ជាតិ
លោក ស៊ីន ស៊ីសាមុត និពន្ធបទឧត្តមដួងចិត្ត លួងចិត្តប្រពន្ធ
× ប្រិយមិត្តអ្នកស្តាប់ជាទីមេត្រីនៅថ្ងៃពុធនេះ លោក សុខឿននឹងជម្រាបជូនប្រិយមិត្តអ្នកស្តាប់នូវបទចម្រៀងជាភាសាថៃមួយបទដែលមានចំណងជើងថា"กลับมาเถิดทูนหัว" (ក្លាប់ម៉ាថឺតធូនហ៊ួ = វិលវិញមកបណ្តូលចិត្ត) និង បទចម្រៀងខ្មែរដែលមានចំណងជើងថា"ឧត្តមដួងចិត្ត"របស់លោក ស៊ីន ស៊ីសាមុត។
មានសំឡេង
បទចម្រៀងដែលប្រិយមិត្តកំពុងស្តាប់នៅពេលនេះមានចំណងជើងថា กลับมาเถิดทูนหัว (ក្លាប់ម៉ាថឺតធូនហ៊ួ) ដែលមានន័យជាភាសាខ្មែរថា «វិលវិញមកបណ្តូលចិត្ត»។ បទចម្រៀងនេះច្រៀងដោយអ្នកចម្រៀងដ៏ល្បីរបស់ថៃ ឈ្មោះ សមយ៉ុត ថាសនៈផាន់។ លោក សមយ៉ុត ថាសនៈផាន់ បាននិពន្ធទំនុកច្រៀង និងបទភ្លេង ហើយបន្ទាប់មកបានថតបទ ចម្រៀងនេះជាអាល់ប៊ុម និងបានចេញលក់នៅចន្លោះឆ្នាំ ១៩៥២ និង ៥៣ ។ បទចម្រៀង នេះបានទទួលការគាំទ្រយ៉ាងច្រើននាសម័យនោះ។
បទ กลับมาเถิดทูนหัว (ក្លាប់ម៉ាថឺតធូនហ៊ួ) ឬ វិលវិញមកបណ្តូលចិត្ត ច្រៀងរៀបរាប់ អំពីទុក្ខសោករបស់បុរសជាប្តី និងកូនតូច ដែលត្រូវប្រពន្ធ និងម្តាយបោះបង់ចោល ហើយទៅស្រវាស្នេហាថ្មី។ ទារកដែលនៅតូចនៅឡើយ បានស្រែកយំរកម្តាយ ពេលវាឃ្លានបៅ។ ប៉ុន្តែទោះយ៉ាងណា បុរសជាប្តីនៅតែអភ័យទោសអោយប្រពន្ធជានិច្ច ប្រសិនបើ នាងត្រឡប់មកវិញ។
នៅកម្ពុជា លោកស៊ីន ស៊ីសាមុត បាននិពន្ធទំនុកច្រៀងថ្មី ដោយយកលំនាំ តាមបទចម្រៀង กลับมาเถิดทูนหัว របស់លោកសមយ៉ុត ថាសនៈផាន់។ បទនោះមានចំណងជើងថា ឧត្តមដួងចិត្ត។
ទាក់ទងនឹងបទចម្រៀង ឧត្តមដួងចិត្ត នេះ ឯកសារបស់សមាគមស៊ីន ស៊ីសាមុត បានសរសេរថា នៅពេលលោកស្រី ខាវ ថងញ៉ុត ជាភរិយាមានផ្ទៃពោះជិតគ្រប់ខែកូនដំបូង លោក ស៊ីន ស៊ីសាមុត មានសេចក្តីបារម្ភជាខ្លាំង ព្រោះភរិយាត្រូវទៅសម្រាលកូនឆ្ងាយពីប្តី ឯខេត្តស្ទឹងត្រែង។ ដើម្បីលួងចិត្តប្រពន្ធ និង ស្តាប់ពេលអាំងភ្លើងកុំអោយក្តៅខ្នង ទើបលោកសន្យានឹងភរិយាថានឹងតែងបទ ចម្រៀង១បទអោយនាងស្តាប់។ ដូច្នេះហើយ នៅឆ្នាំ១៩៥៦ បទចម្រៀងឧត្តមដួងចិត្តរបស់លោក ស៊ីន ស៊ីសាមុត បានបន្លឺសំឡេងតាមរលកអាកាសរបស់វិទ្យុជាតិកម្ពុជា ជូនភរិយារបស់គាត់មែន។
នៅប្រទេសថៃឯណោះវិញ បទ ឧត្តមដួងចិត្ត របស់លោក ស៊ីន ស៊ីសាមុត បានទទួលការ ពេញនិយម និងកោតសរសើរពីគ្រប់មជ្ឈដ្ឋាន ថាលោកច្រៀងពិរោះជាម្ចាស់ដើមទៅទៀត សូម្បីតែក្នុងចំណោមសិល្បករ និង ព្រះមហាក្សត្រថៃ។ ដើម្បីបំពេញតម្រូវការទីផ្សារ បទចម្រៀង ឧត្តមដួងចិត្ត ត្រូវបានថតឡើងវិញនៅឆ្នាំ ១៩៧០ ដោយមានការសម្រួលតន្ត្រីរបស់លោក មែ ប៊ុន។ បទចម្រៀង ឧត្តមដួងចិត្ត ក៏ត្រូវបានអ្នកចម្រៀង សូ សាវឿន យកទៅជាច្រៀងសាជាថ្មីផងដែរ។
បច្ចុប្បន្ននេះ បទចម្រៀង กลับมาเถิดทูนหัว (ក្លាប់ម៉ាថឺតធូនហ៊ួ) ឬ វិលវិញមកបណ្តូលចិត្ត របស់លោក សមយ៉ុត ថាសនៈផាន់ ស្ទើរលែងមានអ្នកស្តាប់ និង ដាក់លក់នៅលើទីផ្សារទៅហើយ។ ប៉ុន្តែទោះយ៉ាងណា សិល្បការិនីថៃម្នាក់ ឈ្មោះ រុងប្ញឌី ភែងផសៃ បានចេញលក់នូវបទចម្រៀងដែលស្រដៀងគ្នានេះ ដោយនិពន្ធទំនុកច្រៀងថ្មីឆ្លើយតបទៅនឹងបទចាស់របស់ លោកសមយ៉ុត ថាសនៈផាន់។
ជិត៦០ឆ្នាំហើយ ដែលបទ «ឧត្តមដួងចិត្ត» របស់លោក ស៊ីន ស៊ីសាមុត បាននិងកំពុងបម្រើ អារម្មណ៍អ្នកស្តាប់ខ្មែរ គ្រប់ស្រទាប់វណ្ណៈ។ ដោយរលកសំឡេងគ្មានគូរប្រៀប និង អក្ខរា ដែលពោរពេញទៅដោយមន្តស្នេហ៍នេះ យើងសង្ឃឹមថា បទចម្រៀង ឧត្តមដួងចិត្ត នេះ នឹងនៅតែទទួលបានការកោតសសើរ និង ពេញចិត្តពីអ្នកស្តាប់ខ្មែរជារៀងរហូតទៅ។
© រក្សាសិទ្ធិដោយ thmeythmey.com