ជាតិ
រដ្ឋាភិបាលចំណាយប្រមាណ២លានដុល្លារ ឧបត្ថម្ភដល់មន្ត្រីរាជការក្នុងពេលចូលឆ្នាំខ្មែរ
×
មន្ត្រីរាជការគ្រប់លំដាប់ថ្នាក់ នឹងទទួលបានប្រាក់ឧបត្ថម្ភចំនួន៤ម៉ឺនរៀល ឬ១០ដុល្លារក្នុងម្នាក់ នៅក្នុងឱកាសបុណ្យចុលឆ្នាំប្រពៃណីជាតិខ្មែរខាងមុខ។ ទឹកប្រាក់ប្រមាណ២លានដុល្លារ នឹងត្រូវផ្តល់ជូនមន្ត្រី រាជការទាំងអស់ដែលមានប្រមាណពី២សែនទៅ២សែន៥ម៉ឺននាក់។ នេះបើតាមការបញ្ជាក់របស់ លោក សុន ឆ័យ អនុប្រធានគណៈកម្មការទី២នៃរដ្ឋសភា ទទួលបន្ទុកសេដ្ឋកិច្ច ហិរញ្ញវត្ថុ ធនាគារ និងសវនកម្ម និងជាអ្នកតំណាងរាស្ត្រគណបក្សសង្គ្រោះជាតិ។
ថ្លែងប្រាប់សារព័ត៌មានថ្មីៗនៅអង្គារនេះ លោក សុន ឆ័យ ហាក់មិនសូវគាំទ្រ នឹងគោលការណ៍ផ្តល់ប្រាក់ឧបត្ថម្ភនេះប៉ុន្មានទេ។ លោកថា៖«ប្រាក់ឧបត្ថម្ភនេះ អាចជួយលើកស្ទួយជីវភាពមន្ត្រីរាជការ បានតែ១ឬ២ថ្ងៃប៉ុណ្ណោះ មិនមែនជាដំណោះស្រាយដែលល្អសម្រាប់លើកស្ទួយជីវភាពរបស់មន្ត្រីរាជការឡើយ»។
តំណាងរាស្ត្រគណបក្សសង្គ្រោះជាតិរូបនេះ សង្កត់ធ្ងន់ថា៖«រដ្ឋាភិបាលគួរមានយន្តការណ៍ ឬគោលការណ៍ដែលប្រសើរជាងនេះ ពោលគឺការតម្លើងប្រាក់បៀវត្សឲ្យបានសមរម្យទៅទេ ទើបជាការចង់បានពិតប្រាកដរបស់មន្ត្រីរាជការ និងអាចផ្តល់លទ្ធភាពឲ្យពួកគាត់ ទ្រទ្រង់ជីវភាពគ្រួសាររយៈពេលយូរ»។
អនុប្រធានគណៈកម្មការទី២នៃរដ្ឋសភា បានពន្យល់យ៉ាងដូច្នេះថា៖«ការតម្លើងបៀវត្សជូនដល់មន្ត្រីរាជការគ្រប់លំដាប់ថ្នាក់ នឹងអាចប្រព្រឹត្តទៅបានឆាប់រហ័ស ប្រសិនបើការប្រមូលថវិកាជាតិបានត្រឹមត្រូវ»។ លោកថា៖«រដ្ឋាភិបាលអាចមានលទ្ធភាពប្រមូលបានចំណូលជាតិប្រមាណពី៨០០ទៅ១,០០០លានដុល្លារបន្ថែមទៀត ពីវិស័យមួយចំនួនដូចជា កាស៊ីណូ សម្បទានដី វិស័យទេសចរណ៍ ការលក់សំបុត្រចូលទស្សនាប្រាសាទអង្គរវត្ត ការផ្តល់សេវាផ្សេងៗ ការជួលដី ឬអគាររបស់រដ្ឋ និងការប្រមូលពន្ធដារ និងពន្ធគយជាដើម»។
មន្ត្រីរាជការគ្រប់លំដាប់ថ្នាក់ រួមមានមន្ត្រីរាជការស៊ីវិលនៃក្រុមនីតិប្បញ្ញត្តិ នីតិប្រតិបត្តិ និងតុលាការ មន្ត្រីនគរបាលជាតិកម្ពុជា យោធិននៃកងយោធពលខេមរភូមិន្ទ សមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ ប្រធានភូមិ អនុប្រធានភូមិ សមាជិកភូមិ មន្ត្រីជាប់កិច្ចសន្យា បុគ្គលិកអណ្តែតដែលកំពុងបម្រើការងារទាំងនៅថ្នាក់ជាតិនិងថ្នាក់ក្រោមជាតិ និវត្តជន ជនដែលបាត់បង់សម្បទាវិជ្ជាជីវៈ ជនបាត់បង់សមត្ថភាពការងារ ជនពិការដែលជាអតីតមន្ត្រីរាជការស៊ីវិល និងអតីតយោធិននៃកងយោធពលខេមរភូមិន្ទ ព្រមទាំងអតីតមន្ត្រីនគរបាលជាតិកម្ពុជា នឹងទទួលបានប្រាក់ឧបត្ថម្ភចំនួន៤ម៉ឺនរៀលក្នុងម្នាក់ នៅក្នុងឱកាសបុណ្យចុលឆ្នាំប្រពៃណីជាតិខ្មែរខាងមុខ៕
© រក្សាសិទ្ធិដោយ thmeythmey.com