនាំក្រសួងដែលមានចំនួនរដ្ឋលេខាធិការ និងអនុរដ្ឋលេខារាប់មិនអស់។
លោក ផៃ ស៊ីផាន បានទទួលស្គាល់ចំនុចនេះ ហើយលោកពន្យល់ថា នេះគឺដោយសារតែបរិបទនៃស្ថានការណ៍របស់កម្ពុជាដែលត្រូវដោះស្រាយបញ្ហាស្ថិរភាពនយោបាយ។ ប៉ុន្តែលោកអះអាងថា ចាប់ពីអាណត្តិក្រោយនេះទៅ ស្ថានភាពដដែលនេះទំនងជាមិនអាចកើតមានឡើងទៀតឡើយ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
1 ថ្ងៃ
