ជាតិ
នយោបាយជាតិ
×![]()
ដោយ: ធឿន បញ្ញាឬទិ្ធ
អនុប្រធានគណកម្មាការទី២ នៃរដ្ឋសភា លោក សុន ឆ័យ ទាមទាឲ្យលោក ឡេង ប៉េងឡុង អគ្គលេខាធិការនៃរដ្ឋសភា បង្ហាញរបាយការណ៍ចំណាយឲ្យបានច្បាស់លាស់នៅក្នុងរដ្ឋសភា ។ ការទាមទានេះធ្វើឡើង បន្ទាប់ពីលោក សុន ឆ័យ យល់ឃើញថា ការចំណាយរបស់រដ្ឋសភាកាលពីឆ្នាំ២០១៤កន្លងមក អស់ចំនួនជាង១១លានដុល្លារ មានភាពមិនប្រក្រតី និងភាពខ្ជះខ្ជាយធ្វើឲ្យបាត់បង់ថវិការជាតិ ឥតប្រយោជន៍។
« តម្លៃសម្ភារដែលត្រូវទិញ មកផ្គត់ផ្គង់នៅសភានេះមានតម្លៃហួសហេតុ និងគ្មាននិតិវិធីដេញថ្លៃឲ្យបានត្រឹមត្រូវ ដែលភាសាច្បាប់លទ្ធកម្មសាធារណៈនោះ អត់បានបំពេញ » ។ នេះជាការអះអាងរបស់លោក សុន ឆ័យ អនុប្រធានគណៈកម្មាការទី២នៃរដ្ឋសភា នៅព្រឹកថ្ងៃទី១០ មីនា នៅវិមានរដ្ឋសភា។ បើតាមលោក សុន ឆ័យ រដ្ឋសភាបានប្រើប្រាស់ថវិកាអស់ចំនួនជាង ១១លាន ទៅលើការងារផ្សេងៗ ដែលការចំណាយនេះ គ្មានការត្រួតពិនិត្យត្រឹមត្រូវនៅក្នុងរដ្ឋសភា និងធ្វើឲ្យខ្ជះខ្ជាយបាត់បង់ថវិការជាតិ ឥតប្រយោជន៍។
អនុប្រធានគណៈកម្មាការទី២រូបនេះអត្ថាធិប្បាយដូច្នេះថា ៖ «ការបាត់លុយនៅក្នុងរដ្ឋសភា មានប្រភពធំចំនួន២ ទី១ ការចាយវាយពាក់ព័ន្ធ ទៅនឹងសេវាកម្ម ដែលមានទឹកប្រាក់ប្រហែលជា ១១ ទៅ១២លានដុល្លារក្នុងមួយឆ្នាំ។ សេវាកម្មនេះប្រើប្រាស់ ឃើញថាចាយ វាយខ្ជះខ្ជាយមែនទែន ១១លានកន្លះ អត់មានអ្នកត្រួតពិនិត្យទេ និងទី២ការចំណាយទៅលើការសាងសង់ និងទិញសម្ភារផ្សេងៗ ដោយមិនបានត្រួតពិនិត្យត្រឹមត្រូវ »។
ដោយឡែកនៅក្នុងឆ្នាំ២០១៥នេះ រដ្ឋសភាមានសេចក្ដីព្រាងគម្រោងចំណាយ រួមមាន ដងទងជាតិថ្មី តម្លៃ៣៥០០០ ដុល្លារ ចំនួន២ដើម ។ កៅស៊ូការពារជ្រាបទឹក២.៥ដុល្លារក្នុងមួយម៉ែត្រការ៉េ (៩,៦៩២,៤ម៉ែត្រការ៉េ ក្នុងសភា) ។ ឧបករណ៍ការពាររន្ទះតម្លៃ ១២.០០០ ដុល្លារ (ចំនួន៤គ្រឿង) ម៉ាស៊ីនអ៊ិចរ៉េ និងរថយន្ថសម្រាប់ថ្នាក់ដឹកនាំមានតម្លៃថ្លៃជាដើម ។
ជុំវិញការចំណាយនេះលោក សុន ឆ័យ បានបញ្ជាក់ថា សេចក្ដីព្រាងគម្រោងចំណាយនេះ ហាក់ដូចជាមានភាពមិនប្រក្រតី ។ ហើយលោកយល់ថា សម្ភារដែលត្រូវទិញនេះមានតម្លៃខ្ពស់ ដែលតម្រូវឲ្យអគ្គលេខាធិការរដ្ឋសភា លោក ឡេង ប៉េងឡុង បង្ហាញពីការដេញថ្លៃឲ្យបានច្បាស់ ចៀសវាងការចំណាយខ្ជះខ្ជាយ ។ អនុប្រធានគណៈកម្មាការទី២រូបនេះពន្យល់ថា ៖ គ្រាន់តែយើងបញ្ជាក់ថា សមាជិកគណៈកម្មាការទី២ ចំនួន២រូបបានចូលទៅអង្កេតការដេញថ្លៃដងទង់ជាតិកាលពីថ្ងៃមុនឃើញថាមានភាពមិនប្រក្រតី ។ ហើយយើងសូមឲ្យលោកឡេង ប៉េងឡុងរាយការណ៍មក សម្រេចឲ្យក្រុមហ៊ុនណា តម្លៃប៉ុនណាមែនទែន ដើម្បីយកឯកសារនេះពិនិត្យបន្ថែមទៀត ។ ដូចជាការទិញម៉ាស៊ីនថតចម្លងតម្លៃ៣៥០០០ដុល្លារ ឲ្យគាត់បង្ហាញមកថាក្រុមហ៊ុនឈ្មោះអ្វី ម៉ាកអ្វី ដើម្បីយកទៅឆែកមើល តើតម្លៃទីផ្សារពិតជាតម្លៃប៉ុណ្ណឹងមែនអត់ ?»។
លោក សុន ឆ័យ បានឲ្យដឹងថា ថវិកានៅក្នុងរដ្ឋសភា នៅក្នុងឆ្នាំ២០១៥នេះ មានការកើនឡើង រហូតជិត ៤០លានដុល្លារ ហើយប្រាក់ទាំងអស់នេះ មិនបានប្រើប្រាស់ជាប្រយោជន៍ ដល់ប្រជាពលរដ្ឋឡើយ ។ ហើយលោកសុន ឆ័យ ក៏ស្នើឲ្យអគ្គលេខាធិការនៃរដ្ឋសភា លោក ឡេង ប៉េងឡុង ផ្ដល់របាយការណ៍ចំណាយដល់គណៈកម្មាការទី២ ដើម្បីត្រួតពិនិត្យចៀសវាងកុំឲ្យបាត់បង់ថវិការ ដោយយកទៅប្រើប្រាស់ជាប្រយោជន៍បុគ្គល។ តែយ៉ាងណាឯកសាររបាយការណ៍ចំណាយផ្សេងៗទាំងនោះ អគ្គលេខាធិការនៃរដ្ឋសភា លោក ឡេង ប៉េងឡុង មិនបានប្រគល់ជូនលោក សុន ឆ័យនោះទេ ដោយរងចាំការអនុញ្ញាតពីប្រធានរដ្ឋសភាជាមុនសិន ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
1 ថ្ងៃ
